Di Nayshan a Izrel Geh Divaidid Eena Too

Az lang az Salaman mi wership Jehoava, Izrel mi ga pees. Bot Salaman mi marid wahn lata wuman fahn difrent nayshanz, ahn dehndeh waif mi wership wahn lata aidol. Lee bit bai lee bit, Salaman mi chaynj, an ih mi staat tu wership aidolz tu. Jehoava mi beks bad. Hihn tel Salaman: ‘Ai wahn tek weh Izrel fahn yu famili an Ah wahn divaid it eena too. Ah wahn gi di biga paat tu wan a yu servant, ahn yu famili wahn rool oava di smaala paat.ʼ

Jehoava mi du sohnting els fi mek evribadi andastan weh ih seh. Wan a Salaman servant, Jeroboawam, mi-di chravl pahn di road wen ih meet Ahaija di prafit. Ahaija mi tayr ih roab eena 12 peesiz, an ih tel Jeroboawam: ‘Jehoava wahn tek weh di kingdom a Izrel fahn Salaman famili ahn divaid it eena too. Tek ten pees kaaz yoo wahn bee king oava ten chraib.ʼ King Salaman hyaa bowt it an ih mi waahn kil Jeroboawam! Soh Jeroboawam ron gaahn da Eejip. Afta sohn taim, Salaman mi ded an ih son Rehoboawam mi staat tu rool. Afta dat, Jeroboawam mi tink ih sayf fi goh bak da Izrel.

Di eldaz da Izrel mi tel Rehoboawam: ‘If yu chreet di peepl gud, dehn wahn bee laayal tu yu.ʼ Bot Rehoboawam yonga frenz tel ahn: ‘Yu need fi chreet di peepl rof! Mek dehn werk eevn haada!ʼ Rehoboawam mi fala ih yong fren dehn advais. Hihn mi kruwil tu di peepl, ahn dehn ribel gens ahn. Dehn mek Jeroboawam bee king oava di ten chraib dehn, weh da-mi di kingdom a Izrel. Di ada too chraib mi mek op di kingdom a Jooda, ahn dehn mi stay laayal tu Rehoboawam. Dis da how di 12 chraib a Izrel mi geh divaidid.

Jeroosalem mi deh eena Rehoboawam kingdom, ahn Jeroboawam neva waahn ih peepl goh wership deh. Yoo noa wai? Jeroboawam mi frayd dat ih peepl rijek hihn ahn sopoat Rehoboawam insted. Soh hihn mek too stachu weh shayp laik wahn kyaaf weh mi mek owta goal, an ih tel ih peepl: ‘Jeroosalem tu faar. Unu ku wership rait ya.ʼ Di peepl staat tu wership di kyaaf dehn weh mek owta goal, ahn dehn ferget Jehoava agen.