Ilaija ahn di Bayal Prafit Dehn da Mongt Karmel

Di ten-chraib kingdom a Izrel mi ga lata bad king, bot Ayhab da-mi wan a di wers. Hihn mi marid tu wahn eevl wuman weh mi wership Bayal. Fi shee naym da-mi Jezibel. Ayhab ahn Jezibel mi mek lata peepl staat tu wership Bayal ahn dehn mi kil lata Jehoava prafit dehn. Weh Jehoava mi du? Hihn mi sen di prafit Ilaija fi giv Ayhab wahn mesij.

Ilaija mi tel King Ayhab dat dehn neva mi wahn ga no rayn da Izrel kaaz a Ayhab badnis. Fi moa dan chree yaaz, notn mi groa pahn di lan ahn di peepl mi-di staav. Den Jehoava mi sen Ilaija bak tu Ayhab. Di king mi seh: ‘Yoo da di wan weh di kaaz lata chrobl! Dis da fi yoo faalt.ʼ Ilaija tel ahn: ‘Da noh mee di kaaz di jrowt. Da yoo, kaaz yu di wership Bayal. Mek wi fain owt hoo da di chroo Gaad. Gyada aala Izrel an aala di Bayal prafit dehn da Mongt Karmel.ʼ

Di peepl mi gyada da di mongtin, an Ilaija tel dehn: ‘Mek op unu main. If Jehoava da di chroo Gaad, den fala hihn, bot if Bayal da di chroo gaad, den fala hihn. Ai di chalenj unu: Di 450 Bayal prafit dehn shuda pripyaa wahn aafrin ahn kaal pahn di naym a dehn gaad, an Ai wahn pripyaa wahn aafrin an Ah wahn kaal pahn di naym a Jehoava. Di wan weh ansa wid faiya da di chroo Gaad.ʼ Di peepl mi agree.

Soh di Bayal prafit dehn mi pripyaa wahn aafrin. Dehn mi-di kaal tu dehn gaad aal day lang: ‘Oa Bayal, ansa wi!ʼ Wen Bayal neva ansa, Ilaija mi staat tu mek fon a ahn. Ih seh: ‘Unu hala haada man. Maybi ih jrap asleep, ahn sohnbadi need fi goh wayk ahn op.ʼ Dehn mi-di kaal fi Bayal til eevnin, bot stilyet nobadi ansa dehn.

Ilaija mi put fi hihn aafrin pahn wahn alta an ih mi poar waata aal oava it. Den ih pray: ‘Oa Jehoava, pleez mek evribadi noa dat yoo da di chroo Gaad.ʼ Rait afta dat, Jehoava mi sen faiya fahn hevn fi bon op di aafrin. Di peepl hala owt: ‘Jehoava da di chroo Gaad!ʼ Den Ilaija tel dehn: ‘Noh mek non a di Bayal prafit dehn get weh!ʼ Da day, dehn kil di 450 Bayal prafit dehn.

Wahn smaal klowd mi apyaa oava di see, an Ilaija mi tel Ayhab: ‘Wahn staam di kohn. Get yu chariyat redi, ahn goh hoam.ʼ Di skai geh blak op wid klowd, di win mi staat tu bloa, ahn wahn hevi rayn staat tu poar. Di jrowt mi fainali kohn tu wahn en. Ayhab mi jraiv ih chariyat az faas az ih kud. Wid Jehoava help, Ilaija mi ron faasa dan di chariyat! Bot yu tink tingz mi wahn eeziya fi Ilaija afta dat? Mek wi fain owt.