Jehoava Mi Inkorij Ilaija

Jezibel mi hyaa weh mi hapm tu di Bayal prafit dehn, ahn shee mi beks bad. Soh shee mi sen wahn mesij tu Ilaija: ‘Tumaaro, yu wahn en op ded jos laik Bayal prafit dehn.ʼ Ilaija mi geh fraitn an ih ron weh tu di dezert. Hihn mi pray: ‘Jehoava, pleez kil mi. Ah kyaahn tek it nohmoh.ʼ Hihn mi soh taiyad dat ih jrap asleep anda wahn chree.

Wahn aynjel wayk ahn op ahn tel ahn: ‘Get op an eet sohnting.ʼ Ilaija mi si wahn rong bred pahn sohn hat stoan an ih aalso si wahn waata jog. Soh ih eet ahn jrink an ih gaahn bak gaahn sleep. Di aynjel wayk ahn op agen ahn tel ahn: ‘Eet. Yu need schrent fi di lang jerni heda yu.ʼ Soh Ilaija mi eet sohn moa. Den hihn mi chravl fi 40 dayz ahn 40 naits, til ih reech Mongt Hoareb. Wail ih mi dehdeh, ih gaan eena wahn kayv fi sleep. Bot Jehoava mi taak tu ahn, an seh: ‘Weh yu di du ya, Ilaija?ʼ Ilaija ansa ahn: ‘Di Izrelaits brok dehn pramis tu yoo. Dehn brok dong yu alta dehn ahn kil aala yu prafit dehn. Ahn now dehn di luk fi kil mee tu.ʼ

Jehoava mi tel ahn: ‘Goh stan op pahn di mongtin.ʼ Fers, wahn schrang breez mi bloa paas di kayv. Afta dat, dehn mi ga wahn ertkwayk ahn den wahn faiya. Afta di faiya, Ilaija mi hyaa wahn kaam, loa vais. Soh ih kova ih fays wid ih kloaz ahn gaahn stan op da di enchrans a di kayv. Den Jehoava aks ahn wai ih ron weh. Ilaija tel ahn: ‘Ai da di onli wan weh lef.ʼ Bot Jehoava tel ahn: ‘Yu noh deh bai yuself. Dehn ga 7,000 peepl da Izrel weh stil di wership mi. Goh an apoint Ilaisha az wahn prafit afta yoo.ʼ Kwik-wan, Ilaija gaahn du weh Jehoava tel ahn fi du. How bowt yoo? Yu tink Jehoava wahn aalso help yu wen yu du weh hihn waahn yu du? Yes, fi shoar hihn wahn help yu! Now mek wi goh bak ahn fain owt weh mi hapm joorin di jrowt.