Jehoyada Mi Ga Korij

Jezibel mi ga wahn daata weh naym Atalaiya, shee mi wikid jos laik ih ma. Atalaiya mi marid tu di king a Jooda. Wen fi shee hozban mi ded, ih son staat tu rool. Bot wen fi shee son mi ded, Atalaiya mi staat tu rool Jooda. Fi mek nobadi tek weh ih roolaship, shee mi chrai kil evribadi fahn di raiyal famili lain. Shee mi eevn kil ih oan granson dehn. Dat da wai evribadi mi frayd fi shee.

Hai Prees Jehoyada an ih waif, Jehoshiba, mi noa dat weh Atalaiya mi-di du mi veri bad. Soh dehn mi ris dehn laif fi haid wan a Atalaiya granson, wahn baybi weh naym Jehoawash. Dehn rayz Jehoawash da di templ.

Wen Jehoawash mi sevn yaaz oal, Jehoyada mi sen fi di aami cheef dehn ahn di Leevait dehn an ih tel dehn: ‘Gyaad di doa dehn a di templ, ahn noh mek nobadi kom een.ʼ Den Jehoyada mek Jehoawash di king a Jooda an ih put wahn krong pan ih hed. Den di peepl mi hala: ‘Wi hoap di king liv fareva!ʼ

Wen Kween Atalaiya mi hyaa di krowd di showt, shee ron tu di templ. Wen shee mi si di nyoo king, ih hala owt: “Unu bichray mi! Aala unu da loan chraytaz!” Di aami cheef dehn grab ahn, kehr ahn weh, ahn kil ahn. Bot weh mi wahn hapm sins shee da-mi wahn bad egzampl fi di nayshan?

Jehoyada mi help di nayshan fi mek wahn kovenant wid Jehoava. Dehn mi pramis fi wership onli Jehoava. Jehoyada mek dehn brok dong di templ a Bayal ahn dischrai aala di aidol intu peesiz. Hihn mi mek di prees ahn di Leevait dehn werk da Jehoava templ soh dat peepl ku goh wership Hihn deh agen. Hihn mi aalso put peepl fi gyaad di gayt dehn soh dat nobadi weh noh kleen ku goh een. Den Jehoyada ahn di aami cheef dehn kehr Jehoawash da di palis ahn put ahn pahn di chroan. Aala di peepl a Jooda mi rijais. Dehn kuda mi fainali serv Jehoava. Dehn mi free fahn wikid Atalaiya ahn fahn Bayal wership. Jehoyada mi ga korij, noh chroo? Yu noatis how dat mi help lata peepl?