Jeezas Chooz Saal

Saal da-mi wahn Roaman sitizn weh mi baan da Tarsos. Hihn da-mi wahn Farisee weh mi noa di Jooish Laa gud, an ih mi hayt Kristyanz. Hihn wuda jreg owt di man ahn wuman dehn fahn dehn hows ahn chroa dehn eena jayl. Hihn eevn mi stan op di wach wen wahn krowd a peepl stoan wahn disaipl naym Steeven til ih ded.

Bot Saal neva hapi onli di ares Kristyanz da Jeroosalem. Hihn aks di hai prees fi sen ahn da di siti a Damaskos soh dat ih ku ares di Kristyanz weh dehdeh. Az Saal mi-di reech kloas tu di siti, sodn-wan wahn brait lait flash rong ahn, an ih jrap dong. Ih hyaa wahn vais seh: ‘Saal, da wai yu di persikyoot mi?ʼ Saal aks: ‘Da hoo dat?ʼ Di vais seh: ‘Ai da Jeezas. Goh da Damaskos, ahn sohnbadi wahn tel yu weh yu need fi du.ʼ Da saym taim deh, Saal geh blain, soh sohnbadi mi haftu hoal ahn bai ih han ahn kehr ahn da di siti.

Dehn mi ga wahn faytful Kristyan weh mi naym Ananaiyas hoo da-mi fahn Damaskos. Jeezas mi tel ahn eena wahn vizhan: ‘Goh da di hows a Joodas da di schreet weh naym Schrayt, ahn luk fi Saal.ʼ Ananaiyas seh: ‘Laad, Ai noa aala di bad tingz weh da man du! Hihn di chroa yu disaipl dehn eena jayl!ʼ Bot Jeezas seh: ‘Goh wehpaat ih deh. Ah don chooz Saal fi preech di gud nyooz tu di nayshan dehn.ʼ

Soh Ananaiyas fain Saal an ih tel ahn: ‘Saal, mi brada, Jeezas sen mi fi mek yu ku si agen.ʼ Rait away, Saal kuda mi si agen. Hihn mi laan bowt Jeezas an ih mi ton wahn disaipl. Afta ih geh baptaiz, Saal staat tu preech eena di sinagag dehn, lang wid ada Kristyanz. Yoo ku imajin how shak di Jooz mi shak fi si Saal di teech peepl bowt Jeezas? Dehn seh: ‘Dis da noh di saym man weh yoostu ares Jeezas disaipl dehn?ʼ

Fi chree yaaz, Saal preech tu di peepl weh mi liv da Damaskos. Di Jooz mi hayt Saal ahn dehn mek planz fi kil ahn. Bot di bradaz fain owt weh dehn mi wahn du, soh dehn help ahn fi eskayp. Dehn mi loar ahn dong eena wahn baaskit fahn wahn windo eena di siti waal.

Wen Saal gaahn da Jeroosalem, ih mi chrai jain di bradaz weh liv deh. Bot dehn mi frayd fi ahn. Den wahn kain disaipl weh naym Baarnabas kehr Saal tu di apasl dehn an ih mi kanvins dehn dat Saal mi chaynj fi chroo. Saal mi ful op a zeel an ih mi staat preech di gud nyooz lang wid di kangrigayshan da Jeroosalem. Laytaraan, peepl mi geh fi noa ahn az Paal.