LESN 02
Di Baibl Gi Wi Hoap
Peepl aal oava di werl di feel sad ahn schres owt bikaaz a aal di prablemz weh dehn di goh chroo. Yoo eva gaahn chroo sohnting weh mek yu feel laik dat? Maybi yu di sofa bikaaz a wahn siknis er bikaaz sombadi weh yu lov ded. Yoo eva aks yuself, ‘Laif wahn eva geh beta?ʼ Di ansa weh kohn fahn di Baibl gi wi hoap.
1. How wi ku geh hoap fahn di Baibl?
Di Baibl noh onli tel wi wai di werl ful op a prablemz bot ih aalso gi wi gud nyooz wen ih tel wi dat dehndeh prablemz noh wahn laas fareva. Di pramis fahn di Baibl ku ‘gi yu wahn fyoocha ahn wahn hoap.ʼ (Reed Jeremiah 29:11, 12.) Ih ku aalso help yu fi deel wid yu evriday prablemz, fi ga wahn pazitiv atichood, ahn fi fain hapinis weh wahn laas fareva.
2. Weh kaina fyoocha di Baibl pramis wi?
Di Baibl pramis wi wahn fyoocha wen “nobadi noh wahn ded nohmoh, nobadi noh wahn feel saro ner payn nohmoh ner krai bikaaz a sadnis.” (Reed Revilayshan 21:4.) Lata peepl di sofa tudeh bikaaz dehn poa, dehn geh chreet eena wahn way weh noh fyaa, ahn dehn di fays siknis ahn det. Bot soon dehndeh tingz noh wahn egzis nohmoh. Di Baibl pramis wi dat wi wahn ku injai laif fareva eena Paradais pahn ert.
3. How yoo ku bee shoar dat di pramis dehn eena di Baibl wahn kohn chroo?
Lata peepl hoap fi mek gud tingz hapm, bot dehn noh shoar if weh dehn hoap fa wahn eva kohn chroo. Weh di Baibl pramis wi difrent fahn eni ada pramis. Wi wahn ku chros weh ih seh eevn moa wen wi “stodi di Skripchaz.” (Aks 17:11) Az yu stodi di Baibl, yu wahn ku disaid fi yuself if yu ku bileev weh ih seh bowt di fyoocha.
SAACH FI MOA
Stodi som a di tingz weh di Baibl pramis fi di fyoocha. Si how di hoap weh di Baibl gi wi help lata peepl tudeh.
4. Di Baibl pramis wi dat wi ku liv fareva widowt sofarin
Luk pahn dis lis a pramis weh deh eena di Baibl. Wich wanz yoo di luk faawod fi si kohn chroo, ahn wai?
Reed di skripchaz weh deh neks tu di pramis dehn eena di lis, ahn tink bowt dehnya too kweschan:
Yoo feel laik dehnya skripchaz gi yu hoap? Yoo tink yu famili ahn frenz ku benifit fahn dehnya skripchaz?
Imajin yuself di liv eena wahn werl wehpaat
NOBADI WAHN . . . |
EVRIBADI WAHN . . . |
|---|---|
|
|
|
|
|
|
|
|
|
|
5. Di hoap weh di Baibl gi wi ku mek wi laif beta
Lata peepl feel diskorij ahn som eevn beks bikaaz a aala di prablemz weh dehn si di hapm. Sohn peepl du aal kaina ting fi mek di werl wahn beta plays. Di Baibl pramis wi dat tingz wahn geh beta. Mek wi si how da hoap di help lata peepl rait now. Play di VEEDYO, ahn den diskos dehnya kweschan:
Weh kaina injostis mi-di bada Rafika?
Eevn doa injostis stil mi-di hapm, how di Baibl mi help Rafika?
Di hoap weh di Baibl gi wi fi di fyoocha ku help wi deel wid eni kaina prablem weh mek wi feel diskorij, an ih ku help wi liv wahn hapi laif now. Reed Proverbs 17:22 ahn Roamanz 12:12, ahn den diskos dehnya kweschan:
Yoo tink di hoap weh di Baibl gi wi ku reeli mek yu laif beta now? Wai yu seh dat?
WEH YU WUDA SEH IF SOHNBADI TEL YU: “Ih haad fi bileev weh di Baibl pramis fi di fyoocha.”
Wai ih impoatant fi mek yoo fain di ansa fi yuself?
WEH WI LAAN?
Di Baibl pramis wi wahn hapi fyoocha, ahn bikaaz a da hoap wi ku stil injai laif rait now.
Mek Wi Rivyoo:
Wai peepl need fi laan bowt Gaad pramis dehn?
Weh di Baibl pramis fi di fyoocha?
How di hoap fi wahn hapi fyoocha ku help yoo rait now?
FAIN OWT MOA
Laan moa bowt di powa a hoap.
“Hoap—Wehpaat Yu Ku Fain It?” Paat 2, 3, ahn 4 (Awayk!, Aypril 22, 2004)
Fain owt how di hoap fi di fyoocha ku help dehn wan weh di deel wid wahn bad siknis.
“Yu Tink di Baibl Ku Help Yu fi Deel Wid Wahn Bad Siknis?” (Web aatikl)
Wen yu wach di myoozik veedyo, imajin dat yoo ahn yu famili di injai di fyoocha Paradais weh di Baibl pramis.
Fain owt how sohnbadi weh mi waahn chaynj di werl mi laan di chroot bowt di fyoocha.
“Now, Ah Noh Feel Dat Da Mee fi Chaynj di Werl” (Di Wachtowa, Joolai 1, 2013)