Wen Yu Sik Reeli Bad

“Wen Ah mi fain owt dat Ah ga longz ahn koalan kyansa, da mi laik dehn mi gi mi wahn det sentens. Afta Ah get hoam fahn di dakta, Ah seh tu miself: ‘Okay Linda, dis da noh weh yu mi ekspek. Now yu haftu fain wahn way how fi deel wid di sichuwayshan.ʼ”—Linda, ayj 71.

“Ai sofa fahn wahn veri paynful dizeez weh afek di nervz pahn di lef said a mi fays. Sohntaim, Ah ga soh moch payn dat Ah feel laik da onli mee wan di goh chroo dis kaina sofarin. Ah geh dipres an eevn tink fi kil miself.”—Elise, ayj 49.

Wahn man weh sik deh eena wahn weelchyaa ahn ih ga peepl weh ih lov rong ahn

IF YOO er sombadi weh yu lov eva geh fi fain owt dat yu ga wahn dizeez weh ku kil yu, den yoo noa how terabl dis feelin ku bee. Pahn tap a dat, yu haftu deel wid ada difrent feelinz. Yu mait geh beks er geh anai kwik, er yu mait jos schres owt. Dehnya feelinz ku afek di persn weh sik er di wan weh di tek kyaa a di sik persn. Yu mait feel eevn moa schres er fyaa wen yu ga dakta vizit, wen yu ga prablem fi get er fi pay fi chreetment, er eevn wen yu di goh chroo di said ifeks a wahn medikayshan weh yu di tek. Di difrent feelinz weh kohn wid siknis da no joak.

Wehpaat wi ku fain help? Lata peepl fain dat di bes komfert kohn wen dehn poar owt deh haat tu Gaad eena pryaa ahn wen dehn reed komfertin skripchaz fahn di Baibl. Di lov ahn sopoat fahn dehn famili ahn frenz ku aalso help dehn.

HOW SOHN PEEPL DEEL WID SIKNIS

Rabert, weh 58 yaaz oal, seh: “Mek yu fayt eena Gaad help yu fi deel wid yu siknis. Hihn wahn help yu fi noh giv op. Pray tu Jehoava. Tel ahn how yu reeli feel. Bayg ahn fi hoali spirit. Aks ahn fi help yu bee pazitiv an inkorijin ahn fi stay kaam wid yu famili wail yu di goh chroo yu siknis.

“Ih meen wahn lat wen yu famili sopoat yu, wen dehn dehdeh fi yu. Evri day Ah wuda geh wahn foan kaal fahn dehn di aks mi how Ah di du. Frenz fahn aal oava wuda teks er kaal mi fi inkorij mi. Dehn reeli bil mi op ahn dehn mek Ah noh giv op.”

If yu di vizit wahn fren weh sik, chrai fi fala Linda advais, shee seh: “Di persn weh sik waahn liv wahn naamal laif, ih noh aalwayz waahn taak bowt ih siknis. Soh taak bowt ada tingz weh unu yoozhwali taak bowt.”

Wid di schrent ahn komfert weh wi get fahn Gaad ahn di Baibl ahn di sopoat wi geh fahn famili ahn frenz, ih mek sens fi kantinyu liv eevn wen wi sik reeli bad.

Sohn Baibl Vers Weh Ku Help Yu fi Koap

Ton tu Gaad fi help.

“Ah pray tu Jehoava an ih ansa mi. Hihn sayv mi fahn aala di tingz weh mek Ah feel frayd. Yoo hyaa wen wahn helples persn kaal owt tu yoo, Oa Jehoava.”—Saam 34:4, 6.

Linda, weh wi mi menshan erliya, seh: “Ah neva pray ahn seh: ‘Mek mi beta.ʼ Ai aalwayz seh: ‘Help mi fi bee schrang, ahn help mi fi bayr op chroo mi siknis.ʼ”

Geh schrent fahn Gaad Werd, di Baibl.

“Ahn nobadi wahn seh: ‘Ah sik.ʼ”—Isaiah 33:24.

Tink bowt weh Gaad pramis fi di fyoocha. Dis wahn gi yu hoap ahn di schrent fi noh giv op.

Luk fi sopoat fahn yu famili ahn frenz.

“Wahn chroo fren shoa lov aal di taim, ahn hihn da laik wahn breda weh dehdeh fi yu wen yu goh chroo haad taimz.”—Praverbz 17:17.

Elise, weh wi mi menshan erliya, seh: “Noh kip tu yuself, alow yu frenz fi help yu. Dehn mait ga taimz wen yu tink dat Gaad noh eevn di lisn tu yu, bot stil noh kip tu yuself.”