WEE KU GEH RID A HAYCHRID

1 | Chreet Evribadi Di Saym Way

Di Baibl Seh:

“Gaad chreet evribadi di saym way. Ahn hihn aksep enibadi weh fyaa Gaad ahn du weh rait, noh mata weh nayshan dehn kohn fram.”—AKS 10:34, 35.

Weh ih Meen?

Jehoavaa Gaad noh joj wi bays pahn wehpaat wi kohn fram, di kala a wi skin, er wi kolcha. Insteda dat, hihn foakos pahn weh moa impoatant—hoo wee pahn di eensaid. Di Baibl seh dat “man si weh deh rait fronta dehn aiy, bot Jehoava si weh deh eena di haat.”—1 Samuel 16:7.

Weh Yu Ku Du?

Eevn doa wi noh noa weh deh eena peepl haat, wee ku stil chrai kapi Gaad egzampl ahn chreet evribadi di saym way. Chrai yu bes fi si eech persn bays pahn hoo dehn insteda si dehn az sohnbadi weh da paat a wahn groop. If yu feel laik yu noh laik sohnbadi—maybi bikaaz dehn da fahn wahn difrent kolcha er dehn kohn fahn wahn difrent konchri—pray tu Gaad an aks ahn fi help yu geh rid a da feelin. (Psalm 139:23, 24) If yu aks Jehoava fi gi yu di schrent fi chreet evribadi di saym way, yu ku bee shoar dat hihn wahn lisn tu yu pryaa an ih wahn help yu.—1 Peeta 3:12.

a Jehoava da Gaad persnal naym.—Psalm 83:18.

“Ah mi neva eva spen taim wid wahn wait persn, wers yet goh eet da ih hows. Now Ai da paat a wahn big famili a bradaz ahn sistaz weh deh aal oava di werl weh lov eech ada.”—TITUS

Wahn Chroo-Laif Stoari—TITUS

Mi Geh Rid a Haychrid

Wahn man weh naym Titus mi reeli beks bowt sohn laa weh hihn tink neva fyaa tuwaadz peepl fahn wahn difrent rays. Bikaaz a dat, ih mi jain adaz weh mi vailent ahn weh mi feel di sayhn way how hihn mi feel. Titus seh dat ih mi ful a haychrid ahn dis mi mek hihn fi bee vailent. Hihn seh: “Wi wuda goh da sohn hotel ahn baar wehpaat dehn neva waahn blak peepl goh, jos fi staat wahn fait. If enibadi mi staat aagyu wid mi, weda da mi wahn man er uman, Ai da-mi aalwayz di fers wan fi staat wahn fait.”

Titus mi staat mek chaynjiz afta ih mi staat stodi di Baibl wid Jehoava Witnisiz. Wen ih mi reed di Baibl, ih mi help ahn fi tink eena wahn difrent way. Titus mi laan dat di Baibl pramis dat “nobadi noh wahn ded nohmoh, nobadi noh wahn feel saro ner payn nohmoh ner krai bikaaz a sadnis.” Da pramis mi reeli toch ih haat.—Revilayshan 21:3, 4.

At fers, Titus mi fain it haad fi geh rid a di haychrid weh mi deh eena ih haat. Hihn seh: “Ih mi reeli haad fi mek Ah chaynj di way Ah tink an ak.” Bot Aks 10:34, 35 mi help ahn. Hihn mi laan dat Gaad “chreet evribadi di saym way.”

Weh mi hapm afta dat? Titus seh: “Ai mi noa fi shoar dat di Witnisiz ga di chroot bikaaz a di lov weh dehn shoa tuwaadz wan anada ahn bikaaz dehn noh wori bowt peepl rays er di kala a dehn skin. Eevn bifoa Ah mi geh baptaiz az wahn Witnis, wahn wait brada fahn di kangrigayshan mi invait mi fi goh eet da ih hows. Ai kudn bileev it! Ah mi neva eva spen taim wid wahn wait persn, wers yet goh eet da ih hows. Now Ai da paat a wahn big famili a bradaz ahn sistaz weh deh aal oava di werl weh lov eech ada.”