WEE KU GEH RID A HAYCHRID

4 | Geh Rid A Haychrid Wid Gaad Help

Di Baibl Seh:

“Di froot weh di hoali spirit bayr eena peepl da lov, jai, pees, payshens, kainis, gudnis, fayt, wahn jentl haat, ahn self-kanchroal.”—GALAYSHANZ 5:22, 23.

Weh ih Meen?

Yu ku geh rid a haychrid wid Gaad help. Fi hihn hoali spirit ku help wi ga kwalitiz weh wi wuda neva ga pahn wi oan. Wee kyaahn geh rid a haychrid bai wiself, wi need fi pen pahn Gaad help. If wi du dat, wi wahn feel di saym way how di apasl Paal mi feel. Hihn seh: “Ah geh di schrent fi fays evriting bikaaz a di wan weh gi mi powa.” (Filipiyanz 4:13) Den wi wahn ku aalso seh: “Mai help kohn fahn Jehoava.”—Psalm 121:2.

Weh Yu Ku Du?

“Jehoava kompleetli chaynj mi. Ah yoostu bee wahn vailent man bot now Ai da wahn peesful persn.”—WALDO

Pray tu Jehoava fahn yu haat an aks ahn fi ih hoali spirit. (Look 11:13) Aks ahn fi mek ih help yu ga gud kwalitiz. Di Baibl ku help yu geh rid a haychrid fahn owta yu main ahn haat. Fi egzampl, yu ku stodi bowt kwalitiz laik lov, pees, payshens, ahn self-kanchroal. Luk fi wayz how yu ku werk fi ga dehndeh kwalitiz eena yu laif. Ahn chrai yu bes fi spen taim wid frenz weh di werk haad fi ga dehndeh kwalitiz tu. Frenz laik dehndeh ku ‘inkorij yu fi shoa lov ahn du gud werks.ʼ—Heebrooz 10:24.

Wahn Chroo-Laif Stoari—WALDO

Mi Geh Rid a Vailent Haychrid

Waldo mi ga wahn rof laif wen ih mi-di groa op, ahn dat mi mek ih ful a haychrid. Hihn seh: “Ah mi aalwayz deh eena fait wid jrog deelaz . . . Wahn taim, wahn nada gang mi pay sohnbadi fi kil mi. Di persn mi stab mi, bot Ah mi manij fi ron weh.”

Waldo waif mi staat tu stodi di Baibl wid Jehoava Witnisiz ahn hihn neva laik dat. Hihn seh: “Ai mi hayt di Witnisiz, ahn wahn lata taim Ah mi hala aata dehn ahn kos dehn owt. Bot dehn mi aalwayz rispan eena wahn kaam ahn peesful way.”

Afta wahn wail, Waldo mi staat stodi di Baibl tu. Hihn seh: “Ih neva eezi fi yooz weh Ah mi-di laan eena mi laif. Ai mi tink dat Ah kuda neva kanchroal mi vailent tempa.” Bot sohnting weh hihn mi laan fahn di Baibl mi chaynj ih laif.

Waldo seh: “Wan day, Alejandro, di brada weh mi stodi wid mi, aks mi fi reed Galayshanz 5:22, 23. . . . Alejandro mi eksplayn dat Ai kuda neva divelop dehndeh kwalitiz bai miself. Hihn mi seh dat da onli Gaad ku help mi wid fi hihn hoali spirit fi ga dehndeh kwalitiz. Da chroot mi help mi fi si dat Ai kud chaynj!”

Waldo mi pen pahn Gaad fi help, ahn dat mi help ahn fi geh rid a haychrid fahn eena ih main ahn haat. Hihn seh: “Mi famili ahn di frenz weh Ah yoostu ga kyaahn bileev humoch Ah chaynj. Jehoava kompleetli chaynj mi. Ah yoostu bee wahn vailent man bot now Ai da wahn peesful persn.”