STODI AATIKL 36
SANG 103 Shepadz—Wahn Gif Fahn Jehoava
“Kaal di Kangrigayshan Elda Dehn”
“Enibadi sik monks unu? Mek ih kaal di kangrigayshan elda dehn.”—JAY. 5:14.
WEH WI WAHN DISKOS?
Wai ih impoatant fi geh spirichwal help fahn di eldaz wen wi need it.
1. How Jehoava shoa dat ih kay bowt ih sheep?
JEHOAVA sheep preshos tu hihn. Hihn mi bai dehn wid Jeezas blod an ih put di eldaz eena di kangrigayshan fi luk afta dehn. (Aks 20:28) Gaad waahn di eldaz chreet fi hihn sheep eena wahn kain way. Di eldaz fala Jeezas dairekshan—dehn inkorij dehn bradaz ahn sistaz ahn help dehn fi stay faytful tu Jehoava.—Aiz. 32:1, 2.
2. Akaadn tu Ezekiel 34:15, 16, hoo Jehoava help?
2 Jehoava kay fi aala ih peepl, bot espeshali fi dehn wan weh di sofa. Som a dehn mait sofa bikaaz dehn mek mistayks, ahn Jehoava yooz di eldaz fi help dehn. (Reed Ezekiel 34:15, 16.) Bot hihn waahn help wi weneva wi need it. Ih waahn wi pray tu hihn an aks ahn fi help, an ih waahn wi aks di “shepad an teechaz” eena wi kangrigayshan fi help wi tu.—Ifee. 4:11, 12.
3. How aala wi ku benifit wen wi andastan how di eldaz ku help wi?
3 Eena dis aatikl, wi wahn laan moa bowt how Jehoava yooz di eldaz fi help enibadi hoofa fayt shayki. Wi wahn ansa dehnya kweschan: Wen wi shuda aks di eldaz fi help? Wai wi shuda aks dehn? Ahn how dehn ku help wi? Maybi rait now yu rilayshanship wid Jehoava schrang, ahn yu noh need help. Stilyet, dis aatikl wahn mek wi apreeshiayt di way how Jehoava yooz di eldaz fi help dehn wan weh need it, an ih wahn help wi fi noa weh fi du wen wee need help.
WEN WI SHUDA “KAAL DI KANGRIGAYSHAN ELDA DEHN”?
4. How wi noa dat Jaymz 5:14-16, 19, 20 di taak bowt sohnbadi weh sik eena wahn spirichwal way? (Koment pahn di picha dehn.)
4 Jaymz eksplayn how Jehoava yooz di eldaz fi help wi. Ih mi seh: “Enibadi sik monks unu? Mek ih kaal di kangrigayshan elda dehn.” (Reed Jaymz 5:14-16, 19, 20.) Wen Jaymz taak bowt sohnbadi weh sik, ih mi-di taak bowt sohnbadi weh need fi fiks bak ih rilayshanship wid Jehoava. How wi noa dat? Bikaaz ih seh dehn fi kaal di eldaz insteda kaal wahn dakta, an ih seh dat di persn wahn geh beta wen dehn geh fergivnis fi dehn sinz. If sohnbadi sik ahn dehn waahn geh beta, dehn haftu goh da dakta, tel ahn bowt how dehn feel, ahn den fala ih inschrokshanz. Wen wi sik eena wahn spirichwal way, wi need fi du sohnting simila. Wi need fi goh taak tu di eldaz, tel dehn bowt wi sichuwayshan, ahn fala di advais weh dehn gi wi fahn di Baibl.
Wen wi feel sik, wi goh da dakta. Wen wi fayt week, wi aks di eldaz fi help (Paragraaf 4)
5. How wi ku tel if wi rilayshanship wid Jehoava di geh week?
5 Eena Jaymz chapta 5, Jaymz inkorij wi fi taak tu di eldaz enitaim wi feel laik wi frenship wid Jehoava noh kloas laik bifoa. Bot ih wuda bee eevn beta if wi aks dehn fi help bifoa wi du eniting weh ku damij wi rilayshanship wid Jehoava! Wi need fi bee aanis wid wiself. Di Baibl seh wi ku fool wiself ahn tink dat evriting gud wen, reeli, wi need spirichwal help. (Jay. 1:22) Dat da weh mi hapm tu som a di Kristyanz da Sardis, bot Jeezas mi waan dehn dat Jehoava neva pleez wid dehn. (Rev. 3:1, 2) Wan way how wi ku chek wi spirichwal kandishan da if wi tink bowt how wi mi feel bowt Jehoava wen wi mi geh baptaiz ahn kompyaa dat tu how wi feel bowt ahn now. (Rev. 2:4, 5) Wi ku aks wiself: ‘Ah stil laik reed di Baibl az moch az Ah yoostu? Ah stil laik tek taim fi tink bowt weh Ah reed? Ah stil goh da aala di meetin dehn? Wen Ah goh da meetin, Ah pripyaa aal di taim? Ah stil lov di minischri laik Ah yoostu, er Ah wuda rada du sohnting els? Ah tink moa bowt moni dan Ah yoostu?ʼ Dipendin pahn how yu ansa dehndeh kweschanz, ih ku meen dat yu rilayshanship wid Jehoava noh schrang laik bifoa, ahn dat wahn praabli geh wers if yu noh du sohnting bowt it. If wi kyaahn schrentn wi rilayshanship wid Jehoava pahn wi oan, er if wi don du sohnting weh noh pleez Jehoava, den wi shuda aks di eldaz fi help.
6. Weh wi shuda du if wi komit wahn seeryos sin?
6 Dehn ga sohn sin weh soh seeryos dat if sohnbadi du dehn, di eldaz wuda haftu tek dehn owt fahn di kangrigayshan if dehn noh ripent. If wi komit da kaina sin, wi need fi taak tu di eldaz. (1 Kor. 5:11-13) Enibadi weh komit wahn seeryos sin kyaahn fiks bak ih rilayshanship wid Jehoava pahn ih oan. Jehoava wahn onli fergiv wi if wi reeli ripent fi weh wi du. Soh wi need fi “du tingz weh shoa dat [wi] ripent.” (Aks 26:20) If wi komit wahn seeryos sin, wan ting wi ku du fi shoa dat wi ripent da fi goh taak tu di eldaz.
7. Hoo els shuda aks di eldaz fi help?
7 Sohntaim, sohnbadi mait feel week bikaaz dehn di schrogl fi fait di dizaiya fi du sohnting weh rang. Di eldaz dehdeh fi help peepl laik dat tu. (Aks 20:35) If yu mi deh pahn jrogz, wach poarnografi, er liv wahn loos laif bifoa yu mi ton Kristyan, yu mait fain it ekschra haad fi noh giv een tu di temtayshan fi du dehndeh kaina ting. Bot yu noh haftu feel laik yu di fait dehndeh tingz pahn yu oan. Yu ku taak tu wahn elda weh wahn lisn gud tu weh yu ga fi seh. Hihn wahn tel yu weh chaynjiz yu need fi mek soh dat yu ku kip di fait ahn noh giv een, an ih wahn rimain yu dat Jehoava wahn bee hapi wid yu if yu kip di fait dehndeh dizaiyaz. (Ikl. 4:12) If yu feel diskorij bikaaz yu stil ga di dizaiya fi du weh rang, di eldaz wahn rimain yu dat Jehoava hapi dat yu di aks fi help. Dat shoa dat yu hombl, dat yu kay bowt Jehoava, ahn dat yu waahn mek ahn hapi.—1 Kor. 10:12.
8. Wi need fi taak tu di eldaz bowt evri mistayk weh wi mek? Pleez eksplayn yu ansa.
8 Wi noh need fi goh tel di eldaz bowt evri lee mistayk weh wi mek. Fi egzampl, sopoaz yu looz yu tempa wid wan a yu bradaz er sistaz er yu seh sohnting weh hert dehn. Insteda goh taak tu wahn elda, chrai fala Jeezas advais. Goh tel yu brada er sista dat yu sari ahn chrai mek pees wid dehn. (Mach. 5:23, 24) Yu ku du risaach pahn how fi bee moa payshent, how fi shoa moa self-kanchroal, ahn how fi bee jentl wid peepl. Af koars, if yu du aala dat ahn yu stil kyaahn fiks di sichuwayshan, yu ku aks wahn elda fi help. Wen Yoadya ahn Sintiki mi kyaahn fiks wahn prablem weh dehn mi gat wid eech ada, Paal mi aks wahn brada eena fi dehn kangrigayshan fi help dehn owt. Wahn elda eena fi yoo kangrigayshan mait ku help yu eena di saym way.—Fil. 4:2, 3.
WAI WI SHUDA KAAL DI ELDAZ?
9. Wai wi noh fi feel shaym fi aks di eldaz fi help? (Praverbz 28:13)
9 Wi need fayt ahn korij fi aks fi help wen wi komit wahn seeryos sin er wen wi feel laik wi kyaahn kip di fait wahn rang dizaiya. Noh feel shaym fi aks di eldaz fi help. Wai? Bikaaz Jehoava put di eldaz deh fi help wi stay kloas tu ahn. Soh wen wi taak tu di eldaz, wi shoa dat wi chros Jehoava ahn dat wi waahn obay ahn. Wi rekonaiz dat wi need fi hihn help fi kip di du weh rait. (Saa. 94:18) An if wi mi did komit wahn sin, wi ku bee shoar dat Jehoava wahn fergiv wi if wi tel di eldaz weh wi du ahn mek shoar wi noh du it agen.—Reed Praverbz 28:13.
10. Weh ku hapm if wi chrai haid wi sinz?
10 Wen wi taak tu di eldaz bowt di sinz weh wi du, Jehoava ku fergiv wi ahn wi ku ga wahn gud rilayshanship wid ahn agen. Bot if wi noh tel di eldaz weh wi du, den wi wahn sofa eevn moa. Dat da weh mi hapm tu King Dayvid wen hihn neva tel nobadi bowt ih sinz. Ih mi feel dipres an ih mi feel sik, bikaaz ih mi noa dat ih damij ih rilayshanship wid Jehoava. (Saa. 32:3-5) Wen wi sik er wi geh hert, di langa wi wayt fi geh help, di wers ih wahn get. Rait soh, if wi komit wahn seeryos sin ahn wi noh aks di eldaz fi help, Jehoava noh wahn waahn bee wi fren agen. Hihn noh waahn dat hapm, soh ih tel wi fi taak tu di eldaz weh hihn yooz fi help wi soh dat wi ku bee ih fren agen.—Aiz. 1:5, 6, 18.
11. Wat els ku hapm if wi noh tel di eldaz bowt wahn seeryos sin?
11 If wi du wahn seeryos sin ahn wi noh tel di eldaz bowt it, ada peepl ku sofa tu. Wi mait mek Jehoava hoal bak som a ih hoali spirit fahn di kangrigayshan ahn wi ku disterb di pees weh wi bradaz ahn sistaz injai. (Ifee. 4:30) Soh den, if wi fain owt sohnbadi els eena di kangrigayshan komit wahn seeryos sin, wi shuda inkorij dehn fi goh taak tu di eldaz bowt weh dehn du.a If dehn noh waahn taak op, den wee shuda goh tel di eldaz. If wi noh tel di eldaz bowt it, den wee wahn di sin gens Jehoava tu. (Lev. 5:1) Bikaaz wi lov Jehoava, wi tel di eldaz if sohnbadi komit wahn seeryos sin. Eena da way deh, wi wahn help kip di kangrigayshan kleen ahn wi wahn help di persn weh sin fi fiks bak ih rilayshanship wid Jehoava.
HOW DI ELDAZ WAHN HELP WI?
12. How di eldaz ku help dehn wan weh week?
12 Di Baibl tel di eldaz fi help peepl weh week. (1 Tes. 5:14) If yu komit wahn sin, di eldaz mait aks yu kweschanz soh dat dehn ku andastan weh yu tink ahn how yu feel. (Prav. 20:5) Yu mait fain it haad fi taak tu dehn, maybi bikaaz yu feel shai er yu feel shaym fi taak bowt weh mi hapm. Bot ih wahn eeziya fi mek dehn help yu if yu tel dehn egzakli weh yu di deel wid. Soh noh wori dat yu mait seh sohnting rang er dat dehn wahn tink yu di “taak loan krayzinis.” (Joab 6:3) Di eldaz noh wahn bee kwik fi joj weh yu seh. Rada, dehn wahn lisn gud tu weh yu ga fi seh soh dat dehn ku andastan yu sichuwayshan az bes dehn kud bifoa dehn gi yu advais fahn di Baibl. (Prav. 18:13) Dehn noa dat ih ku tek taim fi gi sohnbadi di help weh dehn need, soh dehn wahn andastan if yu mait need fi taak wid dehn moa dan wan taim fi geh di help weh yoo need.
13. Wen di eldaz pray fi yu ahn gi yu advais fahn di Baibl, how dat ku help yu? (Koment pahn di picha dehn.)
13 Di eldaz noh waahn mek yu feel wers bowt weh yu mi du. Soh dehn wahn pray fi yu. Jehoava wahn lisn tu dehn pryaaz, ahn “dat powaful an ih ku reeli help peepl.” Dat ku help yu moa dan yu mait tink. Ahn dehn wahn “poar ail pan [yu] eena di naym a Jehoava.” (Jay. 5:14-16) Da “ail” da di chroot fahn di Baibl. Soh di eldaz wahn shayr skripchaz weh ku komfert yu ahn help yu bil bak yu rilayshanship wid Jehoava. (Aiz. 57:18) Di advais weh dehn gi yu fahn di Baibl ku gi yu di schrent weh yu need fi kip di du weh rait. Jehoava wahn yooz di eldaz fi gaid yu ahn help yu noa wat da di rait ting fi du.—Aiz. 30:21.
Di eldaz wahn yooz di Baibl fi komfert wi an inkorij wi (Paragraaf 13-14)
14. Akaadn tu Galayshanz 6:1, how di eldaz ku help sohnbadi weh “di goh di rang way”? (Koment pahn di picha dehn.)
14 Reed Galayshanz 6:1. Wahn Kristyan weh “di goh di rang way” di schray weh fahn Jehoava raichos standadz. Ih ku bee dat ih mek wahn bad disizhan er ih komit wahn seeryos sin. Di eldaz lov dehn brada er sista, soh dehn wahn chrai “help ahn get bak pahn di rait chrak, ahn du it wid wahn jentl spirit.” Di Greek werd weh chranslayt az “help ahn get bak pahn di rait chrak” da wahn werd weh dehn yoostu yooz fi diskraib how yu wuda set wahn boan weh brok soh dat ih ku heel prapali. Wahn gud dakta wuda du dat eena wahn jentl way soh dat ih noh hert ih payshent eevn wers. Wen di eldaz chrai help sohnbadi weh di goh di rang way, dehn noh waahn mek dehn brada er sista feel eevn wers. Dehn du dehn bes fi kongsl di persn eena wahn kain way. Di Baibl aalso tel dehn fi “bee kyaaful.” Wen di eldaz di help sohnbadi fi get bak pahn di rait chrak, dehn haftu memba dat dehn noh perfek ahn dehn mek mistayk tu. Soh dehn haftu bee kyaaful dat dehn noh staat tink dehn beta dan di persn weh dehn di chrai help. Insteda dat, dehn wahn bee hombl ahn shoa kompashan.—1 Peet. 3:8.
15. Weh wi ku du if wi ga wahn prablem?
15 Wi ku chros wi eldaz. Jehoava teech dehn dat dehn noh fi tel ada peepl bowt wi bizniz. Dehn laan fi giv advais bays pahn di Baibl ahn noh pahn weh dehn tink. Ahn dehn noa dat dehn need fi kip di help wi deel wid wi prablemz. (Prav. 11:13; Gal. 6:2) Aal di eldaz ga difrent kwalitiz ahn som a dehn da elda langa dan adaz, bot wi ku aks eni elda fi help wen wi need it. Af koars, wi noh waahn goh fahn elda tu elda di hoap dat wan a dehn wahn tel wi dat wi ku du wateva wi waahn. If wi wuda du dat, wi wuda bee laik peepl weh onli waahn yu tel dehn “weh dehn waahn hyaa” insteda di “gud teechin” fahn di Baibl. (2 Tim. 4:3) Wen wi goh tu wahn elda ahn tel ahn bowt wi prablem, ih mait aks wi if wi don taak tu eni ada elda bowt it ahn weh advais dehn mi gi wi. Ahn bikaaz ih hombl, ih mait aks wahn nada elda fi advais bifoa ih tel wi eniting.—Prav. 13:10.
WEH EECH WAN A WI NEED FI DU
16. Weh eech wan a wi need fi du?
16 Di eldaz wahn gi wi advais ahn help wi wen wi ga prablemz, bot dehn noh wahn tel wi weh fi du. Eech wan a wi need fi shoa Jehoava bai weh wi du ahn weh wi seh dat wi lov Jehoava ahn wi waahn pleez ahn. Ahn Jehoava wahn help wi fi mek gud disizhanz ahn stay faytful tu ahn. (Roam. 14:12) Dat da wai di eldaz noh wahn tel wi weh fi du. Insted, dehn wahn yooz di Baibl fi help wi andastan weh Jehoava tink pahn wahn mata ahn den lef di disizhan op tu wee. Wen wi fala di advais weh dehn gi wi, wi wahn laan fi tink moa laik Jehoava. Wi wahn ku chrayn wiself fi “tel di difrens bitween gud ahn bad” soh dat wi ku mek waiz disizhanz.—Heeb. 5:14.
17. Weh Jehoava waahn wi du?
17 Wi soh hapi fi bee Jehoava sheep! Jehoava sen “di chroo shepad,” Jeezas, fi pay di ransom fi wi soh dat wi ku liv fareva. (Jan 10:11) Ahn Jehoava yooz di eldaz eena di kangrigayshan fi mek fi hihn pramis kohn chroo. Hihn pramis wi: “Ah wahn gi unu shepadz hoo ga haat laik mai haat, ahn dehn wahn feed unu wid nalij an andastandin.” (Jer. 3:15) Wen wi spirichwali sik er week, noh frayd fi kaal di eldaz an aks fi help. Den wi wahn ku si fi wiself how Jehoava di yooz dehn fi help wi.
SANG 31 Waak Wid Gaad!
a If yu gi dehn nof taim fi goh taak tu di eldaz ahn dehn noh du it, den yoo need fi goh tel di eldaz bowt it, bikaaz yu waahn bee laayal tu Jehoava.