How Wi Ku Deel Wid Injostis

1-2. How peepl feel bowt injostis, ahn weh wi mait tink bowt?

WI LIV eena wahn werl weh ful a injostis. Peepl mait chreet yu bad bikaaz yu poa, bikaaz a weh yu kohn fram, weh yu luk laik, er ada reeznz. Lata peepl sofa bikaaz rich bizniz peepl ahn peepl eena di govament onli kay bowt mek moni fi dehnself. Dehnya kaina chreetment ku mek wee er sohnbadi weh wi lov sofa.

² Sayka dat, lata peepl geh beks, bikaaz evribadi wuda waahn liv eena wahn werl weh wi feel sayf ahn wi feel peepl chreet wi wid rispek. Bot wi noh ga dat. Ahn soh, sohn peepl chrai fiks di prablemz weh dehn si eena di werl er eena dehn konchri. Dehn wuda proates gens di govament, voat fi wahn politikal leeda er paati weh pramis fi mek tingz beta, er du ada tingz. Bot az Jeezas falowaz, wi “noh bilangz tu di werl” ahn wi chros dat Gaad Kingdom wahn deel wid it. (Jan 17:16) Wi mait stil feel diskorij er eevn geh beks wen dehn chreet sohnbadi eena wahn way weh noh fyaa. Wi mait eevn aks wiself: ‘Weh Ah shuda du wen dat hapm? Ai eevn ku du eniting bowt injostis rait now?ʼ Wi wahn ansa dehndeh kweschan eena dis aatikl, bot fers mek wi taak bowt how Jehoava ahn Jeezas feel bowt injostis.

JEHOAVA AHN JEEZAS HAYT INJOSTIS

3. Wai wi geh beks wen wi si injostis? (Aizaiya 5:7)

³ Di Baibl tel wi wai wi noh laik it wen peepl chreet wee er sohnbadi weh wi lov eena wahn way weh noh fyaa. Ih tel wi dat Jehoava mek wi fi bee laik hihn, ahn dat “hihn lov raichosnis ahn jostis.” (Saa. 33:5; Jen. 1:26) Jehoava neva chreet wi eena wahn bad way ahn hihn noh waahn wee chreet adaz laik dat needa! (Dyoo. 32:​3, 4; Mai. 6:8; Zech. 7:9) Fi egzampl, joorin di prafit Aizaiya taim, Jehoava mi hyaa ih “peepl mi-di krai sayka weh dehn mi-di sofa” bikaaz lata di Izrelait dehn mi-di chreet adaz eena wahn way weh noh fyaa. (Reed Aizaiya 5:7.)a Jehoava neva ways taim, bot ih mi deel wid dehn wan weh neva fala ih Laa ahn weh neva chreet adaz fyaa.—Aiz. 5:​5, 13.

4. How Jeezas feel bowt injostis? (Koment pahn di picha.)

⁴ Jos laik Jehoava, Jeezas lov jostis an ih hayt injostis. Wan taim Jeezas mi si wahn man wid wahn kripl han. Jeezas mi feel sari fi ahn, an ih help di man. Bot di rilijos leedaz neva hapi wid dat. Dehn mi seh dat Jeezas mi brok di laa a di Sabat, ahn dehn neva kay bowt di man weh mi sik. How Jeezas mi feel bowt di way dehn mi-di goh aan? “Ih mi hert ahn fi si how haad dehn haat mi haad.”—Maak 3:​1-6.

5. Wai wi noh fi hoal aan tu anga wen wi si injostis?

⁵ Jehoava ahn Jeezas geh beks wen peepl chreet adaz bad, soh ih noh rang if wee feel laik dat tu. (Ifee. 4:26 ahn di “Be wrathful” noat eena di Study Bible) Bot wi need fi kanchroal wi anga ahn memba dat wee kyaahn put wahn en tu sofarin. If wi stay beks fi lang, ih ku mek wi sik ahn mek wi feel diskorij. (Saa. 37:​1, 8; Jay. 1:20) Soh weh wi ku du wen peepl noh chreet wee er adaz eena wahn fyaa way? Wi ku laan wahn lat fahn Jeezas egzampl.

HOW JEEZAS MI HANDL INJOSTIS

6. How dehn mi chreet di kaman peepl wen Jeezas mi dehn pahn di ert? (Koment pahn di picha.)

⁶ Jeezas mi si wahn lata injostis wen ih mi deh pahn di ert. Di rilijos leedaz mi mek laif haad fi di kaman peepl. (Mach. 23:​2-4) Jeezas mi noa dat di Roaman roolaz mi chreet di peepl bad tu. Soh wahn lata di Jooz mi waahn bee free fahn di Roamanz. Som a dehn mi eevn mek op groops soh dat dehn kuda fait gens di Roaman govament. Bot Jeezas neva tek said wid eni a dehndeh groop. Wen hihn mi fain owt dat di peepl mi waahn foas ahn fi bee dehn king, ih lef fahn deh.—Jan 6:15.

7-8. Wai Jeezas neva chrai fiks aala di prablemz wen hihn mi deh pahn di ert? (Jan 18:36)

⁷ Wen Jeezas mi deh pahn di ert, hihn neva get intu palitiks ahn chrai help fiks di prablemz weh ih si. Jeezas mek da disizhan bikaaz hihn mi noa dat no hyooman ga di rait fi rool oava adaz. (Saa. 146:3; Jer. 10:23) Dehn kyaahn eevn fiks di mayn kaaz a di prablemz eena dis werl. Saytan di rool dis sistem, hihn wikid, ahn lata peepl eena di werl fala fi hihn egzampl. (Jan 8:44; Ifee. 2:2) An eevn gud peepl kyaahn fiks di prablemz, bikaaz dehn noh aalwayz du tingz eena wahn fyaa way.—Ikl. 7:20.

⁸ Jeezas noa dat onli Gaad Kingdom ku kompleetli fiks aala di prablemz eena di werl. Sayka dat, ih mi werk haad fi “preech di gud nyooz a Gaad Kingdom.” (Look 8:1) Ih mi komfert peepl weh mi “hongri fi raichosnis” ahn tel dehn dat koropshan an injostis wahn kohn tu wahn en. (Mach. 5:6 ahn di noat eena di Study Bible; Look 18:​7, 8) Bot no hyooman govament wahn du dat. Onli Gaad Kingdom ku mek dat hapm, ahn Gaad Kingdom “noh bilangz tu dis werl.”—Reed Jan 18:36.

KAPI WEH JEEZAS DU WEN IH MI SI INJOSTIS

9. Weh mek yoo bileev dat onli Gaad Kingdom wahn geh rid a aal injostis?

⁹ Tingz mi bad eena Jeezas dayz, bot dehn eevn wers now. Bot di wanz weh di kaaz sofarin eena “di laas dayz” da Saytan ahn di peepl weh kapi hihn. (2 Tim. 3:​1-5, 13; Rev. 12:12) Laik Jeezas, wee noa dat onli Gaad Kingdom wahn dischrai Saytan, weh da di mayn kaaz a wi prablemz, ahn geh rid a aal wikidnis. Bikaaz wi sopoat Gaad Kingdom, wi rifyooz fi bee paat a dis werl. Wi noh put wi chros eena eni hyooman govament fi fiks di prablemz, ner wi noh proates gens di govament needa. Wi ku laan fahn Sista Stacy egzampl.b Bifoa shee laan di chroot, shee yoostu jain proates weh mi-di fait fi jostis. Bot den shee mi staat tu dowt weh shee mi-di du. Shee seh: “Wen Ai yoostu proates, Ah yoostu wanda if Ah mi deh pahn di karek said. Now dat Ah sopoat Gaad Kingdom, Ai noa Ah deh pahn di karek said. Ai noa dat Jehoava wahn geh rid a aal sofarin ahn dat hihn wahn du it beta dan Ai eva kud.”—Saa. 72:​1, 4.

10. Akaadn tu Machyu 5:​43-48, wai wi noh chrai chaynj di govament er di laa? (Koment pahn di picha.)

¹⁰ Lata peepl tudeh jain groops soh dat dehn ku chaynj di govament. Bot wahn lata dehn geh soh beks dat dehn brok di laa an eevn hert peepl. Jeezas neva teech wi fi bee laik dat. (Ifee. 4:31) Wahn brada weh naym Jeffrey seh: “Ah noa dat wen peepl di proates, dehn ku geh beks kwik ahn dehn wahn staat brok op tingz an eevn hert adaz.” Jeezas, pahn di ada han, teech wi dat wi fi lov evribadi, eevn peepl weh noh gree wid wi er weh persikyoot wi. (Reed Machyu 5:​43-48.) Az Kristyanz, wi du wi bes fi kapi Jeezas egzampl.

11. Wai ih ku bee haad fi fala Jeezas egzampl?

¹¹ Wi noa dat Gaad Kingdom wahn kompleetli geh rid a injostis, bot wen peepl chreet wi bad wi ku fain it haad fi kapi Jeezas egzampl. Noatis how wahn sista weh naym Janiya mi feel wen sohn peepl chreet ahn bad bikaaz a ih skin kala. Shee seh: “Ah mi beks bad. Noh onli dat, Ah mi reeli sad tu an Ah mi waahn dehndeh peepl geh ponish fi weh dehn du. Den Ah tink bowt jain wahn groop weh proates gens prejudis. Ah mi tink dat if Ah du dat, ih wuda mek Ah feel beta.” Oava taim, Janiya mi riyalaiz dat shee mi need fi chaynj di way ih tink. Shee seh: “Ah riyalaiz dat insteda put mi chros eena Jehoava, Ah mi-di chros weh peepl seh. Soh Ah mek op mi main fi stap heng rong peepl weh mi deh eena da groop ahn fi noh ga notn fi du wid tingz laik dat agen.” Eevn doa wi mait geh beks wen peepl chreet wee er adaz weh wi lov bad, wi need fi kanchroal wi anga ahn du wi bes fi noh bee paat a di werl.—Jan 15:19.

12. Wai wi shuda bee kyaaful bowt weh wi reed, lisn tu, er wach?

¹² Weh ku help wi fi noh geh beks wen wi si injostis? Wan ting weh wi ku du da fi bee kyaaful bowt weh wi reed, lisn tu, er wach. Peepl put ting pahn soashal meedya weh shakin. Dehn eevn yooz soashal meedya fi komplayn bowt di govament. Wi kyaahn aalwayz chros di nyooz, bikaaz dehn onli wahn tel yu weh dehn waahn ahn noh di ful stoari. An eevn if dehn doo gi wi di ful stoari, wi kyaahn fiks di prablemz weh dehn ripoat pan eniway. Soh tu moch nyooz ku get wi beks ahn mek wi feel diskorij. (Prav. 24:10) Wi mait eevn stap put Gaad Kingdom fers eena wi laif, ahn wi mait eevn ferget dat onli Gaad Kingdom ku geh rid a injostis.

13. Wen wi reed di Baibl evri day, how dat help wi wen wi si injostis?

¹³ If wi reed di Baibl evri day ahn tink bowt weh wi reed, den wi wahn noa weh fi du wen wi di deel wid injostis. Wahn sista weh naym Alia mi feel reeli sad wen shee si how ada peepl mi-di chreet adaz eena wahn bad way. Shee mi beks bikaaz di peepl weh mi-di chreet adaz bad neva geh ponish far it. Shee seh: “Ah mi haftu sidong an aks miself, ‘Ai reeli chros dat Jehoava wahn akchwali fiks dehnya prablemz?ʼ Joorin da taim deh, Ah mi reed Joab 34:​22-29. Dehndeh vers help mi fi memba dat Jehoava si evriting. An onli hihn ku joj peepl eena wahn perfek way ahn fiks evriting fi evribadi.” Wail wi di wayt fi Gaad Kingdom fi fiks aal di prablemz, weh wi ku du now?

WEH WI KU DU NOW

14. Wat da wan ting wi ku du now? (Koloashanz 3:​10, 11)

¹⁴ Wi kyaahn chaynj di way peepl chreet adaz, bot wi waahn mek shoar wi chreet adaz eena wahn kain way. Laik weh wi don laan, wi kapi Jeezas egzampl wen wi shoa lov tu adaz. Soh wi chrai bes fi bee kain tu evribadi, eevn tu peepl weh persikyoot wee. (Mach. 7:12; Roam. 12:17) Jehoava hapi wen wi du wi bes fi chreet adaz eena wahn kain an lovin way.—Reed Koloashanz 3:​10, 11.

15. How wi help peepl wen wi teech dehn di chroot fahn di Baibl?

¹⁵ Di bes way fi deel wid injostis da fi teech peepl di chroot fahn di Baibl. Wi du dat bikaaz wen peepl laan bowt Jehoava ahn waahn pleez ahn, dehn mek chaynjiz ahn laan fi bee kain ahn shoa lov tu adaz. (Aiz. 11:​6, 7, 9) Bifoa Jemal mi laan di chroot, hihn mi jain wahn groop weh mi-di fait fi chaynj di govament eena ih konchri. Hihn seh: “Yu kyaahn fait peepl ahn foas dehn fi chaynj. Bot wen dehn laan di chroot fahn di Baibl, dehn ku chaynj. Ahn dat da how Ai mi chaynj.” Weh Jemal mi laan mi moov ahn fi stap fait. Soh den, wen wi teech peepl di chroot fahn di Baibl, wi wahn di help dehn stap du tingz weh hert adaz.

16. Wai yoo waahn tel peepl bowt weh Gaad Kingdom wahn du?

¹⁶ Jos laik Jeezas, wi eega fi preech tu peepl ahn tel dehn dat Gaad Kingdom wahn fiks aala di prablemz. Di hoap weh wi shayr ku inkorij peepl weh di sofa bikaaz ada peepl chreet dehn eena wahn bad way. (Jer. 29:11) Stacy, weh wi mi menshan erliya, seh: “Bikaaz Ah noa dat Jehoava wahn geh rid a sofarin, Ah ku stay kaam wen peepl chreet mee bad er wen Ah si how dehn chreet adaz bad. Jehoava gi wi komfert fahn di Baibl.” Wi need fi bee redi fi komfert adaz wid di pramis dehn fahn di Baibl. Di moa yu noa bowt weh di Baibl seh bowt sofarin, di moa yu wahn bileev dehnya teechinz.c Den, weda wi deh da skool er werk, wi wahn ku help peepl fi si wai wi sofa ahn weh Jehoava wahn du fi fiks aala di prablemz eena di werl.

17. How Jehoava help wi wen peepl chreet wi bad?

¹⁷ Az lang az Saytan da “di roola a dis werl,” wi wahn haftu deel wid injostis. Bot memba, Jehoava pramis fi help wi now ahn wi ku luk faawod tu wen tingz wahn geh beta bikaaz hihn wahn geh rid a Saytan an aal wikidnis. (Jan 12:31) Fi egzampl, di Baibl tel wi wai soh moch sofarin deh ahn dat Jehoava kay fi enibadi weh geh chreetid eena wahn way weh noh fyaa. (Saa. 34:​17-19) Fahn Jeezas egzampl, wi laan how wi shuda bihayv wen adaz chreet wi bad ahn dat soon Gaad Kingdom wahn geh rid a sofarin ahn nobadi wahn haftu sofa nohmoh. (2 Peet. 3:13) Mek wi du aal weh wi kud fi preech bowt Gaad Kingdom ahn fi kip di luk faawod tu wahn taim wen di ert wahn ful a “jostis ahn raichosnis.”—Aiz. 9:7.