How di Buk a Joab Ku Help Yu Wen Yu Di Sofa

1-2. Wai wi shuda reed di buk a Joab?

YOO reed di buk a Joab laytli? Eevn doa Moaziz mi rait di buk a Joab bowt 3,500 yaaz agoa, lata peepl stil tink da wan a di bes buk. Peepl seh dat ih rait it gud, bikaaz ih eezi fi andastan an ih byootiful ahn powaful. Moaziz mait bee di man weh rait di buk, bot da Jehoava Gaad tel ahn weh fi rait.—2 Tim. 3:16.

² Di buk a Joab da wahn impoatant paat a di Baibl. Wai? Ih help wi fi andastan dat aynjelz ahn peepl need fi chooz if dehn wahn serv Jehoava owta lov an if dehn wahn difen fi hihn naym. Ih teech wi bowt Jehoava wandaful kwalitiz, laik lov, wizdom, jostis, ahn powa. Fi egzampl, di buk a Joab kaal Jehoava “di Almaiti” 31 taimz. Dat da moa dan di res a buk eena di Baibl put tugeda. Ahn di buk a Joab eksplayn wai Gaad alow sofarin, an ih help wi fi ansa lata ada kweschanz weh peepl waahn noa di ansa fa.

3. Weh wi ku laan fahn di buk a Joab?

³ Wen yu reed di buk a Joab, da laik yu di klaim tap a wahn mongtin. Wen yu reech da tap, yu ku si evriting gud fahn op deh. Rait soh, di buk a Joab help wi fi si weh Jehoava tink bowt wi sofarin. Soh mek wi si weh wi ku laan fahn Joab, how di Izrelait dehn kuda mi benifit fahn Joab laif stoari, ahn how ih ku help wee tudeh. Den wi wahn si how wi ku yooz di buk a Joab fi help ada peepl.

GAAD ALOW JOAB FI SOFA

4. Weh mi mek Joab difrent fahn di Izrelait dehn da Eejip?

⁴ Joab mi liv da Oz rong di taim wen di Izrelait dehn da-mi slayv da Eejip. Oz mi praabli deh sohnweh eena di naadan paat a Araybya. Wen di Izrelaits mi deh da Eejip, som a dehn mi wership faals gaadz. Bot Joab mi serv Jehoava an ih mi faytful tu ahn. (Jash. 24:14; Ezek. 20:8) Jehoava mi seh: “Dehn noh ga nobadi laik hihn pahn di ert.”a (Joab 1:8) Joab mi rich rich ahn peepl mi rispek ahn moa dan enibadi els eena da paat a di werl. (Joab 1:3) How yu tink Saytan mosi mi feel fi si Joab soh faytful tu Jehoava? Hihn neva hapi wid dat ataal!

5. Wai Jehoava mi alow Joab fi sofa? (Joab 1:​20-22; 2:​9, 10)

⁵ Saytan mi seh dat if Joab sofa, ih mi wahn stap wership Jehoava. (Joab 1:​7-11; 2:​2-5) Jehoava mi lov Joab wahn lat, bot Jehoava mi alow Saytan fi chrai proov da weh ih mi seh da chroo. (Joab 1:​12-19; 2:​6-8) Soh Saytan gaahn tek weh aala Joab animalz, kil ih ten pikni, ahn mek Joab kech sohn terabl bail fahn di tap a ih hed tu di batam a ih fut. Bot eevn doa Saytan mi mek Joab sofa wahn lat, Joab mi stil kantinyu bee faytful tu Jehoava. (Reed Joab 1:​20-22; 2:​9, 10.) Laytaraan, Jehoava mi heel Joab, bles ahn wid moa richiz, ahn mek peepl rispek ahn agen. Ih mi gi Joab ten moa pikni, an ih mi eevn mek Joab liv fi wahn nada 140 yaaz. Joab mi geh fi si ih oan granchiljren ahn fi dehn granchiljren tu. (Joab 42:​10-13, 16) How Gaad peepl eena di paas kuda mi benifit fahn Joab laif stoari? Ahn how wee ku benifit fan it?

6. How di Izrelait dehn kuda mi benifit fahn Joab stoari? (Koment pahn di picha.)

⁶ How di Izrelait dehn kuda mi benifit. Joab stoari kuda mi help di Izrelait dehn weh mi sofa da Eejip. Fi egzampl, Jashwa ahn Kayleb da-mi slayv fi yaaz. Den dehn mi haftu liv fi 40 yaaz eena di wildanes bikaaz ada Izrelaits neva obay Jehoava. Laytaraan, Joab stoari kuda mi help di Izrelaits wen dehn luk bak pahn aal weh dehn mi gaahn chroo, bikaaz ih wuda help dehn fi andastan dat Saytan da di wan weh kaaz sofarin, noh Jehoava. Dehn mi wahn ku andastan wai Jehoava alow sofarin, dat Jehoava lov peepl weh stay faytful eevn anda chraiyal, ahn dat ih wahn bles dehn.

7-8. How di buk a Joab ku help wi wen wi di sofa? Yooz di egzampl eena di paragraaf.

⁷ How wee ku benifit. Lata peepl tudeh si bad tingz di hapm tu gud peepl, ahn dehn kyaahn andastan wai Gaad wuda alow dat. Sayka dat, lata dehn stap bileev eena Gaad er dehn bileev dat Gaad noh kay bowt peepl. Fi egzampl, Hazel,b fahn Rwanda, yoostu bileev eena Gaad wen shee mi smaal. Bot den tingz mi chaynj fi shee ahn lata bad tingz mi hapm tu ahn. Ih payrents mi geh divoas, ahn den ih ma marid weh nada man weh mi chreet Hazel bad. Wen shee da-mi wahn teenayja, wahn man mi rayp ahn. Hazel gaahn da cherch fi chrai fain wahn lee komfert, bot ih neva geh di help weh ih mi need. Layta, shee mi rait wahn leta tu Gaad ahn tel ahn: “Gaad, Ah mi pray tu yu, an Ah mi chrai du weh rait, bot yu mek Ah sofa. Soh now Ah wahn stap wership yu, an Ah wahn du wateva mek mee hapi.” Laik Hazel, lata peepl bileev tingz bowt Gaad weh da noh chroo, ahn dehn tink hihn da di wan weh mek dehn sofa. Wi feel bad fi dehn bikaaz dehn noh noa di chroot bowt Gaad, ahn wi waahn help dehn.

⁸ Di buk a Joab teech wi dat da noh Gaad mek wi sofa. Saytan rispansabl fi dat! Wi laan dat jos bikaaz sohnbadi di sofa, noh meenz da bikaaz dehn mi du sohnting rang. Di Baibl tel wi dat “tingz weh dehn noh ekspek ku hapm tu dehn enitaim.” (Ikl. 9:11; Joab 4:​1, 8) Ahn wi laan dat wen wi stay faytful tu Jehoava eevn wen wi di goh chroo haad taimz, wi help hihn fi proov dat Saytan laiyad. (Joab 2:3; Prav. 27:11) Wi tankful dat wi laan dehnya tingz fahn di Baibl bikaaz now wi noa di reel reezn wai gud peepl sofa. Wen Hazel mi stodi di Baibl wid Jehoava Witnisiz, ih laan dat da neva Gaad mek shee sofa. Shee seh: “Ah mi pray tu Gaad agen ahn tel ahn egzakli how Ah feel. Ah tel ahn dat wen Ah mi seh dat Ah wahn stap wership ahn, Ah neva reeli meen it. Ah onli mi seh dat bikaaz Ah neva noa ahn. Now Ah andastan dat Jehoava lov mi, an Ah onli hapi.” Wi soh graytful bikaaz wi andastan wai Jehoava alow peepl fi sofa! Now mek wi si how Joab egzampl ku help wi wen wee di sofa.

HOW JOAB EGZAMPL HELP WI FI NOH GIV OP

9. Weh Joab mi du wail ih mi-di sofa? (Jaymz 5:11)

⁹ Imajin aal weh Joab gaahn chroo. Ih mi kova wid bail an ih mi eena lata payn. Ih skin geh blak ahn peel aaf sayka ih siknis. Ih mi sidong pahn ashiz bai ihself. Ih mi geh soh maaga ahn week dat ih neva ga di schrent fi du moa dan skrach ihself wid wahn pees a brok op klay pat ahn komplayn bowt ih kandishan. Bot eevn wid aal weh Joab mi sofa, hihn neva giv op. (Reed Jaymz 5:11.) Weh mi help Joab fi noh giv op?

10. Weh kaina rilayshanship Joab mi gat wid Jehoava? Pleez eksplayn yu ansa.

¹⁰ Joab mi tel Jehoava how ih mi reeli feel. (Joab 10:​1, 2; 16:20) Fi egzampl, chapta 3 tel wi dat Joab mi komplayn bowt evriting weh mi hapm tu ahn. Hihn mi eevn tink dat Jehoava mi kaaz aala it. Den, Joab chree soa-kaal fren mi tel ahn dat Gaad mi-di ponish ahn, bot Joab stay mi-di tel dehn dat hihn mi faytful. Som a di tingz weh Joab mi seh shoa dat at lees fi wahn lee wail hihn mi tink dat hihn moa raichos dan Jehoava. (Joab 10:​1-3; 32:​1, 2; 35:​1, 2) Bot Joab ihself mi seh dat ih mi-di “taak loan krayzinis” kaaz ih mi-di chrai soh haad fi proov dat hihn mi faytful. (Joab 6:​3, 26) Eena chapta 31, Joab mi waahn mek Gaad seh dat ih neva dizerv fi geh ponish. (Joab 31:35) Bot Joab mi rang fi insis dat Gaad eksplayn wai ih mi-di sofa.

11. How Jehoava mi ansa Joab?

¹¹ Wi andastan now dat wen Joab mi taak tu Jehoava laik dat, da onli bikaaz ih mi ga wahn schrang rilayshanship wid Jehoava an ih mi chros dat Jehoava mi wahn joj ahn eena wahn fyaa way. Wen Jehoava mi ansa Joab fahn owta wahn schrang breez, ih neva did eksplayn wai Joab mi-di sofa. An eevn doa Joab mi komplayn wahn lat, Jehoava neva ponish ahn, ner Ih neva seh notn bowt aal di taimz wen Joab mi insis dat ih neva du notn rang. Insteda dat, laik wahn lovin pa, Jehoava mi teech Joab fi karek ih tinkin. Dat da-mi di bes way fi help Joab. Ahn sayka dat, Joab mi hombl ihself an admit dat ih neva noa er andastan evriting, an ih mi ripent fahn di tingz weh ih mi seh. (Joab 31:6; 40:​4, 5; 42:​1-6) How peepl eena di paas kuda mi benifit fahn Joab stoari, ahn how wee ku benifit fan it?

12. How Joab stoari kuda mi help di Izrelait dehn?

¹² How di Izrelait dehn kuda mi benifit. Di Izrelait dehn kuda mi laan fahn weh mi hapm tu Joab. Fi egzampl, Moaziz mi haftu deel wid lata tof sichuwayshan wen ih mi-di leed di Izrelait dehn. Lata taim dehn neva obay Jehoava ahn dehn let Moaziz dong. Di Izrelait dehn yoostu komplayn bowt Jehoava wen tingz mi geh rof, bot Moaziz yoostu pray an aks Jehoava fi help joorin dehndeh taimz. (Eks. 16:​6-8; Nom. 11:​10-14; 14:​1-4, 11; 16:​41, 49; 17:5) Joab egzampl kuda mi help Moaziz wen Jehoava mi karek ahn. Fi egzampl, lee bit bifoa di Izrelait dehn mi gaan eena di Pramis Lan, Moaziz mi geh beks wid dehn an ih “neva tink bowt weh ih mi-di seh.” (Saa. 106:​32, 33) Sayka dat, ih neva gi Jehoava di prayz weh hihn dizerv. Ahn soh Jehoava neva mek Moaziz gaan eena di Pramis Lan. (Dyoo. 32:​50-52) Dat mosi mi haad fi Moaziz, bot ih mi hombl an ih mi tek di disiplin weh Jehoava giv ahn. Joab stoari kuda mi help di Izrelait dehn fi deel wid di chraiyalz weh dehn mi wahn fays afta dehn gaan eena di Pramis Lan. If dehn mi tek taim fi tink bowt weh mi hapm wid Joab, dehn mi wahn laan fi tel Jehoava how dehn reeli feel. Joab stoari mi wahn help dehn fi memba dat dehn neva moa raichos dan Jehoava. Ahn dehn kuda mi laan fi bee hombl ahn lisn wen Jehoava disiplin dehn.

13. How di buk a Joab ku help wi fi bayr op? (Heebrooz 10:36)

¹³ How wee ku benifit. Wi liv joorin haad taimz, soh wi need help fi bayr op. (Reed Heebrooz 10:36.) Fi egzampl, som a wi di sofa bikaaz sohnbadi weh wi lov ded er wi di deel wid wahn fizikal er imoashanal helt prablem, wahn tof famili sichuwayshan, er sohn ada kaina seeryos prablem. Sohntaim, peepl mait du er seh sohnting weh mek tingz eevn haada fi wi. (Prav. 12:18) Bot di buk a Joab teech wi dat wi ku tel Jehoava how wi reeli feel deep dong eensaid, ahn wi ku chros dat ih wahn lisn tu wi. (1 Jan 5:14) Hihn noh wahn kandem wi if sohntaim wen wi pray wi seh wahn lee “krayzinis,” laik weh mi hapm wid Joab. Rada, Jehoava wahn gi wi di schrent ahn di wizdom weh wi need fi help wi fi noh giv op. (2 Kran. 16:9; Jay. 1:5) Hihn mait help karek wi tinkin, laik weh ih mi du wid Joab. Ih ku gi wi kongsl wen wi di reed di Baibl, wen wi reed di poblikayshanz, er wen wi di taak tu wahn elda er wahn gud fren. Joab egzampl teech wi dat wen Jehoava karek wi, wi need fi aksep it ahn bayr op. (Heeb. 12:​5-7) Jos laik how Joab mi benifit wen ih mi hombl ihself ahn tek Jehoava disiplin, rait soh wee wahn benifit if wi du di saym an alow Jehoava fi karek wi tinkin. (2 Kor. 13:11) Wi laan wahn lata gud tingz fahn Joab, noh chroo? Mek wi si how wi ku yooz di buk a Joab fi help ada peepl.

YOOZ DI BUK A JOAB FI HELP ADA PEEPL

14. How wi ku eksplayn wai peepl sofa?

¹⁴ Lata peepl waahn noa wai gud peepl sofa, ahn wi hapi fi shoa dehn di ansa eena di Baibl. Wi yoozhwali staat aaf di eksplayn weh di Baibl seh mi hapm eena di gyaadn da Eedn. Wi tel dehn dat Saytan da wahn wikid aynjel weh tel Eev wahn lai weh mek shee an Adam ton gens Gaad. (Jen. 3:​1-6) Den wi eksplayn dat bikaaz Adam ahn Eev disobay Gaad, peepl sofa ahn ded. (Roam. 5:12) Afta dat, wi tel dehn dat Gaad di mek sohn taim paas soh dat evribadi ku noa dat weh Saytan seh da noh chroo ahn fi mek evribadi hyaa di gud nyooz dat eena di fyoocha peepl wahn bee perfek agen. (Rev. 21:​3, 4) Dat da wahn gud way fi eksplayn it, an ih ku help lata peepl fi andastan wai wi sofa.

15. How wi ku yooz di buk a Joab fi eksplayn wai gud peepl sofa? (Koment pahn di picha dehn.)

¹⁵ Wahn nada way how wi ku eksplayn wai gud peepl sofa da fi tel dehn bowt Joab. Fers, yu ku tel dehn dat dehn aks wahn gud kweschan. Den yu ku tel dehn dat Joab da-mi wahn gud man weh mi waahn noa di ansa tu da saym kweschan. Hihn mi eevn tink dat eena sohn kaina way Gaad mi-di kaaz fi hihn sofarin. (Joab 7:​17-21) Di persn weh yu di taak tu mait bee impres dat fahn way bak peepl waahn noa wai wi sofa. Yu ku eksplayn tu dehn dat di buk a Joab help wi fi andastan dat da Saytan di Devl kaaz wi sofarin. Di Devl mi du dat bikaaz ih seh dat peepl onli serv Gaad fi weh Ih gi dehn, bot if dehn sofa dehn wahn stap serv Gaad. Yu ku tel dehn dat eevn doa Gaad neva kaaz Joab sofarin, ih mi alow it bikaaz ih chros dat sohn peepl faytful tu ahn fi di rait reezn ahn dat dehn noh selfish. Joab mi stay faytful eevn doa ih mi sofa wahn lat, ahn dat mi proov Saytan rang. Aftawodz, Gaad mi bles Joab eena wahn amayzin way. Ahn soh wen wi eksplayn aala dehnya tingz tu peepl, wi ku gi dehn komfert, bikaaz wi ku pramis dehn dat sofarin noh kohn fahn Jehoava.

16. How di buk a Joab ku help sohnbadi weh di sofa? Yooz di egzampl eena di paragraaf.

¹⁶ Mek wi taak bowt how di buk a Joab mi help wahn man naym Mario. Wahn day eena 2021, wahn sista mi-di du foan witnisin. Di fers persn ih mi taak tu da Mario, ahn shee mi reed wahn skripcha far ahn weh shoa dat Gaad du moa dan jos lisn tu wi pryaaz; ih pramis wi wandaful tingz fi di fyoocha tu. Wen shee mi aks Mario weh hihn tink bowt dat, hihn mi tel ahn dat ih jos mi-di rait wahn leta tu ih famili fi tel dehn dat ih lov dehn, ahn den ih mi wahn kil ihself. Hihn seh, “Ai bileev eena Gaad, bot jos dis maanin Ah mi-di wanda if hihn abandan mi.” Di sista mi kaal ahn wahn nada taim ahn dehn mi taak bowt Joab sofarin. Mario mi disaid dat ih mi haftu reed di hoal buk a Joab. Soh di sista mi sen ahn wahn link fi di Baibl pahn wi websait. Weh mi hapm afta dat? Mario mi staat stodi di Baibl an ih mi eksaitid fi laan moa bowt di lovin Gaad weh shoa kansaan far ahn.

17. Wai yoo tankful dat Jehoava put di buk a Joab eena di Baibl? (Joab 34:12)

¹⁷ Di Baibl ga di powa fi chaynj wi laif ahn fi komfert peepl weh di sofa. (Heeb. 4:12) Wi soh tankful dat Jehoava mek Moaziz rait dong Joab stoari eena di Baibl! (Joab 19:​23, 24) Di buk a Joab kanvins wi dat “Gaad noh du wikid tingz.” (Reed Joab 34:12.) Ih teech wi wai Gaad alow sofarin ahn how wi ku bayr op. An ih help wi fi komfert enibadi weh di sofa. Eena di neks aatikl, wi wahn taak bowt how di buk a Joab ku help wi fi gi gud kongsl.