How di Buk a Joab Ku Help Yu Wen Yu Gi Kongsl

1-2. Weh chalenj Joab chree soa-kaal frenz an Ilaihoo mi fays?

WEN Joab mi looz aala ih richiz, wahn lata peepl rong da ayrya mi hyaa bowt it. Wen Joab chree soa-kaal fren dehn—Elifaz, Bildad, ahn Zoafar—mi hyaa bowt weh hapm, dehn gaahn da Oz fi komfert ahn. Bot wen dehn reech deh, dehn mi shak; dehn neva ekspek tingz fi bee soh bad fi Joab.

² Joab mi looz evriting weh ih mi oan. Aala ih sheep, kyatl, kyamil, ahn dongki mi geh kil er sohnbadi mi teef dehn. Moas a ih servants mi ded. An aala ih pikni mi ded wen dehn hows mi jrap pahn dehn. Ahn Joab mi ga sohn terabl bail aal oava ih badi. Wen Elifaz, Bildad, ahn Zoafar si ahn fahn wahn distans, ih mi luk sad an ih mi-di sidong pahn ashiz. Fi hoal a sevn dayz dehn sidong pahn di grong wid ahn an neva tel ahn notn, bikaaz dehn kuda si dat ih mi deh eena lata payn. (Joab 2:​12, 13) Ahn den wahn yonga man weh naym Ilaihoo mi kohn si Joab an ih sidong wid dehn. Afta dat Joab staat tu taak an ih mi kers di day wen ih baan. (Joab 3:​1-3, 11) Joab mi need ih fren dehn help. Dehnya man mi ga di chaans fi inkorij Joab ahn shoa dat dehn kay bowt ahn. Weh dehn mi du?

3. Weh wi wahn taak bowt eena dis aatikl?

³ Jehoava mi mek Moaziz rait weh Joab soa-kaal fren an Ilaihoo mi seh ahn du. Som a weh Elifaz mi tel Joab da weh wahn deemon mi tel ahn. Bot Ilaihoo mi seh weh Jehoava mi waahn ih seh. (Joab 4:​12-16; 33:​24, 25) Dat da wai wi ku fain gud ahn bad advais eena di buk a Joab. Bot di buk a Joab ku help wi wen wi need fi gi kongsl. Fers, wi wahn taak bowt di bad egzampl weh Elifaz, Bildad, ahn Zoafar set. Den wi wahn taak bowt Ilaihoo gud egzampl. Wi wahn aalso laan how di Izrelaits kuda mi benifit fahn di buk a Joab ahn how wee ku benifit fan it tu.

HOW JOAB CHREE FREN MI KONGSL AHN

4. Wai Joab chree fren neva did komfert ahn? (Koment pahn di picha.)

⁴ Di Baibl seh dat Elifaz, Bildad, ahn Zoafar mi gaahn “komfert Joab ahn shoa dat dehn kay bowt ahn” bikaaz a aal di bad tingz weh mi hapm tu ahn. (Joab 2:11) Bot dehn neva help Joab feel eni beta. Dehn neva tek di taim fi lisn ahn chrai andastan Joab sichuwayshan. Dehn mi tink dat Joab mi-di geh ponish fi sohnting bad weh ih mi du.a (Joab 4:7; 11:14) Moas a weh dehn tel Joab song waiz, bot ih neva akchwali help ahn. (Joab 13:12) Dehn mi aalso tel Joab tingz weh mi hert ahn. Fi egzampl, too taimz Bildad mi tel Joab dat ih taak tu moch. (Joab 8:2; 18:2) Ahn Zoafar mi kompyaa Joab tu wahn “foolish persn.” (Joab 11:12) Eevn doa dehn neva hala aata ahn wen dehn mi-di taak tu ahn, di way how dehn taak mi mek hihn feel gilti ahn laik nobadi neva lov ahn. (Joab 15:​7-11) Aal dehn mi du da chrai proov dat Joab mi sin. Dehn neva did komfert ahn er inkorij ahn.

5. How Joab fren dehn mi mek ih feel?

⁵ Wen Elifaz, Bildad, ahn Zoafar mi kongsl Joab, dehn mi lef hihn di feel wers dan ih mi feel bifoa. (Joab 19:2) Di moa dehn mi-di akyooz ahn dat ih du sohnting bad, di moa hihn mi chrai difen ihself. Ahn dat da wai Joab mi en op di seh tingz weh ih neva fi seh. (Joab 6:​3, 26) Dehn neva mi-di tink laik how Jehoava tink ahn dehn neva chreet Joab wid kompashan. Sayka a dat, Saytan kuda mi yooz dehn fi diskorij Joab. (Joab 2:​4, 6) Soh how Joab stoari kuda mi help di Izrelaits, ahn how ih ku help wee tu?

6. Weh di eldaz da Izrel kuda mi laan fahn Joab stoari?

⁶ How di Izrelait dehn kuda mi benifit. Wen Jehoava mi giv di Izrelaits ih laa dehn, hihn mi chooz eldaz fi joj ih peepl ahn fi help dehn fala ih laa. (Dyoo. 1:​15-18; 27:1) Dehnya man mi need fi lisn gud bifoa dehn gi kongsl. (2 Kran. 19:6) Dehn mi need fi aks kweschan ahn fain owt weh reeli di goh aan. (Dyoo. 19:18) Dehn mi need fi taak een wahn kain way. Dis impoatant bikaaz dis mi wahn help di persn weh dehn di kongsl fi noh feel diskorij ahn fi seh how ih reeli feel. (Eks. 22:​22-24) Di eldaz da Izrel kuda mi laan wahn lat fahn Joab stoari.

7. Hoo aal kuda mi gi kongsl, ahn how dehn kuda mi benifit fahn Joab stoari? (Praverbz 27:9)

⁷ Di eldaz da Izrel da neva di onli wan hoo kuda mi gi kongsl. Enibadi, yong er oal, kuda mi aafa kongsl tu wahn fren fi help dehn jraa kloasa tu Jehoava er fi karek dehn if dehn du sohnting weh rang. (Saa. 141:5) Onli wahn chroo fren wuda gi kongsl laik dat. (Reed Praverbz 27:9.) Di bad egzampl a Joab chree fren kuda mi help di Izrelaits noa weh noh fi seh ahn weh noh fi du wen dehn di gi kongsl.

8. Weh wi noh waahn du wen wi di gi kongsl? (Koment pahn di picha dehn.)

⁸ How wee ku benifit. Wen wi bradaz ahn sistaz di goh chroo chraiyalz, wi waahn help dehn. Bot wi waahn bee kyaaful fi noh du weh Joab frenz mi du. Bifoa wi gi kongsl, wi noh waahn jomp tu kankloozhan, ahn wi waahn mek shoar wi noa aal di faks fers. Aalso, wen wi di gi kongsl, wi noh waahn bee laik Elifaz ahn gi wi oan opinyan. (Joab 4:8; 5:​3, 27) Insted, wi waahn mek shoar dat weh wi di seh kohn fahn Gaad Werd. Ahn wi waahn bee kyaaful fi noh seh tingz weh noh kain. Memba dat som a di tingz weh Elifaz, Bildad, ahn Zoafar mi seh da-mi chroo. Di apasl Paal mi eevn koat sohnting weh Elifaz mi seh. (Kompyaa Joab 5:13 wid 1 Korintyanz 3:19.) Bot moas a di taim weh dehn mi seh bowt Gaad da neva chroo, ahn lata di tingz weh dehn mi seh mi hert Joab, soh Jehoava joj dehn fi dat. (Joab 42:​7, 8) Wen wi gi kongsl, wi waahn mek shoar dat weh wi seh noh mek Jehoava luk laik ih noh reeznabl er laik ih kuda neva lov wi. Mek wi si weh wi ku laan fahn Ilaihoo egzampl.

HOW ILAIHOO MI KONGSL JOAB

9. Wai Joab mi stil need help afta ih frenz mi seh weh dehn ga fi seh, ahn how Jehoava mi help ahn?

⁹ Joab an ih frenz mi-di aagyu fi wahn lang taim. Dehn mi taak soh moch dat dehn ful op 28 chapta a di Baibl. Wahn lata di tingz weh dehn seh da-mi owta anga er foschrayshan. Afta aala dis, Joab mi stil need komfert ahn karekshan. How Jehoava help Joab? Hihn mi yooz Ilaihoo fi giv ahn kongsl. Bot wai Ilaihoo mi wayt til dehn stap aagyu? Hihn seh: “Ai yong, an unu oalda dan mee. Soh owta rispek Ah neva seh notn.” (Joab 32:​6, 7) Ilaihoo mi noa dat oalda wanz ga moa wizdom an ekspeeryens dan sombadi weh yonga. Soh hihn mi wayt til dehn stap aagyu, bot bai da taim hihn mi feel laik ih haftu seh sohnting. Hihn seh: “Jos bikaaz wahn persn oal dat noh meenz ih waiz, ahn da noh onli sohnbadi weh oalda noa weh rait.” (Joab 32:9) Weh Ilaihoo mi seh afta dat, ahn how ih mi seh it?

10. Weh Ilaihoo du bifoa ih mi kongsl Joab? (Joab 33:​6, 7)

¹⁰ Ilaihoo mi beks bad bikaaz a di tingz weh dehn mi-di seh. Bot hihn mi waahn mek Joab bee wilin fi lisn tu weh ih ga fi seh, soh hihn mi haftu kaam ihself dong bifoa ih mi taak tu Joab. (Joab 32:​2-5) Ahn bikaaz a dat, Ilaihoo kuda mi taak tu Joab eena wahn kain way. Fi egzampl, ih mi tel Joab: “Di chroo Gaad si mi di saym way ih si yu.” (Reed Joab 33:​6, 7.) Bifoa hihn mi kongsl Joab, hihn mi ripeet som a di mayn points Joab mi seh. Soh dat mi shoa dat hihn mi lisn tu weh Joab seh. (Joab 32:11; 33:​8-11) Ahn hihn mi du sohnting laik dis wahn nada taim wen ih mi kongsl Joab.—Joab 34:​5, 6, 9; 35:​1-4.

11. How Ilaihoo mi kongsl Joab? (Joab 33:1)

¹¹ Wen Ilaihoo mi kongsl Joab, hihn neva mek ih feel wertles. Insted hihn mi shoa ahn rispek. Fi egzampl, Ilaihoo mi kaal Joab bai ih naym. (Reed Joab 33:1.) Ih luk laik di ada chree man neva du dat. Aalso, Ilaihoo mi praabli memba dat hihn mi haftu wayt fi taak tu Joab wen hihn an ih fren dehn mi-di aagyu. Soh hihn mi giv Joab di chaans fi taak wail ih mi-di kongsl ahn. (Joab 32:4; 33:32) Ilaihoo mi shoa Joab wai som a di tingz weh hihn mi seh ahn du mi rang. Hihn mi rimain ahn a Jehoava wizdom, powa, jostis, ahn laayal lov. (Joab 36:​18, 21-26; 37:​23, 24) Ilaihoo gud kongsl mi praabli help Joab fi lisn tu moa kongsl weh kohn fahn Jehoava. (Joab 38:​1-3) How Ilaihoo egzampl kuda mi help di Izrelaits, ahn how ih ku help wi now?

12. How Jehoava mi yooz di prafit dehn fi help ih peepl, ahn how Ilaihoo egzampl kuda mi help dehn?

¹² How di Izrelait dehn kuda mi benifit. Jehoava mi yooz di prafit dehn fi teech ahn karek di Izrelaits. Fi egzampl, joorin di taim a di jojiz, Jehoava mi yooz Debora fi giv inschrokshanz tu ih peepl ahn hihn mi yooz Samwel fi teech ih peepl fahn wen hihn mi yong. (Joj. 4:​4-7; 5:7; 1 Sam. 3:​19, 20) Den joorin di taim a di kingz, Jehoava mi yooz moa dan wan prafit fi help di Izrelaits wership hihn di rait way. Ahn enitaim ih peepl wuda schray weh, hihn wuda sen wahn prafit fi karek dehn. (2 Sam. 12:​1-4; Aks 3:24) Ilaihoo egzampl ku teech peepl weh fi seh wen dehn gi kongsl ahn how fi seh it eena wahn kain way.

13. How wee ku inkorij wi bradaz ahn sistaz?

¹³ How wee ku benifit. Wee az Kristyanz preech di gud nyooz weh deh eena di Baibl. Wi komfert an inkorij wi bradaz ahn sistaz bai di tingz wi seh. (1 Kor. 14:3) Eldaz need fi memba dat dehn fi aalwayz taak tu dehn bradaz ahn sistaz eena wahn kain way, eevn dehn wan weh mait di sofa ahn “taak loan krayzinis.”—1 Tes. 5:14; Joab 6:3.

14-15. How eldaz ku bee laik Ilaihoo wen dehn di kongsl sombadi?

¹⁴ Sopoaz wahn elda fain owt dat wahn sista eena ih kangrigayshan feel dipres. Hihn ahn wahn nada brada wuda goh vizit ahn fi inkorij ahn. Wail dehn di taak, shee tel dehn how ih di feel. Eevn doa shee di goh da meetin ahn goh pahn servis, shee noh feel hapi. Weh di elda wahn du?

¹⁵ Hihn wahn chrai fain owt fers weh di mek shee feel da way. Ahn fi mek hihn du dat, ih wahn need fi lisn gud tu weh shee seh. Maybi shee feel laik ih noh gud inof er laik if Jehoava noh lov ahn. Er maybi shee di wori bowt tingz weh ih need. (Look 21:34) Di elda wahn chrai komen ahn fi di gud tingz weh ih di du. Fi egzampl, hihn ku komen ahn bikaaz shee stil di goh da meetin ahn pahn servis eevn if ih noh eezi fi mek ih du. Wans di elda andastan fi shee sichuwayshan ahn wai shee di feel da way, hihn wahn ku yooz di Baibl fi help ahn memba dat Jehoava lov ahn.—Gal. 2:20.

KANTINYU LAAN FAHN DI BUK A JOAB

16. How wi ku kantinyu laan fahn di buk a Joab?

¹⁶ Dehn ga wahn lata tingz weh wi ku laan fahn di buk a Joab! Eena di aatikl bifoa dis, wi mi laan dat di buk a Joab teech wi wai Gaad alow wi fi sofa ahn how wi ku bayr op. An eena dis aatikl, wi laan how aala wi ku gi gud kongsl laik Ilaihoo ahn how wi noh waahn bee laik Joab soa-kaal frenz. Maybi yu ku goh oava di lesn dehn fahn di buk a Joab bifoa yu gi kongsl tu sombadi. An if yu noh reed di byootiful buk a Joab laytli, mek it wahn goal fi reed it agen. Yu wahn praabli laan wahn lat moa fan it.