How Oalda Bradaz ahn Sistaz Ku Help di Kangrigayshan

Maybi yoo feel di saym way laik Sista Connie, laik yu kyaahn du az moch az weh yu yoostu du wen yu mi yonga. An eevn doa yu faytful tu Jehoava fi yaaz, wen yu kompyaa weh yu mi du fi Jehoava eena di paas wid weh yu di du far ahn now, yu mait feel diskorij. If yoo feel da way, weh ku help yu fi feel beta?

WEH JEHOAVA WAAHN YU DU

Aks yuself, ‘Weh Jehoava waahn Ah du?ʼ Maak 12:30 seh: “Yu fi lov Jehoava yu Gaad wid yu hoal haat ahn wid yu hoal soal ahn wid yu hoal main ahn wid yu hoal schrent.” Dat komfertin, noh chroo?

Akaadn tu da vers, aal weh Jehoava waahn yu du da serv ahn wid aala fi yoo haat, soal, main, ahn schrent. Dat ku help yu fi noh kompyaa weh yu du wid weh adaz du er wid weh yoo mi du wen yu mi yonga.

Tink bowt it laik dis: Wen yu mi yonga, weh yu mi gi Jehoava? Moas a wi wuda seh wi mi gi Jehoava wi bes. Fi yoo, dat meenz yu mi giv ahn yu bes akaadn tu weh yu kuda mi du bak den. Ahn weh yu di gi Jehoava now? Yu praabli di giv ahn yu bes akaadn tu weh yu ku du now. If yu tink bowt it laik dat, yu wahn si dat yu stil di gi Jehoava di saym ting yu mi giv ahn eena di paas. Yu mi giv ahn yu bes bak den, ahn yu di giv ahn yu bes now.

YU EKSPEERYENS KU HELP ADAZ

Insteda onli tink bowt weh yu kyaahn du nohmoh, tink bowt aal di wayz how yu ku help adaz. Now dat yu oalda, yu ku du sertn tingz weh yu mi kyaahn du wen yu mi yonga. Fi egzampl:

Yu ku shayr yu ekspeeryens wid adaz. Tink bowt weh King Dayvid ahn Jashwa mi seh:

King Dayvid: “Ah yoostu bee yong ahn now Ah oal, bot Ah neva si Gaad abandan enibadi weh raichos, an Ah neva yet si non a ih pikni di bayg fi bred.”—Saa. 37:25.

Jashwa: “Unu lisn ya! Ai wahn ded soon, an unu wel noa wid aal unu haat ahn wid aala unu soal dat owta aala di gud pramis dehn weh Jehoava unu Gaad mek, evri singl werd kohn chroo. Ih noh brok nat wan werd owta aala ih pramis dehn. Aala dehn kohn chroo fi unu.”—Jash. 23:14.

Dayvid ahn Jashwa mi serv Jehoava fi wahn lang taim ahn dehn mi si wahn lat eena dehn laif. Soh dehn mi-di taak fahn ekspeeryens. Maybi yu seh sohnting simila oava di yaaz, bot now dat yu ga yaaz a ekspeeryens, weh yu seh ga moa meenin tu.

Fi egzampl, yu ku taak bowt aal di blesinz weh yu get wen yu serv Jehoava. If yu ga wahn preshos memri er wahn inchrestin stoari weh shoa how Jehoava bles yu, noh kip it tu yuself. Yu praabli si aredi how dehndeh kaina stoari ku inkorij adaz. Soh shayr yu ekspeeryens wid adaz. Dat wahn help fi schrentn di fayt a yu bradaz ahn sistaz an inkorij dehn fi kantinyu serv Jehoava.—Roam. 1:​11, 12.

Wahn nada way how yu ku inkorij adaz da wen yu goh da meetin da di Kingdom Haal az moch az yu kud. Wen yu du dat, yu wahn inkorij yu bradaz ahn sistaz, ahn dehn wahn inkorij yoo tu. Sista Connie seh: “Wen Ah goh da meetin da di Kingdom Haal, dat help mi fi noh feel diskorij. Ah kyaahn feel sad wen Ah di geh aal da lov fahn mi bradaz ahn sistaz. Ah laik gi dehn sohn lee gif fi shoa dehn humoch Ah apreeshiayt dehn. An Ah chrai fi aalwayz du spirichwal tingz wid mi bradaz ahn sistaz soh dat wi ku inkorij wan anada.”

JEHOAVA TANKFUL FI AAL WEH YU DU FAR AHN

Di Baibl ful a egzamplz a peepl weh Jehoava mi lov eevn doa dehn kudn du weh dehn yoostu du. Tink bowt Simiyan, wahn oalda Izrelait man weh mi liv rong di taim wen Jeezas mi baan. Wen Simiyan yoostu goh da di templ, ih mi praabli si lata yonga man di du impoatant werk deh. Maybi Simiyan mi tink dat hihn noh soh yoosful tu Jehoava nohmoh bikaaz hihn mi kyaahn serv ahn laik dehndeh yonga man. Bot Jehoava neva tink da way. Jehoava mi si dat Simiyan “da-mi wahn raichos man, an ih mi fyaa Gaad,” ahn soh Jehoava mi gi Simiyan di privilij fi si Jeezas wen ih da-mi wahn baybi. Jehoava mi eevn yooz Simiyan fi prafesai dat Jeezas mi wahn bee di Mesaiya! (Look 2:​25-35) Jehoava neva foakos pahn Simiyan fizikal schrent. Insted, Ih mi si dat Simiyan mi ga schrang fayt, ahn dat “hoali spirit mi-di gaid hihn.”

Yu ku bee shoar dat Jehoava tankful fi aal weh yu du far ahn, eevn if yu kyaahn du moch. Jehoava “waahn peepl giv akaadn tu weh dehn ku afoad, noh weh dehn kyaahn afoad.”—2 Kor. 8:12.

Soh foakos pahn weh yu kud du. Fi egzampl, tink bowt difrent wayz how yu ku preech, eevn if da onli fi wahn shaat taim. Maybi yu ku kaal yu bradaz ahn sistaz fi inkorij dehn er yu ku sen dehn wahn lee kyaad. Dehnya kaina tingz ku inkorij yu bradaz ahn sistaz bikaaz dehn wahn si humoch yu lov dehn, ahn dehndeh tingz eevn moa inkorijin bikaaz dehn kohn fahn sohnbadi weh di serv Jehoava fi wahn lang taim.

Eevn if yu kyaahn du weh yu yoostu du, yu ku stil gi Jehoava yu bes ahn ga wahn gud shayr eena di minischri. Noatis wahn ekspeeryens fahn wahn sista eena wahn konchri da East Africa eena di baks weh naym “Di Baibl Sayv Ih Laif.”

Memba dat yu egzampl ku inkorij adaz wahn lat. Yu serv Jehoava fi yaaz, ahn yu kantinyu fi bee faytful tu ahn. Yu egzampl shoa yu bradaz ahn sistaz how yu ku serv Jehoava ahn neva giv op. Ahn yu ku bee shoar dat “Gaad da wahn raichos Gaad, ahn hihn noh wahn ferget di lov weh unu shoa fi ih naym. Hihn si how unu du unu bes fi help owt di hoali wan dehn ahn how unu kantinyu fi du dis, an ih noh wahn ferget dat.”—Heeb. 6:10.

STAY AZ BIZI AZ YU KUD

Risaach shoa dat lata oalda man ahn laydi weh help adaz, ga beta helt, tink moa klyaa, ahn liv langa.

Af koars, dat noh meenz dat if wi du gud tingz fi adaz wi noh wahn ga helt prablemz wen wi geh oalda. Onli Gaad Kingdom ku fiks da prablem wen ih geh rid a di reel kaaz a oal ayj ahn det, weh da di sinful kandishan weh wi inherit fahn Adam.—Roam. 5:12.

Bot yu ku stil du weh Jehoava aks yu fi du, inkloodin help peepl geh fi noa ahn. Dat wahn help yu kip yu hoap schrang an ih mait eevn help yu fi stay helti. Wi dyaa oalda bradaz ahn sistaz, pleez noa dat Jehoava tankful fi aal weh unu du far ahn, ahn dat unu da wahn preshos egzampl eena unu kangrigayshan.