Weh Yoo Ku Du fi Shoa dat Yu Tankful fi di Ransom?

1-2. Weh di ransom shuda moov wi fi du, ahn wai? (2 Korintyanz 5:​14, 15) (Koment pahn di picha.)

IF YOO mi chrap andaneeta wahn bildin weh mi jrap ahn sohnbadi sayv yu, how yu wuda feel bowt da persn? Yu wuda bee veri tankful, noh chroo? Yu wuda waahn tel dehn tanks ahn dat yu wahn neva ferget weh dehn du fi yu.

² Di laas aatikl mi shoa wi dat wi kyaahn sayv wiself fahn sin ahn det. Wi need sohnbadi fi sayv wi. Ahn bikaaz Jeezas lov peepl fahn way bak, hihn mi wilin fi giv op ih laif fi pay di ransom fi wi. (Prav. 8:​30, 31) Bikaaz a di ransom, (1) Jehoava ku fergiv wi fi wi sinz, (2) wi ga hoap fi bee perfek eena di fyoocha, ahn (3) wi ku bee gud frenz wid Jehoava. Sayka dat, wi ga hoap fi liv fareva eena di nyoo werl. Ih klyaa fi si dat Jeezas lov wi wahn lat. Di apasl Paal seh dat “di lov a di Krais moov wi fi du weh wi du.” (Reed 2 Korintyanz 5:​14, 15.) Dat meenz dat if wi tankful fi di ransom, ih wahn moov wi fi du sohnting fi shoa it, ahn wi noh wahn ferget weh Jeezas du fi wi.

3. Wai di way how yoo shoa apreeshiayshan fi di ransom mait bee difrent fahn how ada peepl shoa it?

³ Weh yoo wahn du fi shoa dat yu tankful fi di ransom? Di way yoo ansa da kweschan mait bee difrent fahn how sohnbadi els ansa it. Wai? Tink bowt it laik dis: Sopoaz chree peepl di chravl tu di saym plays, bot dehn di kohn fahn chree difrent tong. Eech wan a dehn wahn chravl wahn difrent way. Dis aatikl wahn help yu fi shoa yu apreeshiayshan fi di ransom, weda (1) yu di stodi di Baibl, (2) yu don baptaiz aredi, er (3) yu baptaiz bot yu stap serv Jehoava. Bikaaz eech sichuwayshan difrent, eech wan a unu wahn shoa unu apreeshiayshan fi di ransom eena difrent wayz. Mek wi si weh unu ku du fi shoa dat unu tankful fi di ransom.

IF YU DI STODI DI BAIBL

4. How Jehoava feel bowt peepl weh stodi di Baibl?

⁴ If yu di stodi di Baibl, dat meenz yu waahn laan di chroot bowt Jehoava ahn weh hihn teech wi eena di Baibl. Dat da bikaaz Jehoava di jraa yu tu ahn soh dat yu ku bee ih fren. (Jan 6:44; Aks 13:48) Di Baibl seh dat “Jehoava ku si weh reeli deh eena peepl haat.” Dat meenz Jehoava si aal weh yu du fi laan bowt ahn, an ih hapi dat yu di chaynj yu laif fi pleez ahn. (Prav. 17:3; 27:11) Di onli reezn wai yu ku ga da kaina rilayshanship wid Jehoava da bikaaz a di ransom. (Roam. 5:​10, 11) Neva ferget dat!

5. How wahn Baibl styoodent ku fala Paal kongsl da Filipiyanz 3:16?

⁵ If yu di stodi di Baibl, weh yu ku du fi shoa dat yu tankful fi di ransom? Wan ting weh yu ku du da fala di advais weh Paal mi gi di kangrigayshan da Filipai. Ih mi tel dehn: “Wateva proagres wi don mek, mek wi kantinyu eena di saym way a laif.” (Fil. 3:16) Laik weh Paal seh, wi noh waahn mek notn stap wi fahn mek spirichwal proagres. Du aal weh yu kud fi stay pahn di road weh leed tu evalastin laif.—Mach. 7:14; Look 9:62.

6. Weh wahn Baibl styoodent ku du if ih fain it haad fi mek chaynjiz? (Dyooteronomi 30:​11-14) (Koment pahn di picha.)

⁶ Sopoaz yu laan sohnting nyoo fahn di Baibl, bot yu fain it haad fi bileev. Weh yu ku du? Du sohn risaach pahn di tapik, an aks Jehoava fi help yu andastan it beta. (Saa. 86:11) If yu stil fain it haad fi bileev, chrai noh wori tu moch bowt it, bot noh stap stodi di Baibl. Yu wahn andastan it beta laytaraan. Wat if yu fain it haad fi stap du sohnting weh Jehoava noh laik? Memba dat Jehoava noh wahn aks yu fi du eniting weh tu haad fi yu. Yu kud liv di way Jehoava waahn yu liv. (Reed Dyooteronomi 30:​11-14.) Ahn Jehoava pramis fi help yu. (Aiz. 41:​10, 13; 1 Kor. 10:13) Soh noh giv op. Noh tink tu moch bowt di tingz weh haad fi aksep er fi giv op. Insteda dat, tink bowt aala di wandaful tingz weh Jehoava gi yu, inkloodin di ransom. Di moa yu du dat, di moa yu wahn lov Jehoava. Ahn di moa yu lov Jehoava, di moa yu wahn si dat “fi hihn komanment dehn noh haad fi obay.”—1 Jan 5:3.a

7. Weh yong bradaz ahn sistaz weh groa op eena di chroot ku tink bowt?

⁷ Wat if yu da wahn yong brada er sista weh di groa op eena di chroot? Yoo da wahn Baibl styoodent tu. In fak, yoo da yu payrents moas impoatant Baibl styoodent. Di Baibl seh dat if yu ‘kohn kloas tu Gaad, hihn wahn kohn kloas tu yoo.ʼ (Jay. 4:8; 1 Kran. 28:9) Soh wen yoo du tingz fi geh kloas tu Jehoava, hihn wahn du tingz fi bee yu kloas fren. Jehoava noh pay atenshan tu yu jos bikaaz yu famili deh eena di chroot. Hihn pay atenshan tu yu bikaaz ih waahn yoo bee fi hihn kloas fren. Weh Jehoava du fi mek yu ku bee fi hihn fren? Ih sen ih Son fi ded fi yu. Noh eva ferget dat. (Roam. 5:​1, 2) Soh bifoa yu goh da Memoaryal dis yaa, wai yu noh tek wahn lee taim fi tink bowt weh Jeezas sakrifais meen fi yoo? Den yu ku tink bowt how yu waahn liv yu laif ahn weh yu ku du fi shoa Jehoava ahn Jeezas dat yu tankful fi weh dehn du fi yu.b

IF YU DON BAPTAIZ AREDI

8. How sohnbadi weh baptaiz don shoa dat ih tankful fi di ransom?

⁸ If yu don baptaiz, yu don shoa yu fayt eena di ransom eena lata wayz. Fi egzampl, yu chaynj yu laif fi pleez Jehoava ahn fi bee frenz wid ahn. Yu obay Jeezas koman fi preech di gud nyooz tu peepl ahn teech dehn bowt Jehoava ahn Jeezas. Yu dedikayt yuself tu Jehoava ahn geh baptaiz. Maybi peepl persikyoot yu bikaaz yu serv Jehoava. (2 Tim. 3:12) Bot yu noh mek notn stap yu fahn serv Jehoava, ahn dat shoa dat yu lov Jehoava ahn dat yu tankful fi weh hihn an ih Son du fi yu.—Heeb. 12:​2, 3.

9. Weh sohnbadi weh don baptaiz need fi bee kyaaful bowt?

⁹ If yu baptaiz fi wahn lang taim aredi, yu haftu bee kyaaful. Az taim paas, yu mait staat tu ferget how preshos di ransom, ahn yu noh mait feel az tankful az wen yu mi fers laan bowt it. How sohnting laik dat ku hapm? Tink bowt how dat mi hapm tu di kangrigayshan da Efisos eena di fers senchri. Jeezas mi komen dehn bikaaz dehn mi-di bayr op anda lata presha. Bot den ih tel dehn: “Ah ga dis wan ting gens unu: unu noh di shoa di saym kaina lov laik weh unu mi ga fahn di biginin.” (Rev. 2:​3, 4) Dat meenz dat if wi noh kyaaful, wi mait en op di du spirichwal tingz onli owta habit ahn noh owta lov. Wi mait di pray, goh da meetin, ahn goh owt goh preech, bot maybi wi onli di du dehndeh tingz bikaaz wi noa wi sopoas tu. Weh yoo ku du if yu feel laik yu noh lov Jehoava az moch az yu yoostu?

10. How yu ku fala di kongsl weh Paal gi Timoti? (1 Timoti 4:​13, 15)

¹⁰ Wen di apasl Paal mi tel Timoti fi pay main tu how ih wership Jehoava, ih tel ahn: “Tek taim fi tink bowt dehnya tingz ahn kip aan di stodi dehn wid aala yu haat.” (Reed 1 Timoti 4:​13, 15.) Yu ku fala da kongsl wen yu chrai fi tink bowt difrent wayz how yu ku “mek Gaad spirit blayz op” eena yu. (Roam. 12:11; reed di “Be aglow with the spirit” noat eena di Study Bible.) Fi egzampl, maybi yu ku tek wahn lee moa taim fi pripyaa fi meetin. Dat wahn help yu fi pay atenshan ahn get moa owta it. Er maybi wen yu du yu persnal stodi, yu ku fain wahn kwaiyet spat weh yu ku tek taim fi tink bowt weh yu laan. Dat wahn help yu fi get moa owta yu persnal stodi. Spirichwal tingz laik dehnya wahn help yu fi aalwayz bee tankful fi evriting weh Jehoava gi yu, inkloodin di ransom. Bot yu need fi kip di du dehnya tingz, jos laik how yu need fi kip di put wud pahn wahn faiya fi mek ih stay di bon. Soh fi wahn fyoo weeks bifoa di Memoaryal, wai yu noh tek wahn lee taim fi tink bowt aala di speshal blesinz weh wi get bikaaz wi da Jehoava Witnisiz? Dat wahn help yu fi aalwayz apreeshiayt di ransom, weh mek it pasabl fi bee frenz wid Jehoava.

11-12. If yu noh feel az eega fi serv Jehoava az yu yoostu, yu tink dat meenz Jehoava stap gi yu hoali spirit? Pleez eksplayn yu ansa. (Koment pahn di picha.)

¹¹ If yoo feel laik yu noh az eega fi serv Jehoava az yu wuda waahn bee, noh feel diskorij ahn noh feel laik Jehoava noh di gi yu hoali spirit. Memba dat wen Paal mi rait ih leta tu di kangrigayshan da Korint, ih mi tel dehn dat eevn hihn neva aalwayz waahn preech. Bot ih mi tel dehn: “Eevn if Ah noh waahn du it, Gaad stil chros mi fi du dis werk.” (1 Kor. 9:17) Weh wi ku laan fahn fi hihn egzampl?

¹² Sohntaim Paal neva feel laik goh preech. Bot hihn neva mek dat stap ahn. Hihn mi kantinyu preech eevn wen ih neva feel laik it. Yoo ku mek op yu main fi goh preech tu, eevn wen yu noh feel laik it. Yu ku aks Jehoava fi gi yu “di dizaiya ahn di powa fi du weh hihn waahn.” (Fil. 2:13) Kip di du spirichwal tingz; dat wahn help yu fi stay kloas tu Jehoava. Yu ku bee shoar dat if yu kip di du dehndeh tingz, yu lov fi Jehoava wahn groa eevn moa ahn yu wahn feel eega fi preech agen.

13. How wi ku kip di chek wiself fi mek shoar wi di “hoal aan tait tu di fayt”?

¹³ Fahn taim tu taim, wi waahn tink bowt how wi di liv wi laif, jos laik weh Paal seh da 2 Korintyanz 13:5: “Unu mos kip di chek unuself fi noa if unu di hoal aan tait tu di fayt. Unu fi kip di proov tu unuself weh kaina peepl unu.” Evri now an agen, wi ku aks wiself kweschanz laik dehnya: ‘Ai di put di Kingdom fers eena mi laif?ʼ (Mach. 6:33) ‘Di tingz weh Ah wach, reed, er lisn tu shoa dat Ah hayt eniting weh bad?ʼ (Saa. 97:10) ‘Ai promoat pees ahn yooniti monks mi bradaz ahn sistaz?ʼ (Ifee. 4:​2, 3) Di Memoaryal da wahn gud taim fi tink bowt dehnya tingz. Wen wi tink bowt aal weh Jehoava ahn Jeezas du fi wi, wi wahn luk fi wayz fi shoa dat wi tankful ahn dat wi di liv fi di Krais ahn noh fi wiself.c

IF YU STAP SERV JEHOAVA

14. Wai som a wi bradaz ahn sistaz mait stap kohn da meetin?

¹⁴ Som a wi bradaz ahn sistaz stap kohn da meetin, eevn if dehn mi serv Jehoava fi yaaz. Som a dehn mait wori soh moch bowt weh dehn need fi liv dat dehn feel laik ih tu haad fi serv Jehoava. (Look 21:34) Maybi som a dehn geh ofendid bikaaz a sohnting weh sohnbadi eena di kangrigayshan du er seh. (Jay. 3:2) An ih ku bee dat adaz komit wahn seeryos sin ahn dehn shaym fi aks fi help. If yoo lef Jehoava, fi wateva reezn, weh yu ku du? Owta lov fi yoo, Jehoava provaid di ransom ahn Jeezas mi wilin fi pay it. Weh dat wahn moov yoo fi du?

15. How Jehoava shoa dat ih kay bowt peepl weh lef di kangrigayshan? (Ezekiel 34:​11, 12, 16)

¹⁵ Tink bowt how Jehoava feel bowt peepl weh lef di kangrigayshan. Hihn noh stay beks wid dehn, an ih noh ferget bowt dehn needa. Rada, ih saach fi dehn, ih feed dehn, an ih help dehn fi kohn bak tu ahn. (Reed Ezekiel 34:​11, 12, 16.) Yu tink Jehoava ku du dat fi yoo? Af koars! Yu di reed dis aatikl, ahn dat shoa dat yu stil lov Jehoava. Memba dat Jehoava mi jraa yu tu di kangrigayshan eena di fers plays bikaaz ih mi si di gud eena yu. Yu tink maybi now Jehoava di jraa yu bak?

16. Weh ku help sohnbadi weh lef di kangrigayshan fi kohn bak tu Jehoava? (Koment pahn di picha.)

¹⁶ Pleez tink bowt dehnya inkorijin werdz eena di Return to Jehovah broashoar: “Yu ku bee shoar dat Jehoava wahn help yu fi du wateva yu need fi du fi kohn bak tu ahn. Hihn ku help yu fi deel wid di evriday woriz a laif. Ih ku help yu fi fergiv enibadi eena di kangrigayshan weh mi seh er du sohnting weh mi hert yu. If yu mi komit wahn seeryos sin eena di paas, ih ku fergiv yu ahn help yu fi ga wahn kleen kanshans. Dat wahn mek it eeziya fi wership Jehoava agen lang wid yu bradaz ahn sistaz.” Ahn memba dat di eldaz eega fi help yu tu. Dehn ku bee “laik wahn shelta fahn di haad breez, laik wahn plays fi shelta fahn di raynstaam.” (Aiz. 32:2) Wi noa dat yu tankful fi di ransom ahn dat yu waahn shoa Jehoava humoch yu apreeshiayt it. Soh aks yuself, ‘Weh Ah ku du now fi “fiks tingz” bitween mee ahn Jehoava?ʼ (Aiz. 1:18; 1 Peet. 2:25) Fi egzampl, yu tink yu kuda goh da wahn meetin da di Kingdom Haal? Yu ku aks wahn elda fi help yu? Hihn mait mek araynjments fi sohnbadi stodi wid yu fi wahn wail. Yu ku bee shoar dat Jehoava wahn bles evriting weh yu du fi kohn bak tu ahn an fi shoa yu apreeshiayshan fi di ransom.

WEH YOO WAHN DU?

17-18. How wi ku mek gud yoos a wi taim bifoa di Memoaryal?

¹⁷ Jeezas mi seh dat Jehoava sen ahn fi pay di ransom “soh dat evribadi weh shoa fayt eena ahn noh wahn geh dischrai bot wahn liv fareva.” (Jan 3:16) Bikaaz a di ransom, Jehoava ku sayv wi fahn sin ahn det. Wi wuda neva waahn looz wi apreeshiayshan fi dat. (Roam. 3:​23, 24; 2 Kor. 6:1) Joorin di dayz bifoa di Memoaryal, tek wahn lee taim fi tink bowt di lov weh Jehoava ahn Jeezas shoa fi yu. Dat wahn moov yu fi fain wayz fi shoa dat yu tankful fi di lov weh dehn shoa yu.

¹⁸ Weh di ransom wahn moov yoo fi du? Di way how yoo shoa dat yu tankful fi di ransom mait bee difrent fahn di way how adaz shoa it. Bot wateva yu du fi shoa yu apreeshiayshan, yu ku bee shoar dat Jehoava wahn bles it. Hihn wahn bles enibadi weh noh “liv fi dehnself nohmoh” ahn weh werk haad fi “liv fi di Krais, hoo mi ded fi dehn.”—2 Kor. 5:15.