Tel di Chroot Eena Wahn Kain Way

1. Weh wi haftu du fi bee paat a Jehoava famili?

DI FERS taim wi meet wahn brada er sista wi mait aks wan anada, “How yu mi laan di chroot?” Som a wi wuda seh dat wi “groa op eena di chroot” er dat wi laytli “kom eena di chroot.” Wi ansa laik dat bikaaz di chroot chaynj wi laif. Ahn wans wi laan di chroot fahn di Baibl, wi waahn bee paat a Jehoava famili. Ahn di onli way wi ku bee paat a Jehoava famili da if wi proov dat wi lov di chroot ahn liv op tu it. Wan a di wayz wi du dat da wen wi aanis eena weh wi seh ahn du.—Saa. 15:​1-3.

2. (a) Weh peepl mi seh bowt Jeezas? (b) Weh peepl mi wahn du wen dehn hyaa Jeezas teechinz?

² Jeezas mi aalwayz tel di chroot. Fi hihn enimi dehn mi seh dat hihn mi aanis eevn wen peepl neva laik weh ih seh. (Mach. 22:16) Jeezas mi tel ih falowaz weh di peepl mi wahn du wen dehn hyaa weh ih teech. Hihn mi seh: “Ai kohn fi kaaz divizhan bitween wahn man an ih pa, bitween wahn daata an ih ma, ahn bitween wahn daata-in-laa an ih mada-in-laa.” (Mach. 10:35) Jeezas wuda mi waahn evribadi aksep di mesij weh hihn an ih disaipl dehn mi preech, bot hihn mi noa dat neva mi wahn hapm. (Mach. 23:37) Hihn mi noa dat som peepl wuda lov di chroot fahn di Baibl an ada peepl wuda hayt it.—2 Tes. 2:​9-11.

3. Weh wi wahn taak bowt eena dis aatikl?

³ Wi waahn chrai wi bes fi bee laik Jeezas an aalwayz tel di chroot, eevn if peepl noh laik it. Wen wi preech ahn teech di chroot fahn di Baibl, som peepl geh beks. Bot wi stil haftu tink bowt weh wi wahn seh soh dat wi taak da di rait taim an eena wahn kain way. Eena dis aatikl wi wahn ansa dehnya kweschan: Wehpaat wi ku fain di chroot? Wai wi tel di chroot? How wi tel di chroot? Wen wi tel di chroot? Di ansa tu dehndeh kweschanz wahn help wi fi shoa moa kainis wen wi preech di gud nyooz tu peepl ahn fi tink bifoa wi taak soh dat wi noa wen ahn how fi taak.

WEHPAAT WI KU FAIN DI CHROOT?

4. Wai wi ku seh dat evriting weh chroo kohn fahn Jehoava?

⁴ Evriting weh chroo kohn fahn Jehoava. Soh evriting weh ih seh da di chroot. Fi egzampl, Jehoava aalwayz tel di chroot wen ih tel wi bowt di tingz weh rait ahn weh rang. (Saa. 19:9; 119:​142, 151) Evriting weh ih seh bowt di fyoocha kohn chroo. (Aiz. 55:​10, 11) Hihn aalwayz kip ih pramis dehn weh ih mek. (Nom. 23:19) Jehoava kyaahn eevn tel lai. (Heeb. 6:18) Dat da wai di Baibl seh dat Jehoava da “di Gaad a chroot.”—Saa. 31:5

5. Wai ih noh haad fi geh fi noa Jehoava, “di Gaad a chroot”? Pleez eksplayn yu ansa. (Aks 17:27)

⁵ Evriting weh Gaad mek proov dat hihn egzis. (Roam. 1:20) Bot stilyet, som peepl mait seh dat ih haad fi geh fi noa Jehoava, “di Gaad a chroot.” Bot dat da noh chroo. Wan taim wen di apasl Paal mi deh da Atenz, hihn mi-di taak tu sohn ejukaytid peepl, an ih tel dehn dat Gaad waahn mek wi geh fi noa ahn, an dat “hihn noh deh faar fahn eech wan a wi.” (Reed Aks 17:27.) Wen Jehoava si hombl peepl di saach far ahn, ih help dehn geh fi noa ahn.—Jan 6:44.

6. Wat da som a di tingz weh wi ku laan fahn di Baibl, ahn wai yoo hapi fi laan dehndeh tingz?

⁶ Wan a di bes wayz fi geh fi noa Jehoava da fi stodi di Baibl. Jehoava mi yooz hoali spirit fi gaid di man dehn weh rait di Baibl. (2 Peet. 1:​20, 21) Soh wi ku chros di Baibl bikaaz evriting weh deh eena it da chroo. Fi egzampl, wi ku bileev weh ih seh bowt hoo mek di yoonivers an evriting eena it. (Jen. 1:​1, 26) Wi ku bileev weh ih seh bowt wai wi sin ahn wai soh moch peepl sofa ahn ded. (Roam. 5:12; 6:23) Wi ku chros weh di Baibl seh bowt how Jehoava wahn deel wid Saytan. Ih seh dat Saytan da “di faada a di lai dehn,” an ih kaaz lata chrobl. Bot di Baibl seh dat Jehoava wahn yooz ih Son fi fiks aala di damij weh Saytan kaaz. (Jan 8:44; Roam. 16:20) Ahn wi ku chros aala di pramis dehn weh deh eena di Baibl. Fi egzampl, wi ku chros dat Jeezas wahn dischrai wikid peepl, bring ded peepl bak tu laif, fiks di damij weh hyoomanz du tu di ert, ahn help aala wi fi bee perfek. (Jan 11:​25, 26; 1 Jan 3:8) Jehoava gi wi di privilij fi laan di chroot ahn fi teech it tu ada peepl. Dat da wahn amayzin privilij, noh chroo?—Mach. 28:​19, 20

WAI WI TEL DI CHROOT?

7-8. Wai ih impoatant fi tel di chroot fi di rait reezn? Yooz di egzampl eena di paragraaf. (Maak 3:​11, 12) (Koment pahn di picha dehn.)

⁷ If wi waahn bee paat a Jehoava famili, wi haftu tel di chroot. Bot Jehoava noh waahn wi jos tel di chroot. Ih waahn wi tel di chroot fi di rait reezn. Tink bowt weh mi hapm wen Jeezas mi-di preech pahn ert. (Reed Maak 3:​11, 12.) Wan taim wen Jeezas mi-di preech tu wahn big krowd a peepl fahn Gyalilee, dehn mi ga sohn peepl weh mi ga deemon eena dehn. Dehndeh peepl mi bow dong fronta Jeezas ahn den hala: “Yoo da Gaad Son!” Wai dehn mi tel di chroot bowt Jeezas? Maybi dehn mi waahn di peepl weh hyaa dehn chros eena dehn, soh dat dehn ku stap dehn fahn serv Jehoava. Di deemonz mi tel di chroot, bot da-mi fi di rang reezn. Jeezas mi noa wai dehn mi tel di chroot, an ih neva hapi wid dehn. Soh Jeezas tel di deemonz fi stap preech bowt ahn.

⁸ Weh wi laan fahn dat? Jehoava pay atenshan tu di reezn wai wi tel di chroot. Soh ih impoatant dat wi teech di chroot fi di rait reezn ahn wi noh du it fi mek peepl prayz wi. Wi waahn mek aala di prayz goh tu Jehoava.—Mach. 5:16; kompyaa Aks 14:​12-15.

9. Weh wi noh fi du, ahn wai?

⁹ Mek wi luk pahn wahn nada sichuwayshan weh wi need fi bee kyaaful fi noh mek peepl prayz wi. Wat if wahn brada tel wi sohnting kanfidenshal ahn wi tel ada peepl bowt it. If laytaraan dehn fain owt dat weh wi seh da-mi chroo, dehn mait bee impres. Dehn mait tink wi impoatant ahn dat wi noa bowt wahn lata kanfidenshal tingz. Bot Jehoava noh wahn hapi wid wi. (Prav. 11:13) Jehoava noh laik wen wi tel ada peepl bowt tingz weh dehn noh bizniz fi noa, an ih noh laik wen wi tel di chroot fi di rang reezn.

HOW FI TEL DI CHROOT?

10. How Paal seh wi fi taak tu peepl? (Koloashanz 4:6)

¹⁰ Reed Koloashanz 4:6. Paal mi rimain di Kristyanz weh mi liv da Koloaseh dat dehn fi aalwayz bee kain wen dehn taak tu peepl. Paal tel dehn dat weh dehn seh fi help peepl, ahn dehn fi seh it eena wahn nais way weh wahn mek peepl waahn lisn tu weh dehn seh.

11-12. Wai wi haftu bee kyaaful wen wi teech peepl di chroot? Yooz di egzampl eena di paragraaf. (Koment pahn di picha dehn.)

¹¹ Wi need fi bee kain wen wi teech peepl di chroot fahn di Baibl. Di Baibl seh dat di chroot da laik wahn shaap soad weh ku kot wi deep ahn shoa wi weh deh eena wi haat. (Heeb. 4:12) If wi yooz di Baibl eena di rang way, wi ku ofen peepl ahn mek dehn staat aagyu wid wi. Mek wi luk pahn wahn egzampl.

¹² Imajin wahn day wi deh owt pahn feel servis ahn wi meet wahn man weh yooz aidol eena ih wership an ih laik selibrayt Eesta ahn Krismos wid ih famili. Wi ku yooz di Baibl fi shoa ahn dat ih foolish fi yooz aidol eena ih wership. Ahn wi ku proov tu ahn dat di Baibl noh gree wid Eesta ahn Krismos. (Aiz. 44:​14-20; 2 Kor. 6:​14-17) If wi du dat di fers taim wi taak tu ahn, wi wuda di tel ahn di chroot, bot wi wudn di yooz di Baibl eena di rait way.

13. How wi ku seezn wi werdz wid kainis?

¹³ Paal mi seh dat jos laik how saalt mek food tays gud, da rait soh kainis mek weh wi seh song gud. Hihn neva meen dat wi shuda haid di chroot jos fi mek peepl noh feel bad. Insted, ih mi-di inkorij wi fi taak eena wahn nais way soh dat di chroot fahn di Baibl song gud tu peepl. (Joab 12:11) Ih noh aalwayz eezi fi du dat. Sohntaim wi mait tink dat weh song gud tu wee wahn song gud tu ada peepl. Bot dat da noh aalwayz chroo. Fi egzampl, peepl fahn wan kolcha mait taak schrayt op wid wan anada. Dehn mait eevn taak laik dat tu peepl weh oalda dan dehn. Bot peepl fahn ada kolcha mait geh ofendid if yu taak tu dehn laik dat. Paal mi seh dat wi need fi noa how fi taak tu peepl. Dat meenz dat wi waahn tink bifoa wi taak, ahn wi waahn mek shoar dat wateva wi seh song gud tu ada peepl tu.

WEN WI TEL DI CHROOT?

14. Jeezas mi teech ih disaipl dehn evriting weh ih noa? Pleez eksplayn yu ansa.

¹⁴ Jeezas mi aalwayz taak tu ih falowaz eena wahn nais way. Hihn teech dehn wahn lata tingz eena wahn kain way. (Maak 6:34) Dehn mi ga wahn lat fi laan. Bot ih neva teech dehn evriting weh ih noa. Hihn mi noa dat dehn neva redi fi laan som a di tingz weh ih mi waahn teech dehn. Hihn mi eevn seh dat dehn mi wahn kyaahn andastan aal weh ih mi waahn teech dehn. (Jan 16:12) Weh wi ku laan fahn Jeezas egzampl?

15. Wai wi noh fi teech peepl evriting weh wi noa wan lik? (Praverbz 25:11) (Koment pahn di picha.)

¹⁵ Jeezas egzampl teech wi dat eevn if wi noa di chroot fahn di Baibl, wi noh haftu teech evriting weh wi noa wan lik. Soh weh wi ku du? Memba dat evribadi difrent. Mek wi tink agen bowt di man weh laik selibrayt Eesta ahn Krismos wid ih famili. Wi noa dat dehndeh selibrayshanz ga fi du wid faals wership ahn Gaad noh pleez wid dehn. Bot wat if yu staat stodi di Baibl wid da man wan week er too weeks bifoa Krismos? Weh yu wuda du? Yu wuda shoa ahn weh di Baibl seh bowt Krismos an ekspek ahn fi stap selibrayt it? Er yu wuda taak tu ahn bowt it wahn neks taim? Da chroo dat som peepl weh stodi di Baibl mait mek chaynjiz rait away. Bot adaz need moa taim fi aksep weh dehn di laan ahn mek chaynjiz eena dehn laif. Wi waahn mek shoar dat wi tel peepl weh dehn need fi noa da di rait taim, soh dat wi ku help dehn mek proagres. Wi noh waahn ekspek tu moch fahn dehn.—Reed Praverbz 25:11.

16. How wi ku help peepl fi “kantinyu liv akaadn tu di chroot”?

¹⁶ Wi feel veri hapi wen wi help peepl laan di chroot bowt Jehoava. How wi ku help dehn fi “kantinyu liv akaadn tu di chroot”? (3 Jan 3, 4) Wi need fi kantinyu set wahn gud egzampl fi dehn. Di way wi liv wi laif shuda shoa dat wi bileev weh di Baibl pramis wi fi di fyoocha. Mek shoar dat yu tel di chroot fi di rait reezn. Noh teech peepl sohnting nyoo fahn di Baibl wen dehn noh redi fi aksep it yet. Aalwayz taak tu dehn eena wahn kain way. An aalwayz mek shoar dat Jehoava geh aala di prayz. If yu du aala dat, yu wahn shoa dat yu wership Jehoava, di Gaad a chroot.