Di Ekschra Weh Dehn Gi Kova Weh Unu Need

Jehoava Witnisiz di du impoatant werk fi help peepl eena oava 200 difrent lan. Bot owta dehndeh lan, onli 35 a dehn ga inof moni fi pay fi fi dehn ekspens. How di bradaz weh liv eena di difrent lan dehn wehpaat ih haad fi mek moni du fi kova di ekspens a di werk?

Di Govanin Badi a Jehoava Witnisiz tink bowt weh aal di bradaz ahn sistaz rong di werl need soh dat dehn ku wership Jehoava ahn kantinyu di du di preechin werk. Dehn tink bowt how fi yooz eni lee moni weh dehn get eena di rait way. If wan a di branch dehn geh moa moni dan weh dehn need, den dehn wuda yooz di ekschra fi help owt di bradaz weh liv eena di difrent lan dehn weh noh ga inof. Wen dehn du dis, dehn di fala di egzampl a di erli Kristyanz hoo mi help adaz soh dat “evriting balans owt.” (2 Korintyanz 8:14) Dehn mi yooz di ekschra weh dehn gat soh dat dehn ku help dehn bradaz ahn sistaz weh mi ga les.

How wi bradaz ahn sistaz benifit fahn di help weh dehn geh fahn di ada branch dehn? Fi egzampl, eena Tanzania, wehpaat moas peepl liv pahn les dan too U.S. dalaz a day, di bradaz mi yooz di moni weh dehn geh fi renovayt di Kingdom Haal weh di Mafinga Kangrigayshan yooz. Di kangrigayshan seh: “Sins wi renovayt di Kingdom Haal, lat moa peepl staat tu kohn da di meetin dehn! Wi soh tankful fi di aaganaizayshan ahn wi bradaz ahn sistaz aal oava di werl fi bee soh jenaros. Dis alow wi fi wership Jehoava eena wahn byootiful plays.”

Bikaaz a di COVID-19 pandemik, som a wi bradaz da Sri Lanka noh ga inof food fi eet. Dat da weh mi hapm tu Imara Fernando an ih lee son, Enosh. Bot bikaaz a di doanayshan dehn weh dehn geh fahn di difrent lan dehn, dehn geh di help weh dehn mi need. Eena wahn lee kyaad weh dehn mek, dehn rait: “Wi tank wi bradaz fi shoa wi humoch dehn lov wi joorin dehnya haad taimz. Wee reeli hapi fi bee paat a dis famili, ahn wi kip di pray dat Jehoava wahn help aala wi bradaz ahn sistaz joorin dehnya laas dayz.”

Noh mata wehpaat wi bradaz ahn sistaz liv, dehn hapi fi shayr weh dehn ga wid adaz. Fi egzampl, Enosh mi mek wahn smaal lee doanayshan baks soh dat hihn ku sayv moni fi help adaz. Wahn sista weh naym Guadalupe Álvarez shoa dat ih jenaros tu. Shee liv eena wahn paat a Mexico wehpaat peepl mek onli wahn lee bit a moni. Bot, shee stil gi weh shee kud. Shee seh: “Ah soh tankful tu Jehoava fi bee soh gud tu mee ahn fi neva abandan mi. Ai noa dat wateva Ai giv wahn geh yooz lang wid di ada doanayshanz fi help mi bradaz weh need it.”

Di difrent Branch aafis hapi fi sen moni tu di difrent plays dehn weh need help. Anthony Carvalho, hoo di serv pahn di Branch Komiti da Brazil, seh: “Fi wahn lata yaaz, wee mi need help fahn ada konchriz fi kantinyu di werk weh wi di du rait ya. Bikaaz a di sopoat weh wi mi get, wi di du lat beta now. Ahn now, wee ga di privilij fi help wi bradaz ahn sistaz eena ada konchriz. Wi bradaz ya da Brazil noatis weh di hapm eena di preechin werk aal rong di werl ahn dehn fain wayz how fi help.”

How Jehoava Witnisiz sopoat dehn bradaz ahn sistaz weh need help? Dehn noh sen moni schrayt tu di difrent branch aafis dehn. Bot dehn put dehn doanayshanz eena di kanchribyooshan baks weh naym “Werlwaid Werk” da di Kingdom Haal. Er dehn ku doanayt onlain da donate.jw.org. Wi reeli apreeshiayt aala unu doanayshanz.