1922 Wan Honjrid Yaaz Agoa

“WAHN AMAYZIN AIDYAA”

Sins di preechin werk mi-di groa, di bradaz ahn sistaz mi need moa ahn moa lichricha. Di bradaz da Brooklyn Betel mi-di mek magazeen, bot dehn stil mi-di yooz ada kompni fi print di haadkova buk dehn. Den, fi lata monts, di kompni weh dehn mi-di yooz mi kyaahn print inof buk fi yooz eena di preechin werk. Soh Brada Rutherford mi aks Brada Robert Martin, hoo da-mi di brada in chaaj a di fakchri, if ih mi pasabl fi staat print dehn oan buk dehn.

Brada Martin mi seh: “Da mi wahn amayzin aidyaa bikaaz ih mi meen dat wi mi wahn haftu oapm wahn nyoo fakchri ahn mek wi oan buk dehn.” Di bradaz mi rent wahn bildin da 18 Concord Street eena Brooklyn ahn dehn mi geh aala di ikwipment weh dehn mi need.

Noh evribadi mi hapi fi noa dat di bradaz mi wahn staat tu print dehn oan buks. Di prezident a wahn kompni weh yoostu print wi buk dehn mi kohn vizit wi nyoo fakchri. Hihn mi seh: “Luk pahn unu now, unu ga ekspensiv ikwipment fi print unu oan buk dehn, bot nobadi rait ya noa how fi yooz it. Ah giv unu jos siks monts an aala dis wahn bee wahn hoal pail a jonk.”

Brada Martin mi seh: “Weh dis man seh mi song laik ih mek sens, bot ih lef owt di Laad. Wee mi noa dat Jehoava mi wahn help wi, an ih mi du it.” Brada Martin mi karek, Jehoava mi did help wi. Noh lang afta dat, di nyoo fakchri mi staat tu mek 2,000 buk evri day.

WI MI YOOZ DI RAYJO FI REECH TOWZNZ A PEEPL

Jehoava peepl mi-di print som a dehn oan buk. Bot pahn tap a dat, dehn mi fain wahn nyoo way fi spred di gud nyooz—dehn mi staat tu braadkyaas pahn rayjo. Pahn Sondeh, Febiweri 26, 1922, Brada Rutherford mi gi di fers taak pahn di KOG rayjo stayshan da Los Angeles, California, U.S.A. Di teem a di taak da-mi “Milyanz a Peepl Weh Di Liv Now Wahn Neva Ded.”

Bowt 25,000 peepl mi hyaa di proagram. Som a dehn mi eevn sen letaz fi seh humoch dehn mi tankful fi di taak weh dehn mi hyaa pahn di rayjo. Wan a dehn da-mi Willard Ashford, weh mi liv da Santa Ana, California. Eena ih leta, hihn mi tank Brada Rutherford fi da “inchrestin taak.” Hihn mi aalso seh: “Wi mi ga chree sik peepl da di hows ahn wi mi wahn kyaahn kohn lisn tu di taak, eevn if yu mi giv it kloas bai. Soh wi mi graytful dat yu mi braadkyaas di taak pahn di rayjo.”

Afta da week dehn mi kantinyu braadkyaas di taak. Bai di en a 1922, The Watch Tower mi ripoat dat “bowt 300,000 peepl [mi] geh fi hyaa di rayjo braadkyaas.”

Di letaz weh di Baibl Styoodents mi geh mi inkorij dehn, soh dehn mi disaid fi bil wahn rayjo stayshan pahn wahn prapati da Staten Island, weh mi kloas tu Brooklyn Betel. Sohn yaaz layta, di Baibl Styoodents mi yooz di WBBR rayjo stayshan fi spred di Kingdom mesij tu moa ahn moa peepl.

“ADV”

Pahn Joon 15, 1922, The Watch Tower mi anonks dat dehn mi wahn ga wahn kanvenshan da Cedar Point, Ohio, pahn Septemba 5 tu 13 da saym yaa. Di Baibl Styoodents mi veri eksaitid wen dehn reech da Cedar Point.

Eena Brada Rutherford fers taak, hihn mi tel di aadyans: “Ai noa dat di Laad wahn . . . bles dis kanvenshan ahn mek shoar dat ih gi wahn big witnis tu moa peepl dan eva bifoa.” Aala di bradaz weh mi gi taak da di kanvenshan mi kip di inkorij di bradaz ahn sistaz fi preech.

Den pahn Fraideh, Septemba 8, bowt 8,000 peepl mi kohn fi lisn tu di taak weh Brada Rutherford mi wahn giv. Dehn mi-di hoap dat hihn wuda eksplayn weh “ADV” meen, weh mi dehn pahn di invitayshan. Wen dehn mi sidong, som a dehn mi noatis wahn big roal a kyanvas weh mi deh tap a di platfaam. Arthur Claus mi chravl fahn Tulsa, Oklahoma, U.S.A., fi goh da di kanvenshan. Hihn mi fain wahn seet wehpaat hihn kuda mi hyaa gud, bikaaz eena dehndeh taim dehn neva ga maik ner speeka fi rayz di valyum.

Soh dat nobadi intarop Brada Rutherford taak, di chyaaman mi anonks dat dehn neva mi wahn alow nobadi fi kom een wen hihn di gi ih taak. Brada Rutherford mi staat giv ih taak 9:30 di maanin. Hihn mi staat aaf ih taak wid Machyu 4:17: “Di kingdom a hevn deh ya.” (King James Version) Wen hihn taak bowt how hyoomanz wuda hyaa bowt dis Kingdom, hihn mi seh: “Jeezas mi seh dat wen hihn kohn bak ahn deh wid ih peepl hihn mi wahn gyada dehn, ahn joorin da taim hihn mi wahn pik owt dehn wan weh faytful ahn laayal tu ahn.”

Brada Claus mi-di pay atenshan tu di kanvenshan, an ih seh: “Wi reeli mi-di lisn tu weh Brada Rutherford mi-di seh.” Bot aal aaf a sodn, Brada Claus mi staat tu feel bad soh hihn mi haftu goh owtsaid. Hihn neva waahn goh owt, bikaaz hihn mi noa dat dehn neva mi wahn mek ih goh bak een.

Lee bit afta dat, hihn mi staat tu feel beta. Ahn hihn seh dat wail ih mi-di goh bak een, ih hyaa di bradaz klap haad. Dis mi mek ih feel veri eksaitid. Soh hihn mi disaid dat eevn if ih haftu klaim pahn tap a di roof fi finish lisn tu di res a di taak, ih mi wahn du it. Brada Claus mi 23 yaaz oal bak den, soh hihn neva ga no prablem fi fain wahn way fi klaim pahn di rooftap. Di lee windo dehn pahn di roof mi oapm, an ih noatis dat di kloasa ih mi get tu dehn, di beta ih kuda mi hyaa.

Bot Brada Claus neva deh bai ihself. Som a ih frenz mi deh tap a di roof tu! Wan a dehn mi naym Frank Johnson. Hihn hori kohn meet Brada Claus, an aks ahn, “Yu ga wahn pakit naif?”

Brada Claus ansa ahn, “Yes, Ah ga wan.”

Soh Frank tel ahn: “Yoo da di ansa tu wi pryaaz. Yu si dis big roal a kyanvas? Da wahn bana weh tai op tu dehnya nayl. Lisn gud tu wen di Joja seh, ‘ahn yu need fi advataiz, advataiz,ʼ den kot di roap dehn.”

Brada Claus mi-di hoal aan tu di naif wail hihn an ih frenz mi-di wayt fi di sentens weh da-mi di signal fi kot di roap. Wahn lee wail afta dat, Brada Rutherford mi reech di moa impoatant paat a ih taak. Brada Rutherford mi soh eksaitid dat ih hala owt: “Unu fi bee faytful ahn laayal witnis fi di Laad. Unu kip aan di goh faawod til aala faals rilijan geh dischrai. Preech di mesij evriway, kaaz evribadi need fi noa dat Jehoava da Gaad ahn Jeezas Krais da King oava aala di ada king dehn ahn Laad oava aala di ada laad dehn. Dis da di moas impoatant taim eena hischri. Di King don di rool! Unu ga di asainment fi preech ahn tel evribadi bowt dis. Soh, advataiz, advataiz, advataiz, di King an ih Kingdom!”

Brada Claus seh dat hihn ahn di ada bradaz mi kot di roap ahn di bana mi roal dong smood smood. Di bana mi seh: “Advataiz di King an ih Kingdom.” Soh di letaz “ADV” da-mi wahn shaat faam a di werd ‘advataiz.ʼ

WAHN IMPOATANT WERK

Di kanvenshan da Cedar Point mi help di bradaz ahn sistaz fi foakos pahn how impoatant di preechin werk, ahn di peepl weh mi wilin fi shayr eena di preechin werk mi hapi. Wahn painyaa fahn Oklahoma, U.S.A., mi rait: “Wi yoostu preech eena wahn ayrya wehpaat lata peepl mi werk eena koal main ahn dehn mi veri poa.” Hihn seh dat wen peepl mi hyaa di mesij fahn di Golden Age magazeen, “dehn [wuda] staat tu krai.” Hihn en op di seh: “Wi soh hapi bikaaz wi ku komfert dehn.”

Di Baibl Styoodents mi si how impoatant Jeezas werdz da Look 10:2, weh seh: “Lata werk deh fi du eena di haavis, bot wi onli ga lee bit a werkaz.” Bai di en a 1922, di Baibl Styoodents mi-di preech bowt di Kingdom moa dan eva bifoa.