Di Baibl Gi Gud Advais Bowt Weh Rait ahn Weh Rang
If wee bays wi disizhan dehn onli pahn weh wee er weh ada peepl feel, wi noh shoar if wi wahn ga sokses. Di Baibl eksplayn wai wi noh wahn ga sokses. Bot ih aalso help wi noa weh rait ahn weh rang, ahn dat da weh wahn help wi ga wahn hapi laif.
WI NEED GAIDANS FAHN GAAD
Eena di Baibl, Jehoavaa Gaad eksplayn dat hyoomanz need fi hihn help ahn dat dehn kyaahn du evriting pahn dehn oan. (Jeremiah 10:23) Dat da wai hihn gi wi di Baibl fi noa weh rait ahn weh rang. Hihn lov aal hyoomanz an ih noh waahn wi mek bad disizhanz weh ku hert wi now an eena di fyoocha. (Deuteronomy 5:29; 1 Jan 4:8) An az wi Kriyayta, hihn da di onli wan weh ku gi wi di bes advais kaaz ih ful a wizdom ahn nalij. (Saam 100:3; 104:24) Bot Gaad noh foas nobadi fi liv akaadn tu fi hihn standadz.
Jehoava mi gi di fers man ahn wuman, Adam ahn Eev, evriting weh dehn need fi bee reeli hapi. (Jenisiz 1:28, 29; 2:8, 15) Aalso, hihn mi ekspek dehn fi obay di klyaa inschrokshanz weh ih gi dehn. Bot hihn mi alow dehn fi chooz if weda er nat dehn wahn fala ih inschrokshanz. (Jenisiz 2:9, 16, 17) Sad fi seh, doh, Adam ahn Eev mi chooz fi liv bai fi dehn oan standadz ahn rifyooz fi fala Gaad standadz. (Jenisiz 3:6) Weh aala dat kaaz? Yu tink peepl hapi di du weh dehn tink rait? Af koars nat! Oava di yaaz, wi laan dat if wi chooz fi ignoar Gaad standadz wi noh wahn ga pees ahn hapinis.—Ecclesiastes 8:9.
Di Baibl ga di bes advais wi need fi mek gud disizhanz, noh mata wehpaat wi kohn fram er wat da wi kolcha. (2 Timoti 3:16, 17; si di baks weh naym “Wahn Buk Weh Ku Help Evribadi.”) Noatis how di Baibl du dis.
Fain owt moa bowt wai di Baibl da “di werd a Gaad.”—1 Tesaloanyanz 2:13. Wach di veedyo weh naym Da Hoo di Baibl Kohn Fram? pahn jw.org.
DI BAIBL TEECH WI WEH GAAD WAAHN WI DU
Di Baibl tel wi bowt Gaad rilayshanship wid hyoomanz. Ih aalso help wi andastan weh Gaad vyoo az rait ahn rang. (Saam 19:7, 11) Di prinsipl dehn eena di Baibl ku help wi mek gud disizhanz evri day.
Fi egzampl, noatis di advais weh wi ku fain da Praverbz 13:20. Ih seh: “Di persn weh di waak wid waiz peepl wahn geh waiz. Tingz noh gwehn gud fi wahn persn weh ga deelinz wid peepl weh noh ga no sens.” Da prinsipl ku help wi tudeh jos laik how ih mi help peepl way eena di paas. Di Baibl gat een lata gud prinsipl weh ku help wi.—Si di baks weh naym “Di Advais Eena di Baibl Ku Stil Help Wi Tudeh.”
Bot yu mait di wanda, ‘How Ah ku noa fi shoar dat di advais eena di Baibl ku help mee tudeh?ʼ Di neks aatikl wahn shoa wi how ada peepl mi benifit fahn di advais eena di Baibl.
a Jehoava da Gaad persnal naym.—Saam 83:18.