Uganu buiti le labürüdübei Matéu

12 Lidan dan ligía, aba lásügürün Hesusu labadinaguagiñe türigu-agei lidan luéyuri emeraaguni.* Kei méhati lamaaña lan lani disipulugu, aba hátühan lídangiñe türigu ligía lun heigin. 2 Dan le harihinbalin fariséugu katei le, aba hariñagun: “Arihabáña bani disipulugu adüga aban katei le moun lumuti ladügǘn lidan luéyuri emeraaguni!”. 3 Ábati lóunabuniña: “Maliihan humagili funagia le meha ladügübei Dawidi hama luwügüriñan dan le halamachunbei? 4 Lau sun fádirigurügüñanu lan meha gayara héiginu fein to sagüráuboun, beluti Dawidi hau lánigu tidoun sanduariu lun héiginu fein tuguya. Aban katei le meha moun lumuti yebe hadügüni. 5 Odi maliihangidün lidan Lilurudun Moisesi nadagimein hamá meha fádirigu tidan ténpulu lidan luéyuri emeraaguni ani mama meha figóu hadügübei lau lira? 6 Nariñaga aban katei hun, gebegitimaati le húmabei ya sügǘ tau ténpulu. 7 Lun hamuga gunfuranda humani le mini lubéi dimurei burí le ‘Mama adagaragüdüni nabusenrubei húmagiñe, le nabusenrubei, lun harufudun gudemehabu’, míchutün hamuga hadurun ha madurunbaña. 8 Ladüga Liráü Wügüri* Laburemebei luéyuri emeraaguni”.

9 Lárigiñe láfuridun ñéingiñe, aba lidin tidoun luban hadamuridagun huríu. 10 Ñéinñeinti aban wügüri le deregüdaali úhabu. Keiti busén habéi fiu wügüriña hadarirun lidurun Hesusu, aba hálügüdüni: “Gayaraati san lareidaguagüdǘniwa aban gürigia lidan luéyuri emeraaguni?”. 11 Ábati lóunabuniña: “Ka hídangiñe masagarunbarun lilügün mudún anhoun éiguada lidoun aban huyu lidan luéyuri emeraaguni? 12 Gebegitimaati aban gürigia tuéi aban mudún! Ligía lubeiti, gayaraati ladügǘn aban katei buiti lidan luéyuri emeraaguni”. 13 Ábati lariñagun lun wügüri ligía: “Inchabéi búhabu nun”. Dan le línchunbalin lúhabu, aba lareidagun. Ábati ítarahali lan kei le aban lúhabu. 14 Ligía aba lubéi hadügün fariséugu aransehani lun háfaruni Hesusu hilagubei. 15 Dan le líchugunbei Hesusu fe luagu katei le, aba lidin ñéingiñe. Gíbetiña gürigia ñǘdüntiña lárigi, ábati lareidaguagüdüniña súngubei. 16 Lau sun lira, ru lumuti gumadi le houn: “Mariñaga humeitia ni ka un kátana lan”. 17 Ítara liña lagunfulirun le meha ariñawagúbei lau lídehan profeta Isaíasi:

18 “Anihán nubúein le nanúadirubei, le hínsiñebei nun ani le aubei nagundaara. Nóunahabei nani sífiri sandu luagun ani lafuranguagüdübei houn néchanigu ka lan irichaübei. 19 Masigenehánbei, magúaragun ligíame ni ka un. Máluahanbei lun laganbahóun luagu ǘmada. 20 Magumu lubéi maburu le halamémeeli áhalacha, méñeguchunleime limechan lanpu le ñegumémeeli, darime lachülürün dan lun laransehani sun le wuribabei. 21 Luáguba liri hemenigida sun néchanigu”.

22 Aba lanügǘn aban wügüri lun Hesusu, mariñagaditi ani marihinti wügüri ligía ladüga meha ragǘ laali lan aban sífiri wuribati. Aba lareidaguagüdüni Hesusu wügüri ligía ani aba gayaraahali lan layanuhan luma larihin. 23 Aba taweiridun hanigi gürigia lau harihini katei le, ábati hariñagun: “Ma funa san anihán Ladügawagunbei Dawidi?”.* 24 Danti le haganbunbalin fariséugu katei le, aba hariñagun: “Mama lau amu katei lasagaha le sífirigu wuribatiña luéidigia lau lubafu Belsebú,* le hábuti máfianu”. 25 Kei subudi lani Hesusu le hasaminarubei fariséugu, aba lariñagun houn: “Sun arúeihani le ídanbei mawadigimaridun hamá lílana lidan úarani, chülüti dan lun lábürühan. Ani lábürühaba giñe furumiñeguarügü uburugu le ídanbei múaran hamá lílana ítara kei muna to ídanboun anihein lan fánreinguaü. 26 Ítarameme, anhein Satanási lubéi abugaguagüdübei lungua, fánreinguañu liña. Ánheinti ítara liña lubéi, ida lubagia ladurarun larúeihan? 27 Ánheinti lau lubéi lubafu Belsebú nasagaha máfianu, anti hánigu? Ka íchugubei ubafu houn lun hasagahan máfianu? Ligíati, anhein gadurun hubéi o madurun humá, hánigu guánarügüba arufudei. 28 Ánheinti lau lubéi lubafu Bungiu nasagaha máfianu, mini lan lira ragǘ laadün lan Larúeihan Bungiu lidan magurabun humani. 29 Anhein áluga aban gürigia lebelurun lúbiñoun aban wügüri héreti lun líweruhani lílagu, ma mosu lagüraguni híweruti wügüri ligía furumiñe? Ítararügübei gayara lan líweruhani lílagu. 30 Anhein mama lubéi númagiñeñein aban gürigia, náganiñein, le móundaraguagüdünti úara numa, ladügüña lun lawaraüdagun le óundaragua náalibei.

31 ”Ligía nariñagunbei hun ferudunawabei lan furumiñeguarügü figóu luma anabawaguni le hadügün gürigia, ánheinti le anabaguti sífiri sandu, úabei ferudunawa lan. 32 Kéiburi hamuga anhein adimureha aban gürigia wuriba luagu Liráü Wügüri,* ferudunawabei. Ánheinti le ayanuhati wuriba luagu lani Bungiu sífiri sandu, úabei ferudunawa lan, ni lidan dan le ni lidan le lunbei liabin.

33 ”Anhein hóunigira tídibu wewe, buídubei tin, anhein móunigirun humá, wuribabei tin. Ladüga luagu tin tídibu wewe tasubudirúa. 34 Harasan hewe huguya le! Ida luba san hayanuhan katei buiti anhein wuriba hubéi? Ladüga lídangiñe le buinbei tidan lanigi gürigia layanuha liyuma. 35 Gürigia le buídubei, katei buiti lasagarubei tídangiñe lanigi, ánheinti gürigia le wuribabei, katei wuribati lasagarubei tídangiñe lanigi. 36 Au, ariñagatina hun lidan lanme Luéyuri Aguseruni hóunabuba lan gürigia luagu furumiñeguarügü dimurei málati le hariñagun. 37 Ladüga anhein buidu lubéi dimurei burí le bariñagubei, lanügübadibu Bungiu kei aban gürigia buiti, ánheinti wuriba lubéi le bariñagubei, lasiadirubadibu”.

38 Aba hariñagun fiu hádangiñe arufudahatiña Lilurudun Moisesi hama fariséugu lun: “Máisturu, ruba aban seini woun”. 39 Ábati lóunabuniña Hesusu: “Súnwandan háluahaña lan gürigia wuribatiña ani múaraguntiña ha lánina dan le aban seini. Lau sun lira, michugúnbei amu seini houn luéidigia liseinin profeta Honasi. 40 Ítara kei meha redei lan Honasi ǘrüwa weyu luma ǘrüwa áriebu lurageirugu aban óunwenbu udu, ítara luba giñe lerederun Liráü Wügüri* ǘrüwa weyu luma ǘrüwa áriebu lábugiñe múa. 41 Lídanmeti Luéyuri Aguseruni, háguyuguba lílana Níniwe, ábameti hasiadiruniña gürigia ha lánina dan le. Ladüga asakürihatiña meha dan le haganbunbalin lapurichihan Honasi. Lau sun lira, anihein aban le wéirigutimaati luéi Honasi ya. 42 Ani lídanme giñe Luéyuri Aguseruni, táguyuguba lurúeite suru, ábameti tasiadiruniña gürigia ha lánina dan le, lugundun ñǘbuintu meha lídangiñe lidise-agei fulasu ubouagu lun taganbuni lichú lau Salomón. Lau sun lira, anihein aban le wéirigutimaati luéi Salomón ya.

43 ”Dan le láfuridun aban sífiri wuribati lídangiñe aban gürigia, ñǘdünti áluaha halíaba lan leredera lidan burí fulasu mageirawati, keiti madari lan, 44 aba lariñagun: ‘Nagiribuda tidoun muna to ídangiñeboun náfurida’. Danti lagiribudun, málatu ladarirunu, buídawaaru ani wéndegüdawa tuguya. 45 Ábati lidin áwara houn sedü sífirigu wuribatimaatiña luéi ani aba herederun ñein. Wuribatimaahaliti le gádanbalin gürigia ligía sügǘ lau le meha gádanbalin furumiñe. Ligiamémeba asusereda houn gürigia wuribatiña ha lánina dan le”.

46 Sunti aniha lan Hesusu ayanuha houn gürigia, anuha lúguchu hama lamulenu bóugudi áluga hayanuhan luma. 47 Ábati lariñagun aban gürigia lun Hesusu: “Anuhántia búguchu hama bamulenu bóugudi, busentiña hayanuhan buma”. 48 Aba lariñagun lun le awisarubalin: “Ka núguchuboun ani kátaña namulenubaña?”. 49 Aba lariñagun íncheina lúhabu hawagun lani disipulugu: “Arihabá! Anuhán núguchuboun hama namulenu! 50 Ladüga sun le adügüti lugundan Núguchi le siélubei, ligía namulenbei, namulelua tuma núguchu”.