Uganu buiti le labürüdübei Matéu
15 Ábati hayabin fiu fariséugu* hama arufudahatiña Lilurudun Moisesi Herusaléngiñe ariñaga lun Hesusu: 2 “Ka uagu magunfulirun habéi bani disipulugu lau échuni burí le hígirubei binadu gürigia woun, kéiburi lau machibun hamani háhabu lubaragiñe heigin?”.
3 Ábati lóunabuniña: “Agia huguya? Ka uagu himei hubalin hafalaruni hechun guánarügü lubaragiñe hamuga hafalaruni Lilurudun Bungiu? 4 Ayanuha wamá luagu Lilurudun Bungiu le: ‘Inebelá búguchi tuma búguchu bun’ lúmati ‘Furumiñeguarügü le ayanuhati wuriba luagu* lúguchi o tuagu lúguchu, lunti lafarún hilagubei’. 5 Ánheinti huguya, ariñagatün: ‘Furumiñeguarügü le ariñaguti lun lúguchi o tun lúguchu “Sun le gayaraabei nayusuruni lun níderagunibu, derege naali lun Bungiu”, 6 séfuhali luéi larufudun inebesei houn lagübürigu’. Ítarati, arufudatün mabahüdǘni lun lererun Bungiu lúnrügü hafalaruni hechun guánarügü. 7 Biangua tigibu huguya le! Linarün meha profeta Isaíasi dan le lariñagunbei huagu: 8 ‘Lídangiñerügüñein hayumáru gürigia ha harufuda inebesei nun, lugundun mama tau sun hanigi hayarafada nun. 9 Málati háhuduragun nun, ladüga héchunrügüñein wügüriña harufudaha’”. 10 Ábati lamuriahan Hesusu hama gürigia lun hayarafadun lun ani aba lariñagun houn: “Aganba humana ani gunfuranda huméi le nariñagubei hun: 11 le áfuridubei liyumulugugiñe gürigia, ligía awiyedubalin ligibugiñe lagu Bungiu, mama le ebelurubei liyumulugun”.
12 Ábati hayabin lani disipulugu ariñaga lun: “Subuditi san bun adüga lan le bariñagubei lun hasafaragun fariséugu?”. 13 Aba lóunabuniña: “Sun nadü to mama lábunun Núguchi le siélubei, tahulúba. 14 Ígira humaña. Busentiña hadundehaniña amu ani marihintiña. Ánheinti ladundeha aban marihinti marihinti líledi, héiguaduba biángubei lidoun aban huyu”. 15 Ábati lamuriahan Féduru luma Hesusu: “Afuranguagüdabei woun ka lan lílabei hénpulu le”. 16 Aba lariñagun Hesusu lun: “Ni giñe san huguya úagili gunfuranda humá? 17 Ibidiñeti san hun sun lan le ebelurubei liyumulugun gürigia, aba lan lidin adagara lurageirugun, ñéingiñe aba lidin ararama tidoun kumú?* 18 Ánheinti le áfuridubei liyumulugugiñe gürigia, tídangiñe lanigi liabin. Anati lira, adügati lun wiye lan gürigia ligibugiñe lagu Bungiu. 19 Kei hénpulu, tídangiñe lanigi gürigia láhücha wuribani: áfarahani, agabarahani, magíaguni,* íweruhani, lariñawagún iyeeni hawagu amu luma anabawaguni. 20 Anihán burí katei le awiyedubalin gürigia ligibugiñe lagu Bungiu, mama leigin machibunga lúhabu”.
21 Lárigiñe katei le, aba lidin Hesusu lidoun fulasu le gíribei Siru luma Sidón. 22 Ábati tiabin aban würi fenisiana* agúaraheina lárigi, ariñageina: “Gudemená bun, Nabureme, Ladügawagun Dawidi!* Ragüla aban mafia nisaani ani ma luriban lóuserunu”. 23 Íbini ítara, mariñagunti Hesusu ni kata tun. Ábati hayabin lani disipulugu ayumuragua lun: “Ariñagabá tun lun tidin túbiñoun, hebé láamuga terederun agúaraha wárigi”. 24 Aba lóunabun: “Hóunrügüñein lílana Ísraeli, ha ítarabaña kei mudún ha féridihaña, nounahóua”. 25 Oura ligía, aba tabuluchagun würi tuguya ligibugiñe, ariñageina: “Íderaguabana, Nabureme!”. 26 Ábati lóunabunu: “Mabuidunti lun tagidarún heigan irahüñü fein hawéi lun tichugún houn ounli ha ñǘbürigiña”. 27 Tariñaga lun: “Anha, Nabureme, lau sun lira, hóutiña ounli lídangiñe tife fein le ábürühabei luéigiñe hadabulan laburiña”. 28 Ábati lóunabun: “Lueirin tafiñen würi mau! Gúnfulila le bayumahabei”. Ouraméme ligía, aba tareidagun tisaani.
29 Lárigiñe lidin ñéingiñe, aba lachülürün lidoun aban fulasu yarafa lun duna Galiléa, ábati lamudeirun luagun aban wübü. Sun aniha lan ñun ñein, 30 aba hayabin saragu gürigia barüina danimatiña, méibuguntiña, marihintiña, mariñagaditiña hama amu sánditiña lun Hesusu ani aba lareidaguagüdüniña. 31 Ábati taweiridun hanigi gürigia lau harihini ayanuhaaña lan ha meha mayanuhanbaña, areidaguaaña lan ha meha danimabaña, arihaaña lan ha meha marihinbaña, ábati hagumeserun íchiga uéiriguni lun Lubungiute Ísraeli.
32 Ábati láwarun Hesusu houn lani disipulugu ani aba lariñagun houn: “Gudemetiña gürigia ha nun, ladüga ǘrüwaali weyu hau ya numa ani úati éigini hama. Mabusenruntina nóunahaniña lau halama, héiguahañein ǘmada”. 33 Ábati hariñagun lani disipulugu lun: “Díseti fulasu le... Halíagiñeba san wasagara saragu fein lun wéigagüdüniña sun gürigia ha darí hakimuledun?”. 34 Aba lálügüdüniña Hesusu: “Átiriñoun fein huma?”. Aba hariñagun lun: “Sédüñoun fein wama ya habu fiu úduraü”. 35 Lárigiñebei lariñagun houn gürigia lun hañuurun múarugu, 36 aba lanügünu sedü fein tuguya hama úduraü hagía, aba líchugun eteingiruni lun Bungiu, aba láhalahanu fein, rulóun houn lani disipulugu lun hafanreinhanu hadan gürigia. 37 Hóutiña súngubei darí hakimuledun. Lárigiñe, aba habuinchagüdün sedü faniñe wéinamuti tau fein to ígiraguboun. 38 Gádürüñanu milu wügüriña éigitiña, bóugudin hawéi würiña hama irahüñü. 39 Aba lóunahaniña Hesusu gürigia hábiñoun, ábati ládinun tidoun aban ugunei lun lidin lidoun fulasu le gíribei Magadán.