Uganu buiti le labürüdübei Matéu
9 Ábati ládinun Hesusu tidoun ugunei, aba lánhiñuraguni barana ani aba lachülürün lidoun uburugu le ñein lubéi leredera. 2 Ábati hanügün fiu gürigia aban sánditi lauti deregüdaü lun Hesusu tidan lubarari. Dan larihinbalin Hesusu lueirin hafiñen, aba lariñagun lun sánditi ligía: “Ragüba gurasu, niráü! Ferudunawaali bifigoun”. 3 Ábati hariñagun fiu hádangiñe arufudahatiña Lilurudun Moisesi hóunguarügü: “Larufuduñaga le minebenehabuni lun Bungiu!”. 4 Keiti subudi lani Hesusu le hasaminarubei, aba lariñagun houn: “Ka uagu hasaminara katei wuribati hídangua? 5 Kagia ménrenguntimaabei, lariñawagún ‘ferudunawaali bifigoun’, o ‘saraba, beiba’? 6 Lunti gayara lan harihini ibihaali lan Liráü Wügüri* ubafu lun feruduna lan figóu...”. Aba lariñagun lun wügüri le sándibei: “Saraba, budaboun bubarari ani beiba búbiñoun”. 7 Ábati lásaarun wügüri ligía ani aba lidin lúbiñoun. 8 Aba taweiridun hanigi gürigia dan le harihinbalin katei le, ábati híchugun uéiriguni lun Bungiu, ladüga líchugun aban ubafu ítarati houn gürigia.
9 Lárigiñebei láfuridun Hesusu ñéingiñe, aba larihin aban wügüri gíriti Matéu ñun tidan áfisi to ñein lubéi laguburahóua liseinsuna gumadi ani aba lariñagun lun: “Abanbá hádangiñe nánigu”. Lúmagiñememe oura ligía, aba lásaarun ani aba lidin úara luma. 10 Fiu oura lárigiñe, dan le léigiña lubéi Hesusu lúbiñe Matéu, aba giñe hachülürün saragu aguburahatiña liseinsuna gumadi hama amu burí gafigountiña eiga luma luma hama lani disipulugu. 11 Danti le harihinbalin fariséugu katei le, aba hariñagun houn lani Hesusu disipulugu: “Ka uagu leiga humaisturun hama aguburahatiña liseinsuna gumadi luma hama gafigountiña?”. 12 Dan le laganbunbaliña Hesusu, aba lariñagun houn: “Ha sándibaña emegeirubaña surusia, mama ha masandibaña. 13 Ligíati, gunfuranda huméi le mini lubéi dimurei burí le: ‘Mama adagaragüdüni nabusenrubei húmagiñe, le nabusenrubei, lun harufudun gudemehabu’. Lugundun houn gafigountiña niabin agúaha, mama houn ha saminabaña adüga hamani sun katei buidu”.
14 Ábati hayarafadun lani Huan disipulugu lun Hesusu ani aba hariñagun lun: “Wagía hama fariséugu, héchutiwa ayunara,* ánhañati bani disipulugu, mayunaruntiña, ka san uagu?”. 15 Ábati lóunabuniña Hesusu: “Dan le lamarieidun adari, kábagia uagu hahirudagua lumadagu sun anihagua lan hama? Lau sun lira, lachülürüba weyu lun úaali lanme adari hama, ligíaalimeti hayunarun. 16 Úati apachirutu aban gamisa iseri tuagu aban to wéiyaaru, ladüga danme le tadiñuragun to iseri, ábame taheiridagúntima to wéiyaaruboun. 17 Úati giñe íchugutu diwéin to iseri lidoun lagei uniñein le wéiyaali. Lugundun anhein adügǘwa lira, tadügüba diwéin to iseri lun laduurun gueru, ábameti táwiyurun diwéin ani meseriwínhalime lagei uniñein ligía lun ni kata. Lubaragiñe lira, lidoun burí lagei uniñein le iseri híchigoun gürigia diwéin to iseri, ítarati, meferidirúntu ni diwéin ni tagei”.
18 Sunti aniha lan Hesusu ariñagei katei burí le, aba layarafadun aban gumadimati luagun ani aba labuluchagun ligibugiñe, ariñageina: “Chóuruti lumoun lan oura le, hilaaru nisaani, lau sun lira, ánhabu ñüdün íchigei búhabu tuagu, tawinwandayaba”.
19 Ligía aba lubéi lásaarun Hesusu ani aba lidin, dandu ligía kei lani disipulugu úara luma gumadimati ligía. 20 Sódini, aba tayarafadun aban würi luagun Hesusu lanagangiñe, barüharu meha würi tuguya duusu irumu lau lésehan hitaü tídangiñe. Ábati taguuruni taru ladaüragun, 21 ladüga tariñagun túnguarügü: “Láurügüme naguuruni taru ladaüragun, nareidaguba”. 22 Aba lagararaagun Hesusu, danti larihinbarun, aba lariñagun tun: “Ragüba gurasu, niráü! Areidaguaadibu ladüga bafiñen”. Lúmagiñe oura ligía, aba tareidagun würi tuguya.
23 Danti le lebelurunbei Hesusu lúbiñoun gumadimati ligía ani aba larihiniña íñaahatiña fidu hama saragu gürigia ha ñéinbaña ayahuaha luma agúaraha, 24 aba lariñagun houn: “Heiba yáagiñe! Ladüga móunwengiru irahü to, tarumuguña”. Dan le haganbunbalin gürigia hagía lira, aba hagumeserun adüga bula lau Hesusu. 25 Lárigiñebeiti hasagarún sun hagía ñéingiñe, aba lebelurun Hesusu le ñeinhin tubéi irahü tuguya ani aba lárügüdüni túhabu, ábati tásaarun. 26 Aba laburuchagun ñunsu ligía lidan sun fulasu le ñeinbei.
27 Danti le áfurideina lubéi Hesusu ñéingiñe, aba houdin bián marihintiña lárigi lárigi, agúaraheina: “Gudemehabubá woun, Ladügawagun Dawidi!”.* 28 Danti le lebelurunbei Hesusu múnadoun, aba hayarafadun bián marihintiña hagía lun, ábati lálügüdüniña: “Afiñetün san gayara lan nareidaguagüdünün?”. Aba hariñagun lun: “Anha, Nabureme”. 29 Ábati laguuruni hagu ani aba lariñagun houn: “Gúnfulila le hamuriahabei según afiñeni le huágubei”. 30 Lúmagiñe oura ligía, aba hagumeserun ariha. Ábati líchuguni Hesusu gumadi le houn: “Mariñaga humeitia katei le ni ka un”. 31 Íbini ítara, kei háfuridun ñéingiñe, aba haburuchaguagüdüni le asuseredubei lidan sun fulasu ligía.
32 Danti le háfuridunbei wügüriña hagía ñéingiñe, aba hayabin fiu gürigia le ñeinhin lubéi Hesusu barüina aban wügüri mariñagaditi, le gawagubei aban sífiri wuribati. 33 Ouraméme le lasagarunbalin Hesusu sífiri wuribati ligía luéi gürigia ligía, aba lagumeserun ayanuha. Aba taweiridun hanigi gürigia ani aba hariñagun: “Marihínwañahagili aban katei ítarati Ísraeli!”. 34 Ánhañati fariséugu, aba hariñagun: “Lau lubafu hábuti máfianu lasagaha Hesusu sífirigu wuribatiña”.
35 Ábati latatirun Hesusu éibugei sun aüdü luma burí uburugu, arufudaheina tidan burí luban hadamuridagun huríu luma apurichihei uganu buiti luáguti Larúeihan Bungiu, areidaguagüda ligía sun luwuyeri sandi luma danimaü hawéi gürigia. 36 Dántiha le larihiniña gürigia, ábaha hagudemedagun lun tídangiñe sun lanigi, ladüga hiru lan le gádanbaliña luma ladüga ítara haña lan kei mudún ha móuniritiña. 37 Ábati lariñagun houn lani disipulugu: “Le lúgubu gibe lan lunti lalubahóun ani lóuguatiña alubahatiña. 38 Ligía lubeiti, ayumuragua humá lun Labureme nadü lun lóunahan nadagimeintiña alubaha”.