5 Hayanuhan hámagua

KA MINI LUBÉI?

Dan le gayanuhadi hamá agübürigu hama hasaanigu, subudigüda hamuti hámagua ka lan hasandirubei luma le hasaminarubei.

KA UAGU LUNTI LUBÉI HADÜGÜNI?

Másiñati hénrengu lan layanuhóuniwa luma aban isaani le nibureingili. Ariñaga tumuti líburu Tú no me escuchas, yo no te entiendo ida liña lan gayara lan lasandiragun aban úguchili lungua. Danha le ñǘbürigiña hasaanigu “ariñaga hamutiha sun katei houn. Ánheinti dan le wéinamuraühaña, aba lalouguadun hayanuhan hama, ani ibidiñeeli houn ka lan hasaminarubei ni ka lan hasandirubei hasaanigu, ítara liña kamá hamuga rara liña kada aban hádangiñe luéigiñe ámuñegueinarügü louba aban óunwenbu duna”. Lau sun lira, mítaranti katei kei aubei larihúa: lídantima dan lira hemegeira hisaanigu hayanuhan huma.

KA GAYARAABEI HADÜGÜNI?

Góubagua humá luma hisaani. Adüga huméi íbini mosu lan herederun ayanuha luma darí lárieibudun.

“Anihein dan busén humá hariñagun: ‘Úarañadiwa buga sun weyu, anihánba lubéi babusenrun bayanuhan?!’. Ida lubati bekeharun luagu labusenrun bisaani ladaarunu lanigi bun? Ma funagia ligía habusenrubei sun agübürigu?” (Lisa).

“Lau sun hínsiñe lan nun lun roungia nan, amidi burí áriebu nayanuha buidu hama nisaanigu” (Herbert).

ADUNDEHANI TÍDANGIÑETI BÍBÜLIA: “Moun lumuti wáluahani le buídubei woungua, lunti wáluahani le buídubei houn amu” (1 Korintuna 10:24).

Masaminara humá luagun amu katei. Ariñagati aban úguchili: “Anihein dan nasaminarun luagun amu katei dan le añaha lan nisaanigu ayanuha numa. Ani chóuruti ru hamá fe”.

Anhein susereeli lubéi ligiaméme hun, ñegú humóun bigibigitu, areida humeime gágamuru o katei líbeina lira. Teni humá lun le lariñagubei hisaani hun, ítara luba harufuduni lun teni humá lun le adiheridagüdübalin, weiri lan yebe o ñüraü lan.

“Mosu hasubudiruni wasaanigu teni wamá lun le hasandirubei. Anhein madügün wamá, mariñagun hamaalime woun ka lan hasandirubei, lubaragiñe lira, ábame háluahan ídemuei hama amu gürigia” (Maranda).

“Maloucha humá ni danme labahüdahan hisaani aban lanarime katei hun” (Anthony).

ADUNDEHANI TÍDANGIÑETI BÍBÜLIA: “Aganba humá lubeiti buidu” (Lúkasi 8:18).

Meferidira humá chansi. Anihein dan, busentima hamá nibureintiña hayanuhan hama hagübürigu dan le darangilu lan hasandiragun houngua.

“Ayanuhatiwa dan le waweiyasuhaña lan. Adügaali wayanuhan góubagu, lubaragiñe nañuurun hagibugiñe, lun wayanuhan buidu” (Nicole).

Buiti giñe lóurate éigini lun hayanuhan húmagua.

“Dan le wéigiña lan guñoun, ligía gadaani wamá lun wabahüdahani katei buiti o wuribati le asuseredubei woun weyu ligía. Adügaali échuni le lun lidan wamá úarani ani haritaguagüda lumuti woun mama lan mosu wagagibudagun luma turobuli wábugua” (Robin).

ADUNDEHANI TÍDANGIÑETI BÍBÜLIA: “Kada aban hídangiñe lunti aranseñu lan lun laganbun, gama lumoun lunti hámaru lan lun ladimurehan” (Santiagu 1:19).