Ǘrüwa furumiñeti íñanaü

Heseriwiduña meha ísüraelina kei idamuni houn ehiptuna ha afosurubaliña lun hadügün wadagimanu le hénrenguti. Óunaha lumuti Heowá Moisesi luma Aarón lun híchuguni uganu le lun faraón: “Ígiragüdabaña numutuniña lun houdin áhuduragua nun lidan fulasu mageirawati”. Wéiriti meha lanaagun faraón lungua, ábati lóunabuniña: “Meberesentina lau le lariñagubei Heowá. Mígiragüdün nubaña ísüraelina lun houdin”. Aba lafosuruniña faraón ísüraelina lúntima hawadigimaridun. Ábati desidírü lan Heowá líchuguni faraón lidoun lilugaarun. Subuditi bun ida liña lan ladügüni? Óunahati 10 íñanaü luagun Ehiptu. Ariñagati Heowá lun Moisesi: “Meberesenti faraón nau. Haruga binaafin, lídiba faraón laru duna Nilu. Beiba, bariñagame lun kei lan mígirun lan lun houdin numutuniña, lasaliraguba lan sun duna Nilu hítaüme”. Gaganbaditi Moisesi lun Heowá, ábati lidin arihei faraón. Ariha lumuti faraón lagayuahan Aarón luagu lidunari Nilu lau lubadun, ábati lasaliragun duna hítaüme. Aba língidun duna, siñati meha laatún lídangiñe, ani hilaguatiña sun úduraü ha lídanbaña. Ni ítara, mígirun lumutiña faraón ísüraelina lun houdin.

Sedü weyu lárigiñe, ábaya lóunahani Heowá Moisesi ariñaga lun faraón: “Ánhaña mígiragüdün ban numutuniña, labuinchuba Ehiptu hau húa”. Kei madügün lubéi faraón gasu, aba liñuruni Aarón lubadun ábati labuinchun sun Ehiptu hau húa. Daritiña gürigia húa hábiñe, tidan hagabanan, lidan asiedu le ídanbei heiga... Úati meha fulasu le ñein lumuti ua hamá! Ábati lariñagun faraón lun Moisesi: “Amuriahabá luma Heowá lun lagidaruniña húa ha wawéi, ábameti nígirun lun houdin ísüraelina”. Ligíati aba lubéi lararamuni Heowá íñanaü ligía, ábati hóundaraguniña ehiptuna húa ha hilaañabaña. Aba língidun sun ageiraü, ni ítara mígirun lumutiña faraón ísüraelina lun houdin.

Lárigiñe, ariñagati Heowá lun Moisesi: “Agayuahalá Aarón lau lubadun múarugu, ábameti lasaliragun kaliki mebebegime”. Ani ligía asuseredubei, aba ñein hamá mebebegi ásühaña gürigia lidan sun fulasu. Añahein ehiptuna ariñagutiña lun faraón: “Lúmagiñe Bungiu liabin íñanaü le!”. Ni ítara, mígirun lumutiña faraón ísüraelina lun houdin.