Ámuya sisi íñanaü

Ñǘdünti Moisesi luma Aarón íchigei uganu lúmagiñeti Bungiu le lun faraón: “Ánhaña mígiragüdün ban numutuniña, nóunahaba gunga bageiroun”. Belutiña saragu milu gunga hábiñoun ehiptuna dandu rísitiña kei gudemetiña. Aba labuinchun ageiraü hau gunga. Ánheinti Gosén, fulasu le ñein lubéi hawinwanda ísüraelina, úati ni aban ñein. Madügünti ligadürün íñanaü le, ni le líbiri, ni kata houn ísüraelina luéidigia houn ehiptuna. Ayumuraguati faraón lun Moisesi: “Amuriahabá luma Heowá lun lagidaruniña gunga ha wawéi, lárigiñe gayaraahalime houdin bumutuniña”. Gama lumoun, sánsiti laritagun faraón dan le lagidarunbaliña Heowá gunga. Lachülürüba funá san dan lun lafurendeiruni faraón le labusenrubei Heowá larufudahan lun?

Ariñagati Heowá: “Anhein maha faraón lígiruniña numutuniña lun houdin, hasandiruba habiñanigu ehiptuna hilagua hagíame”. Larugan, susereti le lariñagubei Heowá, ánhañati habiñanigu ísüraelina masuseredunti ni kata houn. Íbini ítara, sigiti faraón lau lumahan lígiragüdüniña ísüraelina.

Ábayati lóunahani Heowá Moisesi arihei faraón, luma lun lachüürün baligi garabalirugun. Aba lasaliragun baligi ligía kalikime garabalirugu, ábati lábürühan hawagun ehiptuna. Adügati kaliki ligía lun lasaliragun guméi gari buriti hawagu ehiptuna luma hawagu habiñanigu. Ni ítara, mígirun lumutiña faraón ísüraelina lun houdin.

Ábaya lóunahani Heowá Moisesi ariñagei uganu le lun faraón: “Mahamémegidibu san bígiragüdüniña numutuniña? Haruga, nadügüba lun láhuyun huya dereguati”. Larugan, aba lóunahan Heowá huya dereguati, wayuhuru luma watu. Úagili meha aban liñawan dan ítarati lidan sun Ehiptu. Günringua lumutu sun tídibu wewe luma sun nadü le áraabubei, lídanrügüñein Gosén masuseredun lan lira. Ábati lariñagun faraón: “Amuriahabá luma Heowá lun masigi lan huya dereguati le, gayara halimeti hidin”. Dan larihinbei faraón rédeiha lan láhuyun huya dereguati, ábaya lasansirun laritagun.

Ligíati lariñagunbei Moisesi: “Guentó héigibei chagagaru sun nadü le erederubei lárigiñe huya dereguati”. Aba héigini saragu míñunu chagagaru sun tídibu wewe le erederubei. Aba layumuragun faraón lun Moisesi: “Amuriahabá luma Heowá lun lagidaruniña chagagaru ha yáagiñe”. Sigiti faraón lau lidere laganbun, íbini lárigiñe lagidaruniña Heowá chagagaru.

Lárigiñe, aba lariñagun Heowá lun Moisesi: “Iñurabéi búhabu sielun”. Ábati ladagarun aban óunwenbu luburiga lidan sun Ehiptu. Siñati meha harihin ehiptuna ni kata luagu ǘrüwa weyu. Ánheinti le ñein lubéi hawinwanda ísüraelina anihein meha larugounga.

Aba lariñagun faraón lun Moisesi: “Beiba hau ísüraelina, ánhañati hibiñanigu heredera ya”. Ábati lóunabuni Moisesi: “Mosu wanügüniña wabiñanigu gayara láamuga wadagaragüdün lun Wabungiute”. Aba lagañidun faraón, ábati lagúaragun: “Beiba yáagiñe! Ánhabuya nariha, náfarubadibu hilagubei”.