Milaguru lidan barana Funati

Dan laganbunbei faraón ñǘdünha lan ísüraelina Ehiptugiñe, aba lasakürihan luagu lígiruniña lun houdin. Aba líchugun gumadi houn lisudaranigu: “Aranse humóun sun nikarün lánina wuribu, keimoun hárigi. Mígirun wamutiña hamuga buga lun houdin”. Ábati lidin hau lisudaranigu éibaahaña ísüraelina.

Adundeha lumutiña Heowá lumutuniña lau aban dúeri wéyuagu luma aban watu gemeti guñoun. Aba lanügüniña luagun barana Funati, ábati lariñagun houn lun híchugunu hakianpun-agei ñein.

Lárigiñe, aba harihini ísüraelina faraón anitén lan éibaahaña hau lisudaranigu. Anihán meha barana hagibugiñe, lisudaranigu Ehiptu hanagangiñe. Ábati hagumeserun agúaragua lun Moisesi, hariñaga lun: “Wóunwegua! Ígiragubei báadiwa hamuga Ehiptu”. Lariñagati Moisesi houn: “Manufudeda humá. Agurabaha humá ani ariha huméi ida luba lan lesefuruniwa Heowá”. Wéiriti meha lafiñen Moisesi luagu Heowá, adián?

Murusun dan lárigiñe, aba lariñagun Heowá houn ísüraelina lun hiñuragunu hakianpun-agei. Guñoun ligía, aba lasansiruni Heowá lubara dúeri, ábati líchuguni habadinagua ísüraelina hama ehiptuna. Búrigati luéigiñe oubaü le ñein habéi ehiptuna, ánheinti luéigiñe oubaü le ñein habéi ísüraelina harugoungati.

Ábati lariñagun Heowá lun Moisesi lun liñuruni lúhabu luagun barana. Aba ladügün Heowá lun láfurun aban garabali héreti sun áriebu. Ábati lafanreinragun lidunari barana lidan biama, aba ñein lan aban émeri labadinagua lúmagua. Sügütiña bandi míñunu ísüraelina luéigiñe múa mábeiti luagun le aban oubaü labadinaguagiñe bián baríeiru lauti duna.

Éibaaha hamutiña lisudaranigu faraón ísüraelina luéigiñe fánreinti mábeiti le baranahabei. Ábati ladügün Heowá lun ñein lan chagaguaü hadan ehiptuna. Aba lagumeserun tubalabala hakarün éiguaha. Ábati hagúaragun súdaragu: “Keimoun yáagiñe! Lageindaguña Heowá wama haweigiñe lumutuniña”.

Aba lariñagun Heowá lun Moisesi: “Iñurabéi búhabu luagun barana”. Ábati ladouragun barana hau súdaragu ehiptuna. Hilati faraón hau sun lisudaranigu. Úati erederuti wínwanñu.

Sunti gürigia ha luéigiñebaña le aban louba barana, gumesetiña eremuha lun halawahani Bungiu lau dimurei burí le: “Neremuhaba lun Heowá, lugundun arufuda laali lueirin luéirigun. Adügati lun hañaradagun gabayu baranaha hau sun ha agalufehabaliña”. Sun añaha lan gürigia eremuha, aba hagumeserun würiña abinaha áfareina panderu. Wéiriti meha hagundan súngubei ladüga séfuhaña lan.