Dawidi luma Saulu

Lárigiñe láfaruni Dawidi Goliadi, aba líriduni urúei Saulu kei hábuti lisudaranigu. Gáñeiti Dawidi bandi wuribu ábati weiri lan laganbahóun luagu. Sagü meha lagiribudun Dawidi lídangiñe wuribu heresibiruni würiña abinaheina luma eremuheina: “Áfarati Saulu milu eyeriñu, ánheinti Dawidi áfarati diisi-milu”. Ábati lasandirun Saulu gimugaü luagu Dawidi, aba labusenrun láfaruni hilagubei.

Gáfaraditi meha Dawidi árüpa. Aban weyu, dan aniha lan Dawidi áfara árüpa lun urúei Saulu, aba lachüürüni larufunte luagun Dawidi. Ouraméme ligía, aba lélemuchun Dawidi, ábati láchourun arufun luagu touba muna. Lárigiñe lira, álugati Saulu láfaruni Dawidi bandi wéiyaasu. Lagumuhóun, aba lanurahan Dawidi lidoun fulasu mageirawati, ábati laramudagun ñein.

Ñǘdünti Saulu hau 3,000 súdaragu éibaahei Dawidi lun háfaruni hilagubei. Beluti Saulu lídounmeme huyu luagu dübü le ñein lubéi laramudagua Dawidi hama wügüriña ha lúmabaña. Aba hariñagun wügüriña hagía lun Dawidi agülülüheina: “Anihán bichansin lun báfaruni Saulu hilagubei”. Ábati layarafadun Dawidi lun Saulu, aba líbugun murusun tídangiñe ladaüragun ibidiñounga lun Saulu. Lárigiñe, aba lasandiragun Dawidi lungua wuriba luagu marufudun lan inebesei lun urúei le lanúadirubei Heowá. Mígirunti Dawidi lun hábürühan wügüriña ha lúmabaña luagun Saulu. Dan le láfuridunbei Saulu lídangiñe huyu, aba lagúaragun Dawidi lun: “Daritina chansi lun náfarunibu ani madügün numuti”. Adügati san lira lun masigirun lan Saulu éibaahei Dawidi?

Uá. Sigiti Saulu éibaahei Dawidi. Aban áriebu, beluti Dawidi luma Awisái le libase aramudagueina tidoun likianpun Saulu. Larumuguña meha dandu Saulu kei Ábünerü, le óunigirubalin. Ábati lariñagun Awisái lun Dawidi: “Anihán wachansin! Ígirabana lun náfaruni Saulu hilagubei”. Lariñagati Dawidi lun: “Heowaba agidarei libagari. Ragǘ waméi larufunte luma lagei luniñe duna, keimoun”.

Aba lamudeirun Dawidi luagun aban wübü le ñéingiñe lubéi gayara lan tarihíniwa likianpun-agei Saulu. Ábati lagúaragun Dawidi: “Ábünerü! Ka uagu móunigirunbubalin burúeite? Hagéi lagei luniñe duna luma larufunte?”. Subudi lumuti Saulu lumalali Dawidi, ábati lariñagun lun: “Daritibu chansi lun báfarunina ani madügün bumuti. Subudi naali buguyaba lan iseri lurúeite Ísüraeli”. Ábati lagiribudun Saulu tidoun luban. Gama lumoun, miyereegunti meha Dawidi houn sun liduheñu Saulu.