Ida luba kristiánugu wamá luma lílana wamá ageiraü buítiña?

KA MEHA biama katei létima súdinibei lidan lani Hesusu ministeriu? Furumiñe, áfaaguati meha Hesusu lun lasansiruni hagaburi gürigia, mama lun lasansirunu óundaruni burí lánina polítika. Ariha waméi ka lan lariñagubei lidan Serumu luagu Wübü. Murusun dan lubaragiñe lariñagun Hesusu houn lani disipulugu ítara haña lan kei salu luma kei lanpu houn lílana ubóu, ariñagati meha houn gürigia gunda hamá “ha asubudirubalin luagu megei hamani lídehan Bungiu”. Ani ariñagati gúndaatiña lan giñe “ha ǘnabugubaña ani mabafu hagía”, “ha harumabaña anigi”, hama “ha awadigimaridubaña luagu darangilaü” (Matéu 5:1-11). Busenti meha Hesusu lun gunfuranda hamani ha afalarubalin bián katei: lunti lan lúaradun hagaburi luma lilurudun Bungiu, luagu le buídubei luma le wuribabei, luma lisudinin heseriwidun lun Bungiu tau sun hanigi.

Libiaman katei, gudemetiña meha gürigia ha asufurirubaña lun Hesusu ani íderagua lumutiña, gama lumoun mama meha lagumuchun lau sun asufuriruni lisuunibei (Matéu 20:30-34). Íbini areidaguagüda lan saragu gürigia ha meha sándibaña, magumuchagunti sandi (Lúkasi 6:17-19). Ruti gurasu houn ha óuserawagubaña, gama lumoun magumuchagunti marichaü. Ruti giñe éigini houn ha lamabaña, gama lumoun magumuchagunti ilamaü ubouagugiñe (Márükosu 6:41-44).

Sansi hamuti hagaburi gürigia ani rútiña awalidaguni houn

Ka uéigiñe labusenrubei Hesusu lasansirunu hanigi gürigia luma lun lawalidaguagüdüni hasufurirun? Ka uagu málugun lubéi lasansirunu óundaruni lánina polítika luma lun lagumuchun lau sun asufuriruni? Ladüga subuditi meha lun layusurubei lan Bungiu Larúeihan lun ladügüni lira (Lúkasi 4:43; 8:1). Ligíati, dan le meha hínchahanbalin lánigu disipulu lun lásügürün saragu dan areidaguagüdaña sánditiña, ariñagati Hesusu houn: “Keimoun lidoun burí líbiri fulasu le yarafabei, apurichiha náamuga giñe ñein, ladüga lun lira niabin ubouagun” (Márükosu 1:32-38). Íbini hualiguagüda lumuti lan meha Hesusu hasufurirun gürigia, létima súdinibei lun, lapurichihani luma larufudahani inarüni luagu Bungiu.

Uguñe weyu, apurichihatiña gefentiña luagu Heowá áyeihei le meha ladügübei Hesusu. Áfaaguatiña giñe lun hawalidaguagüdüni hasufurirun gürigia lau híderaguniña gürigia ha emegeirubalin. Gama lumoun, máfaaguntiña lun hagidaruni sun asufuriruni ubouagugiñe, ladüga chouru hamuti lagidarubei lan Larúeihan Bungiu (Matéu 6:10). Kei meha ladügüni Hesusu hóuchatiña hasansirunu hanigi gürigia mama lun hasansirunu óundaruni to lánina polítika. Richati katei le, lugundun libe-agei haturobulin gürigia mama lánina polítika, lánina ligaburi hanügüni gürigia habagari.

Lílana ageiraü buítiña

Afiñetiña gefentiña luagu Heowá mosu lan lílana hamá ageiraü ha buítiña. Ligíati, inebetiña lúrudugu lánina ageiraü houn, ani yusu hamutu hani agumeiraguagüdüni luma apurichihani lun hínchahaniña amu gürigia lun hadügüni ligiaméme. Gama lumoun, dan le hamuriahan gumadimatiña somu katei le kóntürati lun lilurudun Bungiu, madüraagun hamuti Gefentiña luagu Heowá lilurudun. Desidírühaña ‘haganbuni Bungiu lun hadügüni le lariñagubei lubaragiñe le hariñagubei wügüriña’ (Adügaü 5:29; Rómana 13:1-7).

Bisida hamutiña giñe gefentiña luagu Heowá sun gürigia lidan fulasu le ñein lubéi heredera lun haturiahanu Bíbülia hama sin haguburahan. Kei resultóu lánina wadagimanu le, íderaguaaña saragu míñunu gürigia lun hasansiruni hagaburi. Sagü irumu, íderaguatiña saragu san milu gürigia ígira luriban échuni kéiburi magíaguni, layusurún iyuri, düroga, átaguni luma áhureruni luagu seinsu. Sun gürigia ha sansihali habagari ani lílanaaña ageiraü ha buítiña, ladüga furendei hamaali le tariñagubei Bíbülia ani winwan hamuti.

Lanwoun lira, buídugüda lumuti le tarufudahabei Bíbülia habagari iduheñu. Luéigiñe aban oubaü, ínchaha lumutiña lun inebegua hamá hámagua, luéigiñe le aban oubaü, buídugüda lumuti giñe hanaagun familia houngua, úguchili tuma úguchuru, agübürigu hama isaanigu, luma íbirigu hámagua. Dan le derebugu hamá familia derebuguti giñe ageiraü.

Lárigiñe haliihani arütíkulu burí le, ka san hasaminarubei? Ánhatu san Bíbülia lun lamigisirun relihión luma polítika? Furanguti óunabagülei: uá. Íbini ítara, sun kristiánugu mosu lílana hamá ageiraü ha buítiña. Ida? Lau ítara hamá kei salu luma kei lanpu houn lílana ubóu kei meha lariñaguni Hesusu.

Ha afalarubalin ladundehan Kristu ibihatiña buiti hóuniwagua luma houn hafamilian, luma giñe lun fulasu le ñein lubéi hawinwanda. Anhein busén hubéi hasubudiruntima ida liña lan ladügǘniwa wadagimanu lánina arufudahani tídangiñeti Bíbülia le lidan fulasu le ñein lubéi heredera, amisuraha wamutün lun hayanuhan hama gefentiña luagu Heowá lidan fulasu le ñein lubéi haganóua.a

[Abürüduni]

[Ariñahani lidan létüra wéinamuti lidan páhina 7]

Áfaaguati meha Hesusu lasansirunu hanigi gürigia, mama lun lasansirunu óundaruni burí lánina polítika

[Ariñahani lidan létüra wéinamuti lidan páhina 8]

Afiñetiña gefentiña luagu Heowá mosu lan lílana hamá ageiraü ha buítiña