“Aganóutiña bóugudi luéi hageira” eseriwida úara lun Bungiu inarüniti

1. Ka igaburi harufudubei besafu gürigia hawagu terencha, ani ka uagu chara habéi?

KEI warihini lidan arütíkulu le ásügürübei, añahein gürigia ha mínsiñehabutiña houn terencha iyereegu hagía houn. Gama lumoun, gürigia ha saminabaña buídutima hamá hawéi lílana amu ageiraü, mama arufudarügütiña menebenehabu hamá arufudatiña giñe lougua lan hasubudin. Ariñagatu aban líburu gíritu The Races of Mankind: “Kei tariñaguni Bíbülia íbirigu sun gürigia meberesenga ka lan harasanbei”. Gayarati ámuñegueinarügü lan hagaburi íbirigu, gama lumoun súnwandan íbirigumeme hamá.

2, 3. Ida liña larihiniña Heowá gürigia ha awinwandubaña bóugudi luéi hageira?

² Le linarün katei, lidan sun ageiraü añahein terencha. Susereti meha katei le íbini lidan binadu néchani Ísüraeli, néchani le meha úmabei ladügei Heowá daradu lánina Lúrudu lun espechali lan meha lumadagua hama lílana. Lidan meha Lúrudu ligía ariñawagúati meha ka lan gayarabei hadügüni terencha luma le moun lubéi hadügüni, gama lumoun, ariñawagúati meha giñe houn ísüraelina lunti lan hóuseruniña terencha lau richaguaü luma inebesei. Ítarameme liña giñe wóuseruniña wagía kristiánugu sun gürigia, úati himei wamá aban gürigia luéi amu ani masaminarun wagía wuriba hawagu lubaragiñe wasubudiruniña. Ítara liña gunfuranda wamani kei lariñagun apostolu Féduru, “úati lan himei lan Bungiu aban gürigia luéi aban, lubaragiñe lira, resibirügü lumutiña sun ha inebehabubaña lun ani adüga haméi le buídubei, lídangiñe hamá yebe furumiñeguarügü néchani” (Adü. 10:34, 35).

³ Buiti le meha hasagarubei terencha ha meha awinwandubaña haganagua ísüraelina, arufuda lumuti ida liña lan larihiniña Heowá ha awinwandubaña bóugudi luéi hageira. Saragu irumu lárigiñe, ariñagati apostolu Pábulu: “Habungiuterügüñein funagia huríu Bungiu? Ma funagia Habungiute giñe ha mámabaña huríu? Habungiute giñe” (Rom. 3:29; Hoe. 2:32).

4. Ka uagu gayara lubéi lariñawagún ua hamá terencha lidan “Ísüraeli le lani Bungiu”?

⁴ Yusu lumuti Heowá iseri daradu lun lanúadiruni damuriguaü le hani kristiánugu anuadirúaaña lun espechalibei lan buga lanaagun lungua hama, hagíati subudiwabaña uguñe weyu kei “Ísüraeli le lani Bungiu”, ábati máhaali lan buga lun binadu Ísüraeli kei aban néchani anuadirúaali (Gal. 6:16, NM). Ariñagati Pábulu houn lílana iseri néchani le: “Mámaali katei lánina huríu humá o mama humá huríu, ni lánina heresibiruni seini luagu húgubu o meresibirun humani, ni lánina terencha humá, machülaaguntiña, idamuni o líbüretiña; Kristu, ligía sun káteibei, ani anihein giñe hadan sun lánigu” (Kol. 3:11). Ligíati gayara lubéi lariñawagún ua hamá terencha haganagua kristiánugu anuadirúaaña.

5, 6. a) Ka álügüdahani gayarabei liabin lidoun wachügü libügürü profesía le lídanbei Isaíasi 61:5, 6? b) Kátaña san “lufadirinigu” Heowá hama “terencha” ha uágubaña ladimureha Isaíasi? c) Ka katei lunbei hadügüni dandu “lufadirinigu” Heowá kei “terencha”?

⁵ Guentó, teni wamá lun le lariñagubei profesía le lídanbei kapítulu 61 tidan liliburun Isaíasi, profesía le agunfulirubei luagu damuriguaü hani kristiánugu. Ka uagu lariñaga bérusu 5 luma 6 luagu ñéinbaña lan buga “terencha” ídeha hamá “lufadirinigu” Heowá?

⁶ Kristiánugu anuadirúaaña fádirigu ha, ani hagíaba gafanran lidan “furumiñeti ásaaruni lídangiñe óunweni”. Ani “lufadirinigubaña Bungiu luma Kristu; ábame harúeihan úara luma luagu milu irumu” (Aruf. 20:6). Gama lumoun, añahein amu kristiánugu úaraguatiña ha hemenigibaña hawinwandun lun súnwandan ya ubouagu, mama hawinwandun sielu hemeniginbei. Kristiánugu úaraguatiña ha, hagía “terencha” ha wéiribei hídehan hama ha hemenigibaña houdin eseriwida sielu. Lau sun hagundan, ídehatiña hama “lufadirinigu” Heowá hawadigimariduña kamá hamuga ‘hóunigiruña ichari’ luma ‘beibei-agei’. Hídehaña lun lichugún uéiriguni lun Bungiu lau hapurichihan, adüga hagía iseri disipulugu. Ítarati, dandu kristiánugu anuadirúaaña kei “amu mudún” háluahañanu gürigia haruma tanigi ha busenbaña heseriwidun lun Bungiu lun súnwandan ani hóunigiruñanu lau ínsiñehabuni (Huan 10:16).

“AGANÓUTIÑA BÓUGUDI LUÉI HAGEIRA” KEI MEHA ABÜRAÁMÜ

7. Ka idan genegegua wamá wagía kristiánugu hama lubúeingu Bungiu úaraguatiña ha meha lídanbaña binadu dan, kéiburi Abüraámü?

⁷ Kei wafurendeiruni lidan arütíkulu le ásügürübei, ítara waña wagía kristiánugu inarünitiña keisi terencha o aganóutiña bóugudi luéi hageira lidan ubóu le lábugiñebei lubafu Satanási. Lidan katei le genegegua wamá hama fiú lubúeingu Bungiu ha lánina binadu dan ha meha úaraguabaña, kéiburi Abüraámü, ha meha ariñagubaña “mama lan hageira ubóu le” hawinwanduña lan “keisi terencha ya ubouagu” (Ebü. 11:13). Ka lan yebe wemeniginbei, wawinwandun sielu o ubouagu, ítara liña ligaburi wanaagun woungua luma Heowá kei meha ligaburi lanaagun Abüraámü lungua luma. Ariñagati Santiagu, luagu “afiñeti [lan] meha Abüraámü luagu Bungiu; aba labahüdǘn keisi wügüri richaguati [...]. Ani ariñawagúati luagu Abüraámü, ‘lumada Bungiu’” (Sant. 2:23).

8. Ka füramase lubéi Bungiu lun Abüraámü, ani ka meha katei lachoururubei Abüraámü?

⁸ Füramaseti Heowá lun Abüraámü layusurubaña lan ladügawagun lun labiniruniña sun néchani ha ubouagubaña, mámarügübei aban néchani labinira (aliihoualá Agumesehani 22:15-18). Lau sun meha gíbegili lan dan lun lagunfulirun füramasei le ladügübei Bungiu chouru lumuti meha Abüraámü lagunfuliruba lan. Winwan lumuti libe-agei dan lidan libagari kei terencha lidan ámuñegueinarügü fulasu ligía hau liduheñu, ani lidan sun dan ligía, madüraagun lumuti lumadagua luma Heowá.

9, 10. a) Ka wafurendeirubei lídangiñe hénpulu le líchugubei Abüraámü? b) Ka amisurahani gayarabei wadügün houn amu gürigia?

⁹ Íbini meha ibidiñe lan lun Abüraámü átiribei lan buga dan lagurabahan, mígirunti lun lalouguadun línsiñehabu lun Bungiu ani súnwandan meha lagunfulirun luma. Súnwandan meha lasaminarun Abüraámü luagu füramasei le ladügübei Bungiu lun, ligíati máluahan lubéi aban ageiraü lun lageirame gumugua dan (Ebü. 11:14, 15). Kati wafurendeirubei lídangiñe hénpulu le líchugubei? Súdini lan lun sensiyu lan wanügüni wabagari, maweirin ligíame wadiheridun luagu umegeguni, ni luagu wéirigu lan hanügüniwa gürigia, luma lun buidu lan lidin woun lidan wawadigimari. Kaba un hu lan wáfaagun lun ítara lan wabagari kei sun ha híbiri gürigia lidan aban ubóu le málühali agünrinchawagúa? Kagia un hu lan wíchuguni wemenigin luagu katei burí le lunbei madurabei lan? Ítara kei meha Abüraámü, wagurabahaña katei buídutimati ani desidírühadiwa wagurabahaba lan lau gaguraasuni darime warihini lagunfulirun le uágubei wemenigida (aliihoualá Rómana 8:25).

¹⁰ Anihagua Heowá amisurahaña gürigia ha lídangiñetiña sun néchani lun gafanran hamá lídangiñe abinirúni le lunbei liabin hádangiñe ladügawagun Abüraámü. Hasubudiragüdüñein “lufadirinigu” Heowá —kristiánugu anuadirúaaña— hama “terencha” —ha amu mudún— amisurahani le lidan sun fulasu ubouagu lidan lóugiñe sisi-san iñeñein.

HÍNSIÑETIÑA GÜRIGIA LÍDANGIÑETIÑA SUN NÉCHANI WOUN

11. Furíei le ladügübei Salomón, ka katei larufudubei hawagu terencha?

¹¹ Lidan irumu 1026 lubaragiñe lidaani Hesusu, dan le lefeduhóunbei tóunwenbudun ténpulu, arufuda lumuti Salomón le lasandirubei lidan aban lubuidun furíei. Úaragu luma füramasei le ladügübei Bungiu lun Abüraámü, arufudati dimurei burí le lariñagubei Salomón lidan furíei ligía hóundaraguba lan buga gürigia lídangiñetiña sun néchani lun halawahani Heowá: “Íbini anhein aban lubéi terencha, aban le mama hádangiñeti bumutuniña, ladügame laganbahóun luagu biri ábame liabin lídangiñe múa díseti, ani aba lafurieidun ariheina tuagun ténpulu, keime laganbahóuba lan layanuhóun luagu luéirigun biri luma luagu óunwenbu bubafu, aganbabéi lúmagiñe siélugiñe, lúmagiñe fulasu le ñein lubéi baganawa, subudi hamaamugabu néchanigu ubouagu ani rubeime le lamuriahan buma ru hagíame uéiriguni bun kei hadügüni bumutuniña Ísüraelina, ani gunfuranda hamaamugei luagu wawa lan biri tidan ténpulu to” (1 Uru. 8:41-43).

12. Ka uagu añahein lubéi gürigia saminatiña madügün hamani gefentiña luagu Heowá le lunbei hadügüni?

¹² Terencha, gürigia le awinwandubei lidan aban ageiraü le mama lageira. Ítara haña gefentiña luagu Heowá kei terencha. Lóugiñe sun katei, füramase haaña úaraguabaña lan lun Larúeihan Bungiu le ídanbei Hesukrístu lan Urúeibei. Ligíati mádaragun habéi houngua lidoun polítika, íbini samina hamá gürigia lunti lan hamuga hadügüni.

13. a) Ka uagu le lubéi unbei letenira aban gürigia hawagu terencha ligía lan gánibei efekütu luagu ligaburi larihiniña? b) Ka uagu subudi wabalin luagu mama lan lisuuni Heowá lun ámuñegueinarügü lan hanechanin gürigia?

¹³ Inarüni, subudiwa hamá gürigia terencha ladüga amu lan hañeñe, hechun, ligaburi hariawagún o ligaburi hasansiragun. Gama lumoun, meberesenga ka lan hageirabei, gíbetimati katei le ídanbei genegegua hamá hama lílana sun le líbiri ageiraü sügǘ lau katei burí le ídanbei amu hamá. Ligíati, anhein anihein lubéi gürigia asaminaruti luagu amu hamá terencha luéi, lúnrügü liña katei le ídanbei amu hamá luéi letenira. Gama lumoun, dan le wafurendeirun arihei mámarügü katei le ídanbei amu hamá terencha wawéi —inarüni lan yebe o lídanrügüñein lan wasaminan—, aba wíchugun fe luagu le lan linarün katei aban lan wabu súngubei wagía. Lau sun luwuyeri, lun hamuga ábanrügüñein lan urúei agumadihei sun ubóu, úabaña yebe terencha. Ani ligía lisuunibei Heowá houn gürigia lúmagiñe furumiñeti dan: lun hawinwandun súngubei lidan aban kei ábanrügü familia lábugiñe ábanrügü arúeihani, Larúeihan Bungiu. Gayarati funa san lasuseredun aban katei ítarati uguñe weyu?

14, 15. Ka katei hínsiñebei houn gefentiña luagu Heowá hawagu gürigia ha lídangiñetiña amu néchani?

¹⁴ Lidan ubóu le, le ídanbei hawouguounrügü lan gürigia hasaminara ani sandigua hagía houngua kamá buídutimatiña hawéi lílana amu néchani, gúndaatiwa wadarirun gürigia ha hínsiñehabutiña houn gürigia ha lídangiñetiña furumiñeguarügü néchani. Gayarati hénrengubei lan masaminarun wamá wuriba hawagu amu gürigia ladügarügü lídangiñetiña lan amu néchani. Aban wügüri gíriti Ted Turner gürigia le agumeserubei aban bísinisi gíriti CNN le íchugubei programa lun saragu kanali tidan bigibigitu, le meha awadigimaridubei hama gürigia ha hulilibei aturiahan lídangiñetiña ámuñegueinarügü ageiraü, ariñagati: “Aban sügǘ hanarimeti lubuidun nasubudiruniña wügüriña hama würiña ha. Aba marihinaaña lan kei terencha, aba nagumeserun arihaña kei lílana ubóu kéigubeirügü au. Aba mínsiñeeli lan nun naganbuni dimurei terencha ladüga laganóun nun kamá wayanuhaña wuriba hawagu gürigia, aba máhaadina lan lun layusurúniwa dimurei le lidan CNN, dandu tigibugiñe kámara kei tanagangiñe. Lubaragiñe lira, mosu meha wariñagun lílana amu ageiraü”.

¹⁵ Lidan sun ubóu, gefentiñarügüñanu luagu Heowá áyeihei ligaburi lisaminan Bungiu lidan katei le, ani dandu lidan hasaminan kei tidan hanigi marihin hamutiña gürigia ha lídangiñetiña amu ageiraü lau iyereehabúni. Lubaragiñe hasaminarun wuriba hawagu gürigia ha lídangiñetiña amu néchani o hóuseruniña wuriba, hínsiñerügüti katei burí le ídanbei amu hamá gürigia lídangiñetiña amu néchani hawéi houn, luma burí katei le hayaraabei adüga. Ráramaguaadün san asaminara luagu lisudinin katei le, luma lubuidun efekütu le lánibei lidan ligaburi hanaagun hungua hama amu?

ABAN UBÓU LE ÑEINBA LUBÉI UA HAMÁ “TERENCHA”

16, 17. Ida luba san wabagari danme le gúnfulihali füramasei le lídanbei Arufudúni 16:16 luma Danieli 2:44?

¹⁶ Yarafa madise, lidan lagumuhóun wuribu “le gíribei Arümahedón lidan hererun ebüréu” lóundaraguba sun néchani le uguñebei weyu kóntüra larúeihan Bungiu, hagagibudaguba luma Hesukrístu hama lisudaranigu ha siélubaña (Aruf. 16:14, 16; 19:11-16). Sügühali lóugiñe bián-milu-seingü-san irumu, lúmagiñe labürüdün Danieli aban profesía libügürü lagünrinchawagun sun arúeihani le kóntürabei lun lagunfuliruni Bungiu lisuuni, ariñagati: “Lídanme lidaani harúeihan urúeigu ha, ladügüba Bungiu le siélubei aban arúeihani le siñabei lagünrinchaguni ni lagumadiruni ni aban néchani, günringuarügü lubéi arúeihani ligía sun líbiri arúeihani sunsuinagubei, ábame ladurarun lun súnwandan” (Dan. 2:44).

¹⁷ Ráramaguaadün san asaminara ida luba lan hibagari danme le gúnfulihali füramasei le? Úaalime afadaraguni le hadügübei gürigia lun hafanreinraguni burí ageiraü, ítarati úaañame terencha. Lídounme dan ligía, furumiñeguarügüme katei lidan ligaburi wariawagún le adügüti lun amu wamá hawéi ha híbiri arufudarügü lubéi lubuidunmeraü ámuñegueinarügü katei le ladügübei Bungiu. Ma lubuidun katei burí le lunbei wawinwanduni ámuñegü! Chóuruti buídubei lan resultóu le lunbei wibihini ánhawa adügei sun wayaraati lun walawahani Heowá, Bungiu le adügübaliwa, ru wagíame uéiriguni lun.

18. Ka katei arufudubalin luagu gayara lan mafalarúniwa lan katei burí le afanreinragubaliña gürigia lídangiñetiña ámuñegueinarügü néchani?

¹⁸ Gayarati funa san marihin hamaniña lílana aban ageiraü gürigia lídangiñetiña amu ageiraü kei terencha? Anha, gayarati. Gébunati wafiñerun luagu ítara luba lan. Le linarün katei, úati súdini lan woun wagía gefentiña luagu Heowá ka lan hanasiñunbei wíbirigu lidan afiñeni. Aban hénpulu, lun ménrengutima lan letenirún lun wadagimanu lánina lasubudiragüdüniwa uganu buiti luma lun buídutima lan ladügǘniwa, mameme binarü aba tóundarawagun fiú Beteli lidan aban (Mat. 24:14). Dan le ladügǘnbei óundarawaguni le, mafalarúnwati katei burí le afanreinragubaliña gürigia lídangiñetiña amu burí néchani, meredehanrügü laaña ligía lúrudu. Arufudati giñe katei le woun luagu agañeireina liña lan Hesukrístu, Urúei le lanúadirubei Heowá, lidan lageindagun lun ua lan ni kata afanreinragutiña gürigia. Ani málühali ‘agañeira’ sunsuinagubei! (Aruf. 6:2.)

19. Ka buiti lanügübei wáhuduragun lun Heowá lidan aban?

¹⁹ Wagía gefentiña luagu Heowá lídangiñetiwa ámuñegueinarügü ageiraü ani ayanuhatiwa ámuñegueinarügü iñeñein, gama lumoun súngubei wagía áfaaguatiwa lun wáhuduragun lun Heowá lidan aban mafanreinragunga (aliihoualá Sofoníasi 3:9). Íbini wawinwanduña lan lidan ubóu wuribati le, mama lánigu ubóu le wagía. Lau sun lídangiñetiwa lan ámuñegueinarügü ageiraü weseriwiduña lidan aban lun Heowá ani arufuda lumuti katei le ida luba lan ubóu ámuñegü: úabaña terencha. Lídounme dan ligía, gachansinbei kada aban wádangiñe lun larufuduni luagu inarüni lan le tariñagubei líburu to buga wíriduboun: “Kei tariñaguni Bíbülia íbirigu sun gürigia meberesenga ka lan harasanbei” (The Races of Mankind).