Wéiyaaña lidan afiñeni, híchuguba san dǘgüdaguaü “houn ha buchaañabaña uagu”?

Anihein murusun iwanimaü tuagu Ánhela,a aban íbiri mamarieidungiru to gúnfuliharu lóugiñe darandi irumu. Tagurabahañein hachülürün wéiyaaña lidan afiñeni ha lídanbaña damuriguaü le ñein tubéi ani álügüdaguatu tungua kaba lan funa hariñaga tun. Inarüni luagu anihein lan dan midin tan adamuridagua, ladüga dan le tachülürün túbiñoun wéiriti lubucha tuagu lárigi tuadigimaridun sun weyu óunigira gürigia wéiyaaña. Ani lanwoun idiheri le ídangiñebei tásügüra sagü weyu, nidiheritu giñe luagu túragu túguchu.

Lun hamuga huguya lan aban hádangiñe wéiyaaña ha lúnbaña houdin bisidoun Ánhela, kaba hamuga hadüga lun híchugun dǘgüdaguaü tun? (Her. 31:25.) Ida luba hamuga haranserun lubá hidin bisida aban gürigia hádangiñe ha “buchaañabaña uagu”, ítara kei Ánhela, lun híchugun dǘgüdaguaü lun?

SAMINA HUMÁ LUAGU LE GÁDANBALIÑA HÍBIRIGU

Súngubei wagía anihein dan labuchadun wawagu, ani háfuga ladüga wadagimanu o ladüga somu buligasion lidan weseriwidun lun Heowá. “Aba nasandirun lalouguadun nere”, liña profeta Danieli lárigiñebei larihin aban arufudúni le siñá lubéi gunfuranda (Dan. 8:27). Dan lárigiñe, aba lasaliragun ánheli Gabüriéli lun lun líderaguni lun gunfurandalani arufudúni le larihibei ani chóurugüda lumuti lun aganba laali lan buga Heowá lafurieidun ani ariha lágili lan kei aban wügüri le ‘wéiriti línsiñe lun’ (Dan. 9:21-23). Ani lidan amu ókaasion, ruti ábanya ánheli dǘgüdaguaü lun profeta buchaali uagu le lau burí dimurei le lemegeirubei laganbun (Dan. 10:19).

Ligíati, lubaragiñe hidin bisida aban íbiri le buchaali uagu o le maguraasunhali samina humá luagun furumiñe. Ka turóbuli úmabei lagagibudagua? Ida liña gayara lan ladügün turóbuli ligía lun labuchadun luagu? Ka igaburi buiti larufudubei? Ariñagati Richard, le barühalibei lóugiñe wein irumu eseriwida kei wéiyaali lidan afiñeni: “Lúntima lubuidun igaburi le hawagubei níbirigu netenira. Ariha naali nungua ménrenguntima lan níchuguni dǘgüdaguaü le hemegeirubei houn dan le nakutihani le gádanbaliña lubaragiñe nidin hábiñe”. Anhein lídiba lubéi amu wéiyaali lidan afiñeni huma, buídubei hakutihani le gádanbalin íbiri ligía úara.

ÁFAAGUA HUMÁ LUN BUÍDUBEI LAN HASANDIRAGUN ÍBIRIGU HOUNGUA

Másiñati ariha humaali lan hungua masandiragun wamá woungua buidu dan wadimurehan luagu le wasandirubei tidan wanigi, ligíati, gayarati hénrengubei lan lun aban íbiri ladimurehan luagu le lasaminarubei houn wéiyaaña lidan afiñeni. Kaba hadüga lun masuseredun lan lira? Gayarabei lídehan háhayachun luagun yusu hugíame dimurei burí le ruti dǘgüdaguaü. Dan le lidin Michael, le barühalibei lóugiñe bián-wein irumu eseriwida kei wéiyaali, bisida aban íbiri lun líchugun dǘgüdaguaü lun héchuti ariñaga: “Labisidahaniña aban wéiyaali lidan afiñeni íbirigu hábiñe lun buídutima lan lasubudiruniña, ligía aban lídangiñe katei le hínsiñetimabei lun lídangiñe sun luadigimari. Ligía buga weiri lubéi nabusenrun niabin uguñe”.

Buídubei hagumeseruni bisida lau hadügün aban furíei tídangiñe sun hanigi. Dan meha lafurieidun apostolu Pábulu, adimurehati meha keisi ladüna luagu hafiñen, hínsiñehabu luma hawandun líbirigu (1 Tesa. 1:2, 3). Dan le hariñagun lidan furíei hínsiñe lan lubuidun igaburi le larufudubei híbiri hun, aranse humutu dandu hanigi kei lanigi lun libihíniwa dǘgüdaguaü lidan bisida ligía. Ani gayarabei giñe lanügün hiyanun awalidaguni lun. Ariñagati Ray, aban íbiri le barühalibei saragu irumu eseriwida kei wéiyaali: “Anihein dan, aba wabulieidagun luéi lubuidun resultóu le wibihubei lidan weseriwidun lun Bungiu, ligíati ibiha wabéi dǘgüdaguaü dan le laritaguagüdüniwa woun”.

YUSU HUMÓUN BÍBÜLIA LUN HÍCHUGUN DǗGÜDAGUAÜ

Ítara kei Pábulu, gayarati giñe híchuguni ‘abinirúnimeme le líchugubei lani Bungiu sífiri hun’, o híchugun dǘgüdaguaü houn híbirigu, ánhadün ayusura íbinirügü aban bérusu tídangiñe Bíbülia (Rom. 1:11). Aban hénpulu, másiñati samina lan aban íbiri le sándibei lau íruni huliliti mebegi lan ni kata. Gayarati hadimurehan lun luagu abürühati Sálumu le meha ariñagubei sandigua lan lungua kei ‘aban weiriei mutu móuniti ani bulíeiwaali’, ani lau sun lira, ariñagamémegili: “Mabulieidagungidina luéi bugumadin!” (Sal. 119:83, 176). Lárigiñe hafuranguagüdüni bérusu le murusunraü, gayarati hariñagun lun íbiri chouru humani luagu mabulieidagungili lan giñe luéi lugumadin Bungiu.

Lun gayara lan hachülürün tidoun tanigi aban íbiri to marufudunhaaru ubebeni lidan teseriwidun lun Bungiu o to gayarati madamuridagunhaaru lan, gayarabei hayusuruni hénpulu luáguti aban gáwanaü le eferidirubei tuéi aban würi (Luk. 15:8-10). Másiñati lídangiñeti lan meha aban iñari gebegiti le adügǘbei lau saragu gáwanaü le lauti pülata gáwanaü ligía. Lau ariñahani le, houcha humá lun gunfuranda tani íbiri tuguya luagu aban lan hádangiñe íbirigu ha gebegibaña lidan damuriguaü tuguya. Gayarahalimeti hariñagun tun luagu weiri lan berese lan Heowá tau, ladüga aban lan hádangiñe lánigu mudún tuguya.

Hínsiñeti houn saragu íbirigu hadimurehan luagu burí bérusu tídangiñeti Bíbülia, ligíati, mámarügülá hugía adimureha. Lárigiñe haliirun aban bérusu le gayarati lahuudun lun le gádanbalin aban íbiri, anúadira humá aban o fiú dimurei súdiniti, ábameti hálügüdüni ka lan lasaminarubei. Aban hénpulu, gayarati haliiruni 2 Korintuna 4:16, ani álügüda humeime: “Sandí humaali san líchugun Heowá erei hun lun hubaruaguounméme humá?”. Gayarabei ladügün katei le lun hibihin “gurasu” dandu huguya kei ligía (Rom. 1:12).

Gayarati giñe híchugun gurasu lun aban íbiri ánhadün adimureha luagu somu gürigia le uáguti tadimureha Bíbülia le meha ásügürübei lídangiñe somu sügǘ libe le ídangiñebei lásügüra. Aban hénpulu, anhein maguraasunhali lubéi másiñati lasansiragun lungua kei Ana o kei Epafurodítu, ha meha asandirubaña lau íruni huliliti somu dan, lau sun lira gebegimémegiña meha lun Bungiu (1 Sam. 1:9-11, 20; Fili. 2:25-30). Ligíati, danme gayara lan, buídubei lun hakutihani lani somu gürigia le uágubei tadimureha Bíbülia hénpulu.

SIGÍ HUMÁ ARUFUDA GEBEGI HAMÁ ÍBIRIGU HUN

Harufuduba gebegi hamá híbirigu hun tídangiñe sun hanigi ánhadün ebereseraméme hau lárigiñe habisidahaniña (Adü. 15:36). Háfuga lubaragiñe háfuridun hábiñegiñe, gayarabei hadügün aransehani hama lun háfuridun apurichiha úara. Samina humá luagu le ladügübei Bernardu, aban íbiri le lǘhali eseriwida kei wéiyaali lidan afiñeni. Dan leya larihin aban íbiri le málügili lúmagiñe labisidahani, másiñati ladimurehan lun luagu somu adundehani le líchugubei lun lau lálügüdüni lau duari: “Ida liña lidin hun lau le uágubei wayanuha?”. Ánhadün eberesera hau híbirigu gayarabei híchugun fe anhein mégeigiña lubéi ídemuei.

Mégeitimahaña íbirigu hasandirun luagu góunigiwa hamá, gunfurandawa hamá ani hínsiñewa hagía uguñe weyu sügǘ luéi amu dan (1 Tesa. 5:11). Ligíati, lubaragiñe hidin bisidaña íbirigu lun híchugun dǘgüdaguaü houn, samina humá luagu le gádanbaliña furumiñe. Amuriaha humá ídemuei luma Heowá ani, lau duari, anúadira huméi bérusu burí tídangiñeti Bíbülia le lunbei haliihani. Ítara, hadariruba dimurei buiti lun híchugun dǘgüdaguaü houn ha “buchaañabaña uagu”.