Gaganbadi wamá houn wéiyaaña lidan afiñeni ha líridubaña Heowá

1, 2. Ka lafuranguagüdübei Heowá woun lau konpararügua lan lungua luma aban hóuniri mudún?

KONPARARÜGUATI Heowá lungua luma aban hóuniri mudún (Ese. 34:11-14). Íderagua lumutiwa le lun warihini ka lan ligaburibei. Aban hóuniri mudún le hínsiñehabuti téniti houn mudún ha lábugiñebaña laríaahan lun masufurirun hamá dañu ani góunigiwa hagíame buidu. Barǘ lumutiña eiga sagadi le buiti luma lidoun fulasu le ñein lubéi gayara lan hatun duna (Sal. 23:1, 2); téniti houn wéyuagu áriebu (Luk. 2:8); góunigi lumutiña hawéi animaalugu ha gayarati hadügün dañu houn (1 Sam. 17:34, 35); ha sun liña hameilihóun barǘ lumutiña larünarugu (Isa. 40:11); áluaha lumutiña ha féridihañabaña ani góunigi lumutiña ha aniheinbei somu buleseiti hawagu (Ese. 34:16).

² Kei le ábunaguni lan luma hounigirún animaalugu hawadigimaribei binadu ísüraelina, ménrengunti meha gunfuranda hamani ka lan mini lubéi konpararügua lan Heowá lungua luma aban hóuniri mudún. Mégeitiña mudún hounigirúniwa buidu. Ani ligiaméme asuseredubei hama gürigia, mégeitiña hounigirúniwa lun herederun yarafa lun Bungiu (Mar. 6:34). Anhein metenirúniwa houn ani madundehóun hagía lidan lémeri Bungiu, súfuritiña. Ménrengunti héiguadun lidoun katei mabuidunti, ani aba hadireirun luéi üma le harumabei ítara kei heferidiragun “mudún móuniritiña” (1 Uru. 22:17). Gama lumoun, ru lumuti Heowá hemegeirun lumutuniña houn.

3. Kaba wakutiha lidan arütíkulu le?

³ Súdiniti arufudagua lan Heowá lungua kei hóuniri mudún íbini uguñe weyu. Anihagua Heowá óunigiraña lubúeingu, ha ítarabaña kei mudún. Ariha waméi ida liña lan ladundehaniña ani ruléi le hemegeirubei houn, ani ida luba lan hóunabun lun ínsiñeni le larufudubei Heowá houn.

RUTI HÓUNIRI MUDÚN LE BUÍDUTIMABEI ÓUNIRI BUÍTIÑA

4. Ka luadigimaribei Hesusu lidan hounigirún lánigu Heowá mudún?

⁴ Írida laali Heowá Hesusu Lichügüdiname damuriguaü kristiánu (Efe. 1:22, 23). Hesusu “hóuniribei mudún buiti”, ligiaméme katei uágubei luadigimarida kei Lúguchi, ligiaméme lisuunibei ani ligiaméme ligaburibei luma Lúguchi. Ru lumuti “libagari hawagu mudún” (Huan 10:11, 15). Aban óunwenbu abinirúni lani Kristu sákürifisiu houn sun gürigia ubouagu (Mat. 20:28). Le linarün katei, busenti Heowá “lun sun lan ha afiñerutiña luagu [Hesusu], meferidirun hamaamuga, gabagarirügü hamaamuga aban ibagari magumuchaditi” (Huan 3:16).

5, 6. a) Ka líridubaña Hesusu lun hadundehaniña mudún? b) Ka lunbei hadügüni mudún lun hasagarun buiti hámagiñe óunigirutiña ha líridubaña Hesusu? c) Ka resun méiniti le uágubei lunti lan gaganbadi wamá houn wéiyaaña lidan afiñeni?

⁵ Ida liña harufudun mudún resibi hamani Hesukrístu keisi Hóuniri? Hesukrístu guánarügü ariñagubei: “Subudi hamuti nilügüniña mudún numalali, subudi numutiña giñe, ani falá hamutina” (Huan 10:27). Laganbúniwa lumalali Hóuniri mudún le Buídutimabei mini lan lasigirún ladundehan lidan sun katei, kéiburi wasigiruni hadundehan íbirigu ha írida láañabaña. Ariñagati meha Hesusu mosu lanme hasigiruni lánigu apostolu hama disipulugu wadagimanu le meha lagumeserubei. Mosu meha harufudahan houn ‘lánigu’ ani góunigi hamañame lau ínsiñeni (Mat. 28:20; aliiha huméi Huan 21:15-17). Dan le laburuchagunbei uganu buiti lidan sun Ubóu ani aba haganwoundun disipulugu, aba líridun Hesusu kristiánugu ha derebuguti hafiñen lun hetenirun lun damuriguaü (Efe. 4:11, 12).

⁶ Dan le meha layanuhanbei apostolu Pábulu houn óunigirutiña ha meha lídanbaña damuriguaü le Éfesubei lidan furumiñeti sígulu, ariñagati houn írida laaña lan sífiri sandu lun ‘hóunigiruniña afiñetiña’ (Adü. 20:28). Gayarati lariñawagún ligiaméme hawagu wéiyaaña lidan afiñeni uguñe weyu, lugundun lun hiridún kei óunigirutiña lidan damuriguaü mosu hagunfulirun lau burí katei le abürüdǘbei tidan Bíbülia lau lídehan sífiri sandu. Ligíati, dan le gaganbadi wamá houn, arufudatiwa inebesei lun Heowá luma lun Hesusu, bián Hóuniri mudún ha wéirigutimabaña (Luk. 10:16). Chóuruti anihán lan resun le méinitimabei lun gaganbadi wamá houn wéiyaaña lidan afiñeni. Gama lumoun, mámarügüñein ligía.

7. Ida liña híderagunün wéiyaaña lidan afiñeni akipura aban buiti umadaguaü luma Heowá?

⁷ Dan le hadundehaniña wéiyaaña lidan afiñeni híbirigu lidan damuriguaü, yusu hamutu Bíbülia lun híchugun dǘgüdaguaü luma eweridihani houn. Ani dan le híchuguni adundehani ligía, mama lun hariñaguni ida luba lan hawinwanduni habagari (2 Ko. 1:24). Adüga hamuti lun híchugun adundehani tídangiñeti Bíbülia le lunti líderaguniña desidírü buidu luma lun ñein lan darangilaü lidan damuriguaü (1 Ko. 14:33, 40). Wéiyaaña lidan afiñeni ‘óunigirubarun hawani’ íbirigu. Arufudati le busén hamá lun hakipurun íbirigu aban buiti umadaguaü luma Heowá. Ligíati, hídehaba lau lóufudagun anhein hariha héiguamemeeli lan —o héiguaali lan— somu íbiri “lidoun figóu” (Gal. 6:1, 2; Hud. 22). Ma buiti resun le lun ‘gaganbadi wamá houn ha arufudahabaña woun’? (Aliiha huméi Ebüréu 13:17.)

8. Ida liña hóunigiruniña wéiyaaña lidan afiñeni lumutuniña Bungiu?

⁸ Apostolu Pábulu, aban meha giñe wéiyaali lidan afiñeni, abürühati houn líbirigu kolosana: “Góunigi humá; mígiraguagüda humá hungua houn ha busenbaña heyeehan lau burí arufudahani málati. Mama lúmagiñeti Kristu binadu échuni luma burí ligaburi haritagun gürigia lánina ubóu le” (Kol. 2:8). Eweridihani le arufudati ábanya resun buiti le uágubei lunti lan gaganbadi wamá lun adundehani tídangiñeti Bíbülia le híchugubei wéiyaaña lidan afiñeni. Góunigi hamutiña mudún lau haranseruniña lun hóunigiragun houngua luéi furumiñeguarügü katei le gayarati leferidiraguagüdüniña. Ariñagati meha Feduru ñéinbaña lan “profetagu yéetiña” ha lúnbaña houchun hachawahaniña “débilitiña lidoun figóu” (2 Fe. 2:1, 14). Uguñe weyu, lunti híchugun wéiyaaña lidan afiñeni eweridihani libe le dan le mégeiwa lan. Derebuguhaña, ani subudihali luáguti ibagari houn. Ani lubaragiñe hiridún, arufuda hamaali gunfuranda hamanu Bíbülia buidu ani gayara lan harufudahani inarüni buidu (1 Tim. 3:2; Titu 1:9). Lidan fiú dimurei, subudi le hawagubei, ragüguaü unguaü luma lichú aau le hibihibei tídangiñe Bíbülia íderagua lumutiña lun hadundehaniña lumutuniña Bungiu buidu.

HÓUNIRI MUDÚN LE BUÍDUBEI HÓUGÜDA LUMUTIÑA MUDÚN ANI GÓUNIGI LAÑA

9. Ida liña ladundehaniña Hesusu lílana damuriguaü kristiánu uguñe weyu ani hóugüda laña?

⁹ Yusu lumutu Heowá lóundarun lun líchugun saragu agumeiraguagüdüni, to ítaraboun kei éigini, houn kristiánugu anuadirúaaña luma houn sun íbirigu lidan sun ubóu. Tidan burí wani agumeiraguagüdüni anihein saragu adundehani tídangiñeti Lererun Bungiu. Anihein dan, rutu lóundarun Heowá adundehani houn wéiyaaña lidan afiñeni, anihein dan tau gárada, o hámagiñe óunigirutiña sirkuitu. Ítara liña ladundehaniña Hesusu mudún ani hóugüda laña.

10. Ka hánibei wéiyaaña lidan afiñeni buligasion hama ha adisedubaña luéi damuriguaü?

¹⁰ Hani wéiyaaña lidan afiñeni buligasion hóunigiruniña lílana damuriguaü ani góunigi hameime hamadagua luma Bungiu, dántima le añahein lan ha débilihali hafiñen o ha héiguaaña lidoun somu figóu wéiriti (aliiha huméi Santiagu 5:14, 15). Fiú hádangiñe mudún ha aba hadisedun luéi damuriguaü ani magunfulirunhaña lau hani buligasion keisi kristiánu. Ma ladügüñein hamuga aban wéiyaali lidan afiñeni le hínsiñehabuti sun liyaraati lun ladariruniña íbirigu ha, ani íderagua láñame lun hagiribudun lidoun damuriguaü? Anha! Ariñagati Hesusu: “Mabusenrunti Húguchi Bungiu le siélubei lun leferidirun ni aban hádangiñe ǘnabugutiña ha” (Mat. 18:12-14).

IDA LUBA WARIHINI HACHARA WÉIYAAÑA LIDAN AFIÑENI?

11. Ka uagu añahein lubéi íbirigu hénrenguti houn hasigiruni hadundehan wéiyaaña lidan afiñeni?

¹¹ Hóuniri mudún ha úati figóu hawagu Heowá luma Hesusu, ánhañati gürigia ha hanúadirubaña lun hóunigiruni damuriguaü, gachararaditiña. Ligía hénrengu lubéi houn fiú íbirigu lun hasigiruni hadundehan. Gayarati hasaminarun: “Gafigountiña kei nuguya, kaba uagu hayabin ariñagei nun kaba lan nadüga?”. Ani inarüni katei le, gafigountiña wéiyaaña lidan afiñeni. Gama lumoun, moun lumuti wetenirun lun hachara.

12, 13. a) Ka gayarabei wariñagun luagu hachara fiú wügüriña ha meha únbaña líchiga Heowá somu buligasion súdiniti? b) Ka uagu layanuhóua tidan Bíbülia luagu hachara fiú wügüriña ha líridubaña Heowá?

¹² Ayanuhatu Bíbülia furangu luagu hachara gürigia ha meha layusurubaña Heowá lun ladundehaniña lumutuniña lidan binadu dan. Kéiburi meha Dawidi, iridúati meha urúeime Ísüraeli. Gama lumoun, adüga lumuti le layumahabei lǘgürügü ani aba léiguadun lidoun agabarahani luma áfarahani (2 Sam. 12:7-9). Samina wamá giñe luagun apostolu Féduru. Íbini resibi lan meha saragu buligasion lidan damuriguaü kristiánu lidan furumiñeti sígulu, héiguati lidoun burí charati wéinamuti (Mat. 16:18, 19; Huan 13:38; 18:27; Gal. 2:11-14). Le linarün katei, lúmagiñebei Adán tuma Ewa, Hesusurügüñein wügüri machararaditi awinwanduti ubouagu.

¹³ Ka uagu ladüga Heowá lun labürüdǘn abahüdaguni tidan Bíbülia luagu hachara gürigia ha meha líridubaña? Laganagua amu burí resun, adüga lumuti lun larufuduni gayara lan layusurun wügüriña ha gachararaditiña lun ladundehaniña lumutuniña. Ani ítara liña ladügüni lúmagiñe furumiñeti dan. Ligíati, moun lumuti wayusuruni hachara ha adundehabaliwa lun wekeharun hawagu luma lun mabahüdün wamani halurudun. Agurabati Heowá lun inebe hamá woun ani gaganbadi wagíame houn (aliiha huméi Áfuriduni 16:2, 8).

14, 15. Ka wafurendeirubei lídangiñe ligaburi layanuhan Heowá hama lumutuniña lidan binadu dan?

¹⁴ Súdiniti lun gaganbadi wamá houn ha adundehabaliwa uguñe weyu. Samina wamá ka lan meha layusurubaña Heowá lun layanuhan hama lumutuniña lidan dan súdiniti. Dan le háfuridunbei ísüraelina Ehiptugiñe, resibitiña adundehani lúmagiñe Heowá liyumulugugiñe Moisesi luma Aarón. Lun móunwegun hamá lidan lidiisin igei, mosu meha hadügün aban adineruni espechaliti ani hurugua hagía murusun lídangiñe lita mudún le afarúbei luagu lumarukun tubenari haban. Mama meha aban umalali siélugiñeti ariñagubalin houn kaba lan hadüga. Mosu meha gaganbadi hamá houn wéiyaaña lidan afiñeni ha Ísüraelibaña, ha giñe ibihaañabaña adundehani lúmagiñe Moisesi (Afu. 12:1-7, 21-23, 29). Lidan meha dan ligía, Moisesi meha hama wéiyaaña lidan afiñeni anügübalin adundehani lúmagiñeti Bungiu. Ani uguñe weyu, wéiyaaña lidan afiñeni adügübalin wadagimanu súdiniti le.

¹⁵ Chóuruti haritagua wamá saragu amu ókaasion bürüwati tidan Bíbülia le ídanbei lóunahan Heowá ánheligu o gürigia lau adundehani lun lesefuruniña lubúeingu. Lidan sun ókaasion ligía, gúndaati meha Bungiu lau líchugun lídangiñe lubafu houn. Ayanuhatiña óunagülei hagía lidan liri Bungiu ani aba hariñaguni houn lumutuniña Bungiu kaba lan hadüga lun meferidirun hamani habagari. Siñati funagia ladügüni Heowá ligiaméme danme le liabin Arümahedón? Furanguti aban katei, sun wéiyaali lidan afiñeni le ibihibei chansi lun leseriwidun lidan liri Heowá o tidan lóundarun Heowá mosu góunigi lan lun mayusurun lani chansi ligía wuriba.

“SÚNGUBEI LIDAN ABAN FÁRÜGA LUMA ABAN ÓUNIGIRUTI”

16. Ka “umalali” lunbei gaganbadi wamá lun?

¹⁶ Sun lumutuniña Heowá lídanñanu “aban fárüga” lábugiñe ladundehan “aban óunigiruti”, Hesukrístu (Huan 10:16). Chouru lumuti meha Hesusu houn lani disipulugu luagu ñeinbei lan hama “sagü weyu darime lagumuchun ubóu” (Mat 28:20). Ida liña lagunfuliruni füramasei le? Keisi Urúei sielu, lábugiñeñein lubafu sun sügǘ le lunbei lanügün lidoun lagünrinchawagun ubóu le lani Satanási. Anhein busén wabéi lidan wamá aban ani lidan ichouruni tidan lóundarun Bungiu, lunti gaganbadi wamá lun “umalali [w]anagangiñe” le ariñagubalin woun kaba lan émeri wafalara. Lidan “umalali” ligía, anihein le lariñagubei sífiri sandu tidan Bíbülia luma le lariñagubei Heowá luma Hesusu hayumulugugiñe hóuniri mudún ha írida hamaañabaña (aliiha huméi Isaíasi 30:21 luma Arufudúni 3:22).

17, 18. a) Ka peliguru asiadirubaliña lumutuniña Bungiu? b) Ka katei gayarabei wachoururuni? c) Kaba wariha lidan le aban arütíkulu?

¹⁷ Ariñagati apostolu Féduru luagu éibugañahadügü liña lan Mafia keisi liñún le gáñiti “áluaha kaba lan lagünrinchagua” (1 Fe. 5:8). Ítara kei aban animaalu áraabuna le lamaali, léibaahañanu Mafia lumutuniña Bungiu áluaha chansi lun lachubarun hawagun ha magaradahanbaña o ha féridiguañabaña. Ligía ábanya resun lun madisedun wamá hawéi lánigu Bungiu mudún ni luéi “le óunigiruba[liwa] keisi hóuniri mudún” (1 Fe. 2:25). Chóurugüda lumuti Arufudúni 7:17 woun sun lan ha lúnbaña hásügürün lau ibagari lídangiñe óunwenbu asufuriruni “lóunigirubaña [lan] Mudún [Hesusu] [...], ábame lanügüniña larun duna le íchugubei ibagari; ábame laragahani Bungiu sun águiraü luéigiñe hagu”. Anihein funa san aban füramasei buítimati luéi le?

¹⁸ Guentó kei ariha wamaali lubéi ka lan hawadigimaribei wéiyaaña lidan afiñeni keisi hóuniri lánigu Bungiu mudún, súdiniti álügüdahani le: “Ida luba san hachoururuni wügüriña iridúaña ha luagu hóunigiruñanu lan lánigu Hesusu mudún buidu? Amisuraha wamutün arihei óunabagülei lidan le aban arütíkulu.