Hudugua wamá lun Heowá, le Urúeibei lun súnwandan

1, 2. a) Ka san ‘Urúeibei lun súnwandan’, ani ka uagu gadüna lubalin Bungiu títulu le? (Ariha huméi dibuhu le lídanbei lagumeseha arütíkulu.) b) Ka hínsiñetimabei woun luagu larúeihan Bungiu?

ARÚEIHATI lurúeite ageiraü le gíribei Suazilandia, urúei Sobhuza II, luagu yarafa lun ǘrüwa-wein-aban irumu. Aban katei le mibihin lumuti furumiñeguarügü lidan dan le! Gama lumoun, anihein aban urúei le lunbei madüraagun lani lichatin ibagari larúeihan. Darí lun tagúarun Bíbülia lun ‘Urúei lun sun dan’ (1 Tim. 1:17). Heowá Bungiu Urúei ligía. Ariñagatu Bíbülia: “Aburemei Urúeibei lun súnwandan” (Sal. 10:16).

² Adügati lidura larúeihan Heowá lun amu lan luéi furumiñeguarügü urúei ubouaguna. Gama lumoun, létima hínsiñebei woun ligaburi larúeihan. Lidan meha binadu Ísüraeli, anihein meha aban urúei le arúeihabei bián-wein irumu, aba lalawahani Bungiu lau dimurei le: “Areidati Aburemei, gudemehabu ligía; gaguraasunti giñe hínsiñehabu ligía. Ru laali Aburemei lálana larúeihan sielu, gabafuti larúeihan luagu sun katei” (Sal. 103:8, 19). Lau sun Warúeite lan Heowá, ligía giñe Wáguchi le siélubei, le hínsiñebei woun. Ida liña san lóuserun kei Wáguchi? Ida liña san lagumadihan lúmagiñebei ebedaaguni Edén? Óunabagülei lun bián álügüdahani le ladügüba lúntima wayarafadun lun Heowá ani línchahabadiwa lun weseriwidun lun tau sun wanigi.

ADÜGATI URÚEI LUN SÚNWANDAN ABAN FAMILIA LIDAN SUN UBÓU

3. Katei san furumiñetibei hadan lufamilian Heowá, ani kátaña adügǘbaña kei lirahüñü Bungiu?

³ Ma funa lueirin lugundan Heowá lau ladügüni Liráü le ábanrügüti! Móuserun lumuti ábanrügü Liráü kei aban gürigia furumiñeguarügü. Hínsiñeti lun kei aban Isaani ani amisuraha lumuti lun lídehan lidan ladügǘn le líbiri katei (Kol. 1:15-17). Ítara liña, biángubei hagía adügatiña saragu míñunu ánheligu, lubúeingu Bungiu ha asubudirúabaña kei “ha eseriwidubalin, adüga haméi lugundan”, ani fulesei lumutiña Bungiu lau lagúarun houn nisaanigu. Hádangiñetiña lufamilian ha lídanbaña sun ubóu (Sal. 103:20-22; Hob. 38:7).

4. Ida liña haganwoundun lufamilian Bungiu lidan sun ubóu?

⁴ Lárigiñebei ladügüni Bungiu sielu luma Ubóu, aba laganwoundagüdüniña lufamilian. Lárigiñebei labuiduragüdüni ubóu ani aranseléi lau sun le mégeiwabei lidan, aba ladügüni furumiñeti wügüri, Adán, ani lenege guánarügü ladügei (Agu. 1:26-28). Garichati meha Bungiu lun gaganbadi lan Adán lun lugundun ligía adügübalin. Ani kei Úguchili, ru lumuti lugumadin houn gürigia lau ínsiñeni luma areini. Buiti meha adundehani ligía ani súnwandan meha líbüre hamá (aliiha huméi Agumesehani 2:15-17).

5. Ka meha aransehani ladügübei Heowá lun labuinchagüdüni Ubóu hau lirahüñü?

⁵ Mítaranti Heowá kei saragu urúeigu ubouaguna, hínsiñeti lun líchugun buligasion houn ha lábugiñebaña larúeihan lun larufuduni houn afiñe lan hawagu. Kei hénpulu, ruti ubafu lun Adán hawagu animaalugu ani aba líchugun wadagimanu lun lun líchugun hiri (Agu. 1:26; 2:19, 20). Luéigiñe amu oubaü, gayarati hamuga meha ladügün Bungiu saragu gürigia mafigountiña lidan aban lun labuinchagüdüni ubóu, gama lumoun himei lumuti meha ladügün aban paaná úaraguatu lun Adán: aban würi, Ewa (Agu. 2:21, 22). Ítara liña meha líchugun chansi houn lun habuinchagüdüni Ubóu hau hadügawagun. Haweiridagüdübei yebe meha gürigia fuluri-agei darí lun hadügüni sun Ubóu paraísume. Aba hamugati háhuduragun sun gürigia lun Heowá lun súnwandan úara hama ánheligu ha siélubaña keisi ábanrügü familia. Ma lubuidun emenigini! Ani ma lanarime larufuduni Wáguchi le siélubei línsiñehabu woun!

ABA HEBEDAAGUN LISAANIGU LUN LUGUMADIN

6. a) Ida liña lagumeserun ebedaaguni hadan lufamilian Bungiu? b) Ka burí katei arufudubalin luagu mígirun lani Bungiu lagumadihan?

⁶ Híruti lubaragiñe lan hánharun Adán tuma Ewa lun Heowá keisi Habungiute le garichabei lun larúeihaniña, himei hamuti meha houdin luéigiñe lóubadina Satanási, aban hádangiñe lani Bungiu ánheligu le ebedaagubei (Agu. 3:1-6). Gama lumoun, hawinwandun dise luéi lugumadin Bungiu, asufurirunirügüñein luma óunweni lanügün dandu houn kei houn hadügawagun (Agu. 3:16-19; Rom. 5:12). Úaaña meha gürigia gaganbaditiña lun Bungiu ubouagu. Mini lan san le mámaali lan Heowá agumadiha, luagu mabusenrunhali lan ligía lan Lurúeite Ubóu hau sun gürigia ha lídanbaña? Uá! Sigiti agumadiha lau labugaguniña furumiñetiña wagübürigu lídangiñe fuluri-agei ru ligía fiú kátaña garünatiña luagu lebelaagüle lun siñá lan hagiribudun ñeinhin (Agu. 3:23, 24). Arufuda lumuti giñe Bungiu línsiñehabu keisi úguchili lau lachoururuni luagu lagunfulirubei lan lisuuni lun ñein hamá lubúeingu ha eseriwidútiña lun lau úaraguni, dandu sífirigu sielu kei gürigia ubouagu. Füramaseti luagu liábinba lan aban ‘adügawaguni’ le lunbei lagumuchun lau Satanási luma lau sun lani lifigoun Adán efekütu (aliiha huméi Agumesehani 3:15).

7, 8. a) Ida liña meha luriban ubóu lidan lidaani Noé? b) Ka meha ladügübei Heowá lun larumadahani Ubóu luma lun lakipuruniña gürigia wínwanñu?

⁷ Lidan sígulu burí le asigirubei, desidírütiña fiú wügüriña úaragua hamá lun Heowá. Haganagua wügüriña hagía anihein meha Aweli luma Enoku. Gama lumoun, hibe-agei gürigia máhatiña lun Bungiu kei Háguchi ani Harúeite. Lúmounbei lidaani Noé buínhali meha “ubóu lau wuribani luma anarimeni” (Agu. 6:11). Mini lan san le mámaaña lan meha lábugiñe lubafu Bungiu gürigia? Ka lariñagubei abahüdaguni le tídanbei Bíbülia?

⁸ Akutiha waméi abahüdaguni le luáguti Noé. Ruti Heowá adundehani furanguti lun lun ladügün aban óunwenbu árüka lun lesefurun hau sun tílana luban. Arufuda lumuti giñe ínsiñeni le lasandirubei hawagu sun gürigia ubouagu lau líriduni Noé keisi ‘apurichihati houn gafigountiña’ (2 Fe. 2:5). Chóuruti eweridiha lániña gürigia luagu anite lan aban günringuaü ani ayumuragua lan houn lun hasakürihan, gama lumoun madügüntiña gasu. Luagu saragu irumu wínwanti Noé hau liduheñu haganagua gürigia wuribatiña ani wíyeti habagari. Heowá, kei aban Úguchili hínsiñehabuti, góunigi lumutiña ani biní laña widü lílana familia úaraguatiña hagía. Lau lanügüni óunwenbu guran, lidan irumu 2370 lubaragiñe lidaani Hesusu (lb.l.H.), chóurugüda lumuti gabafu lan hawagu wügüriña hama ánheligu maganbaditiña. Furanguti ligíagili lan meha agumadiha (Agu. 7:17-24).

SIGITI HEOWÁ ARÚEIHA LÁRIGIÑE GURAN

9. Ka chansi líchugubei Heowá houn gürigia lárigiñe Guran?

⁹ Aba láfuridun Noé hau liduheñu tídangiñe árüka, aba hawaragun hulili ani aba hagumeserun éibuga lidan aban Ubóu harumaali. Góunigi laaña meha Heowá. Ma meha lanarime heteingiruni! Lau lóufudagun, aba ladügün Noé aban latarü lun ladügün sákürifisiu lun Heowá. Biní lumuti Bungiu hau sun tílana luban, ani aba líchuguni gumadi le houn: “Gibe hamá hirahüñü, buíngüda huméi ubóu” (Agu. 8:20–9:1). Ábanya wéiyaasu, ibihatiña gürigia chansi lun háhuduragun lun Bungiu lidan úarani luma lun habuinchagüdüni ubóu.

10. a) Ida liña san lagumeserunya ebedaaguni lárigiñe Guran ani halía? b) Ka ladügübei Heowá lun lachoururuni lagunfulirun lisuuni?

¹⁰ Gama lumoun, magumuchunti Guran lau figóu. Mesefu lumutiña giñe gürigia luéi lubafu Satanási hama lumafianu. Ligía murusun lubéi dan lárigiñe, ábaya lagumeserun ebedaaguni lun lugumadin Heowá. Aba ladügün Nimüródu, le lílawa Noé, aban lanarime ebedaaguni lun Bungiu. Ayanuhatu Bíbülia luagu kei “aban óunwenbu géibaahati kóntürati luagu Heowá”. Bunaguati uburugu wéinamuburiti, kéiburi Babeli, ani íridaguati lungua lurúeiteme “Sinarü” (Agu. 10:8-12, TNM). Ka ladügübei Urúei lun súnwandan kóntüra urúei maganbaditi le áfaagubei lun lagünrinchaguni lisuuni lun labuinchagüdüni Ubóu? Adügati meha Bungiu lun hayanuhan gürigia ámuñegueinarügü iñeñein. Ka libihibei lau lira? Kei le meha ua lan gunfurandagua hamá hámagua, mosu meha hafanreinragun “lidoun sun ubóu”. Gama lumoun, barüina hañalin échuni burí le lídanbei hani relihión hámagua luma giñe ligaburi hagumadihan wügüriña (Agu. 11:1-9).

11. Ida liña larufudun Heowá úaragua lan lun Abüraámü?

¹¹ Íbini meha hudugua hamá hibe-agei gürigia houn búngiugu mama inarünitiña lárigiñe Guran, añahein meha fiú wügüriña úaraguatiña asigirutiña arufuda inebesei lun Heowá. Abüraámü aban hádangiñe, ígira lumutu luban luma lubuidun libagari Uru lun lásügürün saragu irumu awinwanda tidan kianpu (Agu. 11:31; Ebü. 11:8, 9). Kei le aweiyasuha lubéi meha lídangiñe aban ageiraü lidoun amu libagaribei, aweiyasuhati meha lidan fulasu le lábugiñeti hagumadihan ámuñegueinarügü urúeigu, ani saragu hádangiñe lidan meha uburugu baríeiruati hawinwanda. Gama lumoun góunigi lumuti Heowá hau sun liduheñu keisi aban úguchili. Ítara liña lariñaguni abürühati Sálumu: “Mígirunti Bungiu lun houserawagun; ariñagagubeiti houn urúeigu. ‘Maguura humatia hawagu nanúadirun’” (Sal. 105:13, 14). Úaraguati Bungiu lun Abüraámü le lumada, aba füramase lan lun: “Háfuriduba urúeigu [...] bídangiñe” (Agu. 17:6; Sant. 2:23).

12. Ida liña larufuduni Heowá lubafu Ehiptu, ani ida liña lahuudun houn lumutuniña?

¹² Águyuguagüda lumuti Bungiu lun Isaakü le lisaani Abüraámü luma lun Hakobu le libari luagu labinirubaña lan. Laganagua abinirúni ligía anihein meha háfuriduba lan urúeigu hádangiñe hadügawagun (Agu. 26:3-5; 35:11). Gama lumoun, lubaragiñebei urúeigu hamá ladügawagun Hakobu, wínwantiña meha lidan amudirawaguni Ehiptu. Mini lan san le magunfulirun lubéi lan meha Heowá lani füramasei ani mámaali lan meha ligía Lurúeite sun Ubóu? Uá! Lidan lidaani, arufuda lumuti lubafu ani ígira lumuti furangu luagu wéiritima lan lubafu sügǘ lau lubafu urúei ehiptuna. Ani kei le afiñe habéi meha ísüraelina luagu, aba lesefuruniña dan le hánhiñuragunbalin barana Funati. Chóuruti sigí lan Heowá kei Suntigabafu lidan sun ubóu. Ani kei aban úguchili le hínsiñehabuti, yusu lumuti lanarime lubafu lun ladouragun hau lumutuniña (aliiha huméi Áfuriduni 14:13, 14).

LIABIN HEOWÁ LUN LURÚEITE LAN ÍSÜRAELI

13, 14. a) Ka heremuhabei ísüraelina libügürü larúeihan Heowá? b) Ka meha füramasei ladügübei Heowá lun Dawidi libügürü larúeihan?

¹³ Lárigiñebei hesefurun ísüraelina lau aban milaguru, aba halawahani Heowá lau aban uremu lánina agañeiruni. Dariwati uremu le lidan Áfuriduni kapítulu 15, ani lidan bérusu 18, ariñagati: “Arúeihati Nabureme gumugua dan!”. Ítara liña, aba meha liabin Heowá lun Lurúeite lan iseri néchani ligía (2 Lur. 33:5). Gama lumoun, magufurumaduntiña ísüraelina lau Heowá keisi Harúeite le marihúaditi. Kéiburi 400 irumu lárigiñe háfuridun Ehiptugiñe, aba hamuriahan luma Bungiu lun líridun aban urúei hádangiñe wügüriña, kei ha híbiri néchani ha geyegubaña hau, ha máhuduragunbaña lun Bungiu (1 Sam. 8:5). Íbini ru lani le hamuriahabei houn, le linarün katei, Harúeitememegili meha Heowá. Ítara liña larufuduni le asuseredubei lidan lidaani larúeihan Dawidi, le libiaman wügüri le arúeihabei Ísüraeli.

¹⁴ Barǘ lumutu meha Dawidi libagüsina daradu to sagüráuboun Herusaléun. Lidan ókaasion le lánina ugundani ligía, aba heremuhan lewitagu aban uremu le lánina alawahóuni lau dimurei burí le: “Ariñaga hamá néchanigu: ‘Aburemei [Heowá] urúeibei’” (1 Kro. 16:31). Dan le lariñagun ya larúeihaña lan Heowá mini lan yusu lani lubafu o írida lan somu gürigia lun lagumadihan o lun letenirun lun somu katei lidan liri. Súdiniti gunfurandawa lan katei le. Lubaragiñebei lounwen Dawidi, füramaseti Heowá lun magumuchadibei lan larúeihan: “Níchuguba aban hádangiñe badügawagun lun larúeihan” (2 Sam. 7:12, 13). Ani ítara liña meha lasuseredun: lóugiñe milu irumu lárigiñe aba lachülaagun ‘ladügawagun’ Dawidi ligía. Katei meha san adügawaguni ligía, ani ídaba meha Urúei lan?

LÍRIDUN HEOWÁ ABAN ISERI URÚEI

15, 16. a) Ídabuga lanuadirúa Hesusu lun Urúeibei lan? b) Ka aransehani ladügübei Hesusu lubá larúeihan dan meha ya lubéi ubouagu?

¹⁵ Lidan irumu 29 lida lidaani Hesusu (l.l.H.), gumeseti Huan le Abadiseihabei apurichiha luagu “yarafaali [lan] larúeihan Bungiu” (Mat. 3:2). Dan le labadiseirunbalin Huan Hesusu, aba lanúadiruni Heowá keisi Mesíasi le füramasewaalibei ani kei le lunbei Urúei lan lidan Larúeihan Bungiu. Ani arufuda lumuti meha giñe línsiñehabu keisi Úguchili lau dimurei le: “Anihán niráü le hínsiñebei nun, le aubei óunwenbu lan nugundan” (Mat. 3:17).

¹⁶ Ruti meha Hesusu uéiriguni lun Lúguchi lidan sun lani ministeriu (Huan 17:4). Adüga lumuti lau lapurichihani Larúeihan Bungiu (Luk. 4:43). Arufudahati giñe houn lani disipulugu lun hamuriahan lidan furíei lun liabin Arúeihani ligía (Mat 6:10). Kei Urúeibei lubéi, gayarati meha lariñagun houn láganiñu: “Aniheinhali larúeihan Bungiu haganagua” (Luk. 17:21). Dan lárigiñe, guñoun lubaragiñe lounwen, adügati Hesusu aban daradu hama lánigu, aban ‘daradu lun aban arúeihani’. Ítara liña líchugun chansi houn fiú hádangiñe lani disipulugu ha úaraguatiña lun harúeihan luma lidan Larúeihan Bungiu (aliiha huméi Lúkasi 22:28-30).

17. a) Ida liña libihin Hesusu aban fánreinti lídangiñe ubafu le yuubei lun keisi urúei lidan furumiñeti sígulu? b) Ka gayarabei ladügüni Hesusu lárigiñe lagurabahan somu dan?

¹⁷ Ídaba meha san Urúei lan Hesusu lidan Larúeihan Bungiu? Madügün lumuti meha lárigiñebei ladügüni daradu hama lani disipulugu, lugundun, aban weyu lárigiñe, rábounweyu, aba lafarún ani aba hafanreinragun lani disipulugu (Huan 16:32). Gama lumoun, kei lidan dan le sügühalibei, Heowámemegili agumadiha. Ǘrüwa weyu lárigiñe lounwen Liráü, aba láguyuguagüdüni, ani lidan Pentekosutesi irumu 33, aba lagumeserun Hesusu agumadiha lidan damuriguaü kristiánu (Kol. 1:13). Gama lumoun, mosu meha lagurabahan lubá libihini ubafu lun larúeihan ubouagu keisi ‘adügawaguni’ le füramasewabei. Ariñagati Heowá lun: “Ñuruba luéigiñe nóunwenren darí níchuguniña báganiñu lábugiñoun bugudi” (Sal. 110:1).

HUDUGUA WAMÁ LUN LE URÚEIBEI LUN SÚNWANDAN

18, 19. a) Ka wabusenrubei wadügün? b) Kaba wafurendeira lidan le aban arütíkulu?

¹⁸ Ebedaawaguali lun lilurudun Heowá luagu saragu milu irumu dandu sielu kei ubouagu. Gama lumoun, mígirun lágili Heowá liricha lun larúeihan: súnwandan ligía lan agumadihabei. Ani kei aban Bungiu hínsiñehabuti, daruguati hau lubúeingu ani góunigi laña, kéiburi Noé, Abüraámü luma Dawidi. Ma ínchaha lumutiwa le lun werederun lábugiñe lugumadin Warúeite ani yarafa wagíame lun?

¹⁹ Ida liña san Urúei lan Heowá uguñe weyu? Ida luba werederun lábugiñe Larúeihan? Ida luba lisaanigu wamá ha mafigountiña lidan lufamilian ha lídanbaña sun ubóu? Kátima san wamuriahabei dan le wariñagun “Ñǘbuinla barúeihan”? Lounabúba álügüdahani burí le lidan le aban arütíkulu.