TÍTULU LE LUÁGUBEI TIDÁÜ: HÍNSIÑETÜN SAN LUN BUNGIU?
Busenti Bungiu lun hayarafadun lun
“Siñati liabin ni aban numoun anhein mama lubéi lanügün Bungiu Úguchili le óunahabalina.” (HUAN 6:44)
KA UAGU MACHOURUN HABALIN FIÚ GÜRIGIA: Afiñetiña saragu gürigia luagu Bungiu, gama lumoun, saminatiña weiri lan lidise hawéi. Ariñagatu Christina, aban würi irlandana to meha ñǘdünboun ligilisirugu sagü dimaasu: “Subudi numuti meha Bungiu lan adügübalin sun katei, gama lumoun ibidiñeti meha Bungiu nun. Masandiragungidina meha nungua yarafa lun”.
KA TARUFUDAHABEI BÍBÜLIA: Háfuga dise lan wasandiragun woungua luéi Bungiu, gama lumoun, mígirun lumutiwa wábuguarügü. Arufuda lumuti Hesusu ligaburi lóunigiruniwa Bungiu dan le lariñagunbei: “Anhein añahein lubéi san mudún luma aban wügüri, teferidira aban hádangiñe, ma lígirubaña híbiri luagu wübü, ábame lidin áluahoun to ayuridaguboun?”. Ka mini lubéi le? Afuranguagüda lumuti Hesusu: “Mabusenrunti Húguchi Bungiu le siélubei lun leferidirun ni aban hádangiñe ǘnabugutiña ha” (Matéu 18:12-14).
Gebegitiña kada aban hádangiñe “ǘnabugutiña” ha lun Bungiu. Ida liña láluahaniña mudún ha “ayuridagubaña”? Según bérusu le lídanbei lebelaagüle arütíkulu le, Bungiu anügübaliña.
Kátaña san achülürübaña hábiñoun gürigia ani yarafa hagía houn ǘmadarugu lun hayanuhan houn luagu Bungiu?
Bungiu achawahabaliña gürigia haruma tanigi luouguoun. Lidan furumiñeti sígulu óunahati aban kristiánu gíriti Felipe lun lidin tárigi lugune aban wügüri etiopíana lun lafuranguagüdüni lun ka lan mini lubéi profesía le laliihabei (Adügaü 8:26-39). Lidan amu ókaasion, adundeha lumuti apostolu Féduru lúbiñoun aban úfisi rómana gíriti Korunéliu, le meha lǘhalibei afurieida ani áfaagua ligía lun leseriwidun lun Bungiu (Adügaü 10:1-48). Adundeha lumuti giñe Bungiu apostolu Pábulu hama lánigu paaná lubadun aban duna uburugu Filipu. Ñein lasubudira aban würi gíritu Lidia, “huduguatu würi tuguya lun Bungiu”. “Aba ladaarunu Bungiu tanigi lun tadügün gasu lau le lariñagubei Pábulu.” (Adügaü 16:9-15.)
Lidan sun sügǘ le, adügati Heowá lun sun lan gürigia ha áluahabalin lun hibihibei lan chansi lun hasubudiruni. Ani uguñe weyu, kátaña san achülürübaña hábiñoun gürigia ani yarafa hagía houn ǘmadarugu lun hayanuhan houn luagu Bungiu? Gefentiña luagu Heowá. Álügüdagua humá hungua: “Layusuruñanu san Bungiu gürigia ha lun lachawahanina luouguoun?”. Furíei humá lun Bungiu lun líderagunün lun hayarafadun lun.a
a Lun hibihin lanwoun ariñahani, ariha huméi bidéu Ka uagu lunti lubéi haturiahanu Bíbülia? lidan www.jw.org/cab.