Kaba ladüga Larúeihan Bungiu huagu?

Kei harihini lidan arütíkulu burí le lubaragiñebei le, súdiniti Larúeihan Bungiu houn gefentiña luagu Heowá. Luagu amu oubaü, gayarati anihein lan somu füramasei luáguti Larúeihan Bungiu le hínsiñetimati hun, gama lumoun saminatün luagu buíduya lan lun inarünibei lan.

Buiti lun duari wamá ani lun mafiñerun wamani sun le waganbubei (Ariñawagúni 14:15). Ligía meha hadügübei kristiánugu ha lílana binadu uburugu Beréa.a Dan le haganbunbalin uganu buiti luáguti Larúeihan Bungiu luagu furumiñeti wéiyaasu, mánharuntiña lun ítaraguarügü. Aba hakutihanu Lererun Bungiu “lun harihini anhein inarüni lubéi le ariñawagúbei houn” (Adügaü 17:11). Lidan amu dimurei, konparárü hamuti le aganba hamaalibei luma le tariñagubei Lererun Bungiu ani aba hachoururuni luagu ligía lan inarünibei.

Amisuraha wamutün wagía, gefentiña luagu Heowá, lun hadügüni le meha hadügübei kristiánugu lánina furumiñeti sígulu. Líderagubadün programa lánina taturiahóun Bíbülia le wíchugubei houn gürigia hábiñe mafayeihanga lun konparárü humani le wariñagubei luagu Larúeihan Bungiu luma le tariñagubei Bíbülia, to Lererun Bungiu.

Ligibuagun subudi le lunbei hibihini luagu Larúeihan Bungiu, hadariruba giñe óunabagülei lun álügüdahani súdiniti kéiburi le:

• Halíagiñe wayabin?

• Ka lisuunibei ibagari?

• Ka uagu lígira Bungiu lun ñein lan asufuriruni?

• Ka asuseredubei woun dan le wóunwegun?

• Lagünrinchawaguba san Ubóu?

• Ida luba gunda hamá iduheñu?

Ani le buídutimabei, líderagubadün haturiahanu Bíbülia lun hayarafadun lun Bungiu (Santiagu 4:8). Ani eibu buídutima lan humadagua luma Bungiu, ménrenguntimabei hun harihini katei buiti le gayarabei ladügüni Larúeihan huagu guentó luma ámuñegü. Ariñagati Hesusu lun Lúguchi: “Anihán lébunabei ibagari le magumuchaditi, lun hasubudirunibu buguya le Bungiu ábanrügüti, le inarüniti, luma lun hasubudirunina, au Hesukrístu le bóunahabei” (Huan 17:3).