Anihein san óunabagülei tidan Bíbülia?

Adügañaha humaali san álügüdahani burí le húniwagua? Anhein ítara liña lubéi, mámarügüñadün hugía adügei. Gíbetiña gürigia lidan sun ubóu busentiña hasubudiruni lóunabagüle álügüdahani burí le. Gayarati san wadariruni?

Gíbetiña gürigia ariñagutiña gayara lan. Ka uagu? Ladüga daritiña óunabagülei le chóuruti tidan Bíbülia. Hínsiñeti hamuga san hun hasubudiruni ka lan tarufudahabei? Anhein ítara liña lubéi, háfuga busenbadün lan hibihin aban külase tuáguti Bíbülia hama gefentiña luagu Heowá mafayeihanga.a

Gíbetiña gürigia hanufudetiña heresibirun aban aturiahani tídangiñe Bíbülia. Añahein ariñagutiña madaani hamá, hénrengu lan o mabusenrun hamá aban buligasion ítarati. Gama lumoun, añaheinhaña ánharutiña haturiahanu ani anihán dimurei le hariñagubei:

• “Abasiihatina tidoun aban ligilisi katoliku, banheliu, budista, tidoun aban ligilisi lánina relihión le gíribei sij, aturiaha nuguya luagu Bungiu tidan luban furendei íñuti. Gama lumoun, mibihintina óunabagülei lun liibe-agei álügüdahani le lídanbei nichügü. Dan lárigiñe, aba tachülürün aban gefentu luagu Heowá núbiñoun apurichiha. Aba taweiridun nanigi ladüga tóunabuni sun álügüdahani le nadügübei tau Bíbülia. Ítara liña nagumeserun aturiahoun Bíbülia.” (Gill, Inglaterra.)

• “Gíbeti álügüdahani nadügün núniwagua luagu ibagari, gama lumoun, sun óunabagülei le líchugubei tábuti niligilisin nun, machouruntina luagu. Gama lumoun, aba lóunabuni aban gefenti luagu Heowá nálügüdahan nun tau Bíbülia. Dan le lálügüdünbalina anhein busén nubéi naturiahanu Bíbülia, aba nariñagun lun anha lan.” (Koffi, Benín.)

• “Busentina meha nasubudiruni ka lan asuseredubei houn hilaaña. Saminatina meha gayara lan hadügün dañu nun, ani busentina meha nasubudiruni ka lan tariñagubei Bíbülia. Ligía aba lubéi nagumeserun aturiahoun Bíbülia luma aban numada gefenti luagu Heowá.” (José, Brasil.)

• “Aba nagumeserun aliihoun Bíbülia ani úati gunfuranda nanu. Ábati hachülürün gefentiña luagu Heowá núbiñoun ani aba hafuranguagüdüni le mini lubéi saragu profesía tídangiñeti Bíbülia nun. Aba nabusenrun nasigirun afurendeira.” (Dennize, Méhiku.)

• “Álügüdaguatina meha nungua anhein inarüni lubéi berese lan Bungiu nau. Aba desidírü nan nafurieidun lun Bungiu le uágubei tayanuha Bíbülia. Larugan, aba hachülürün gefentiña luagu Heowá núbiñoun, ani aba nagumeserun aturiahoun Bíbülia hama.” (Anju, Nepal.)

Haritaguagüda lumutiwa dimurei burí le luagun lererun Hesusu le: “Fuleseiwatiña ha asubudirubalin luagu megei hamani lídehan Bungiu” (Matéu 5:3). Sun wagía busentiwa gunda wamá, ani Búngiurügüñein gayara ladundehaniwa tau Lererun lun gunda wamá.

Ida luba gayara lan hasubudiruni le tariñagubei Bíbülia? Ida liña gayara lan lahuudun hun? Warihaali.