TÍTULU LE LUÁGUBEI TIDÁÜ | SUBUDI HUMÉI KA LAN TARUFUDAHABEI BÍBÜLIA

Külase lánina taturiahóun Bíbülia houn sun gürigia

Subudiwatiwa wagía, gefentiña luagu Heowá, luagu wapurichihan. Gama lumoun, subudi humuti san íderagua wamaniña giñe gürigia lun gunfuranda hamanu Bíbülia?

Aban wügüri laturiahañoun Bíbülia lidan fulasu le ñein lubéi lawadigimarida

Lidan irumu 2014, rútiña hóugiñe 8,000,000 gefentiña luagu Heowá aturiahani houn kéiburi 9,500,000 gürigia sagü hati lidan 240 ageiraü.a Le linarün katei, anihein kéiburi 140 ageiraü ubouagu míbetiña lílana. Gíbetimatiña gürigia ha aturiahabarun Bíbülia wama lidan sun ubóu sügǘ hau gürigia ha awinwandubaña lidan ageiraü burí ligía.

Lun wagunfulirun lau programa lánina arufudahani le, adügatiwa yarafa tun 1,500 míñunu agumeiraguagüdüni, kéiburi Bíbülia, líburu tuma garüdia sagü irumu, kéiburi lidan 700 iñeñein. Ídehati wadagimanu le lun sun lan ha busentiña haturiahanu Bíbülia lun gayara lan hadügüni lidan iñeñein le habusenrun.

“Mínsiñegubeiñein aturiahani nun, gama lumoun, gúndaatina lau le nafurendeirubei guentó ani íderagua láadina saragu.” (Katlego, Sudáfrica)

“Óunaba lumuti aturiahani le saragu álügüdahani le meha nadügübei núniwagua. Ani furendeitina saragu amu katei.” (Berta, Méhiku)

“Núbiñe meha waturiaha le oura nabusenrun. Ka amu katei nabusenrubei!” (Eziquiel, Brasil)

“Aturiahatiwa meha 15 minutu, dimí oura o lóugiñe, según nabusenrun.” (Viniana, Australia)

“Mafiñetina meha mafayeihanbadina lan luagu naturiahan!” (Aimé, Benín)

“Buiti meha tigaburi gürigia to arufudahaboun nun... Aba meha gamadagua wamá.” (Karen, Irlanda del Norte)

“Gíbetiña gürigia aturiaha hamutu Bíbülia, ani máhatiña lun gefentiña hamá luagu Heowá.” (Denton, Inglaterra)

ÁLÜGÜDAHANI BURÍ LE HADÜGÜBEI GÜRIGIA LUAGU KÜLASE TÍDANGIÑETI BÍBÜLIA

Ida liña lichugún?

Akutihóuati le tariñagubei Bíbülia luagu ámuñegueinarügü katei. Kéiburi ánhawa ayanuha luagu Bungiu, ariñaga tumuti Bíbülia woun ka lan Búngiubei, ka lan ligaburibei, ka lan liri, halíañein lan ani anhein gayara lubéi lumadagu wamá. Arufudahóuati giñe houn aturiahatiña halíaba lan tibiti Bíbülia hadarirei óunabagülei lun álügüdahani burí le.

Lun wíderaguniña gürigia adarirei óunabagülei, yusu wamutu líburu Kátima san tarufudahabei Bíbülia?b Adügǘwatu líburu to lun wíderaguniña gürigia lun gunfuranda hamani inarüni le tídanbei Bíbülia. Anihein kapítulu burí tidan le ayanuhati luagu Bungiu, luagu Hesukrístu, luagu lébuna asufuriruni, luagu óunweni, luagu furíei luma luagu amu burí katei.

Ídaba ani halía lichugúa külase ligía?

Gayarati haturiahan lidan weyu luma oura le hínsiñetimabei hun.

Átiriñein san lidura?

Huguyaba desidírü átiribei lan dan haturiahan. Gíbetiña gürigia aturiahatiña aban oura luagu dimaasu. Añahein amu gürigia diisirügüñein o keinsi minutu gayara lan haturiahan luagu dimaasu.

Átiribei nafayeihan luagu külase ligía?

Mafayeihanbadün ni kata luagu külase ni tuagu líburu o garüdia. Úarati katei le luma dimurei le lariñagubei Hesusu houn lani disipulugu: “Mafayeihantün lun hibihini ubafu le, maguburaha humá giñe luagu” (Matéu 10:8).

Átiriñein dan lidura?

Gayarati haturiahan sun dan le habusenrun. Disinéfuñein kapítulu tidan líburu Kátima san tarufudahabei Bíbülia? Gayarati hakutihani sun le habusenrun lau hidaani.

Mosu san nasigirun darí lun aban nan gefenti luagu Heowá?

Uá. Inebehabutiwa ani gunfuranda wamuti garicha lan kada gürigia lun lanúadahani kaba lan lafiñen. Gama lumoun, dan le subudi laali gürigia ka lan tariñagubei Bíbülia, ménrenguntimati desidírü lan buidu.

Halía gayara lan hadarirun lanwoun ariñahani?

Lidan wani páhina lidan Internet jw.org hadariruba ariñahani le chóuruti luagu wafiñen luma luagu le wadügübei.

Halíaba nabürüdǘwa?

Ámuñegueinarügü lamuriahóun aturiahani tídangiñeti Bíbülia: lidan Internet, habürühan o luéigiñe gágamuru

Gayarati habürüdüni hani dátosu tidan dugumedu to lunboun hadarirunu lidan jw.org.
Gayarati giñe habürühan lidoun aban lídangiñe fulasu le áfuachubei lidan páhina 2.
Gayarati giñe háluahani hanumerun gefentiña luagu Heowá tidan líburu lani gágamuru.

a Fiú lídangiñe aturiahani ligía rúati houn saragu gürigia lidan aban.

b Hadügün gefentiña luagu Heowá. Imprimíruatu tóugiñe 230 míñunu lidan lóugiñe 260 iñeñein.

ÍDEMUEI HOUN IDUHEÑU

“Dan le tagumeserunbei nani weiriou aturiahoun Bíbülia, arihatina tasansirun lidan saragu katei. Buídutimahali meha wabagari. Kei busén nan nasubudiruni ka lan tafurendeirubei, aba giñe nagumeserun aturiaha. Adügati le nafurendeirubei lun aban nan gürigia buiti. Adügati taturiahóun Bíbülia lúntima lidan wamá aban kei iduheñu.” (Eziquiel)

“Dan le nagumeserunbei aturiahoun Bíbülia, aba nígiruni bisiu tani düroga luma átaguni, ani aba nafurendeirun árügüdagua nungua dan le nagañidun. Guenlé, harumaru nuban ani sun katei lídanñein lilugaarun. Hínsiñetimahaña niduheñu nun guenlé ani hínsiñeti nun násügürün dan hama. Ani gúndaatimahadina guenlé.” (Karen)

“Achuragua hamutina meha gürigia luagu naturiahanu Bíbülia. Gama lumoun, gúndaati meha nani weiriei lau le nadügübei, aba lariñagun: ‘Mebereseguntina lau le hariñagubei gürigia. Le súdinitimabei nun, narihini lubuidun asansiruni le badügübei. Sigiba adügei le badügübei’. Gúndaatimahaña niduheñu guenlé.” (Viniana)