Ida liña aturiahani tídangiñeti Bíbülia le híchugubei gefentiña luagu Heowá?
Rútiña gefentiña luagu Heowá aturiahani tídangiñeti Bíbülia lun gayara lan hafurendeiruni gürigia le tariñagubei Bíbülia. Líderagubadün wani programa lun:
Gunda lan hibagari.
Gamadagua humá luma Bungiu.
Hafurendeiruni füramasei le tídanbei Bíbülia lubá ámuñegü.
Lidan páhina le, wóunabubei álügüdahani burí le:
Ánhana ánhara lun naturiahanu Bíbülia, ladügüdarúba san nuagu lun aban nan gefenti luagu Heowá?
Gayaraati san nagunbirahan amu gürigia lun haturiahan úara numa?
Anhein aturiahañahaadina lubéi meha hama gefentiña luagu Heowá, gayaraayati san naturiahan?
Anihein san somu aturiahani tídangiñeti Bíbülia huma le ídanbei memegeirun nan máisturu?
Ida liña lichugún aturiahani tídangiñeti Bíbülia?
Líderagubadün aban Gefenti lun hafurendeiruni le tarufudahabei Bíbülia. Lau tídehan líburu Winwan humá lau ugundani lun súnwandan! afurendeireina hubéi le tariñagubei Bíbülia murusun murusun, furendei humeime ida luba lan hasagarun buiti lídangiñe. Anhein busén hubéi lanwoun ariñahani, ariha huméi bidéu le.
Mosu san nafayeihan lun lichugún aturiahani nun?
Uá. Wagía le gefentiña luagu Heowá, falá wamuti adundehani le líchugubei Hesusu houn lani disipulugu: “Mafayeihantün [...], maguburaha humá giñe” (Matéu 10:8). Mafayeihanbadün giñe luagu sun le lunbei hayusuruni lun haturiahan, kéiburi Bíbülia o líburu Winwan humá lau ugundani lun súnwandan!
Átiriñein san lidura kada aturiahani?
Anihein 60 arufudahani tidan líburu. Huguyaba anúadirei átiribei lan fánreinti haturiahan luma átiribei lan dan. Añahein gürigia, aturiahatiña aban arufudahani luagu dimaasu ani añahein amu, aturiahatiña lóugiñe.
Ida luba nagumeserun?
1. Amuriaha humá aturiahani luéigiñe Internet. Wayusurubei ariñahani le hóunahabei woun lúnrügü gayara lan layanuhan aban gefenti luagu Heowá huma.
2. Layanuhaba Gefenti le lunbei líchugun aturiahani hun huma. Lafuranguagüdübei hun kaba lan buiti hasagara lídangiñe aturiahani tídangiñeti Bíbülia, óunabaleime furumiñeguarügü álügüdahani le hadügün.
3. Gayaraati hadügün aransehani luma íbiri le lunbei larufudahan hun. Gayaraati lachülürün humaisturun íchigei aturiahani hun o haturiahan luéigiñe gágamuru, tídangiñe gárada o tuéigiñe konputadora. Liibe-agei dan, ábanñein oura lidura aturiahani, lau sun lira gayaraati ladurarun lóugiñe o ǘnabu luéi según hidaani.
Gayaraati san narihini ida liña lan ladügǘniwa aturiahani?
Anha. Lun lira, amuriaha humá aban aturiahani luéigiñe Internet. Dánmeti le hayanuhan luma Gefenti le lunbei líchugun aturiahani hun, ábame hariñagun lun ábanrügüñein lan aturiahani habusenrun heresibirun lúnrügü harihin anhein hínsiñebei lubéi hun. Ábameti layusurunu garüdia Winwan humá lau ugundani lun súnwandan! to gaganaboun ǘrüwarügü arufudahani.
Ánhana ánhara lun naturiahanu Bíbülia, ladügüdarúba san nuagu lun aban nan gefenti luagu Heowá?
Uá. Lau sun hínsiñe lan houn gefentiña luagu Heowá híchugun aturiahani tídangiñeti Bíbülia houn gürigia, madügüdaruntiña hawagu lun hadügagun houngua gefentiñame luagu Heowá. Afuranguagüdarügü hamuti houn lau inebesei ka lan tariñagubei Bíbülia ani gabaroun hamuti garicha hamá gürigia lun hanúadiruni kaba lan hafiñera (1 Féduru 3:15).
Gayaraati san nayusurunu nibibülian?
Anha. Gayaraati hayusurun furumiñeguarügü Bíbülia to habusenrun. Lau sun hínsiñe lan woun, wagía gefentiña luagu Heowá wayusurunu Bíbülia Traducción del Nuevo Mundo, to anuheinboun lidan saragu iñeñein, ladüga furangu tan ani ménrengunti gunfurandawa tan, subudi wamuti gibe hamá gürigia ha himei hamuti hayusurunu Bíbülia to uáguboun héchuda.
Gayaraati san nagunbirahan amu gürigia lun haturiahan úara numa?
Anha. Gayaraati hagunbirahaniña sun hiduheñu hama humadagu lidoun aturiahani.
Anhein aturiahañahaadina lubéi meha hama gefentiña luagu Heowá, gayaraayati san naturiahan?
Anha. Ani másiñati hínsiñetimahali lanme aturiahani le hun guentó sügǘ lau lidan amu dan, lugundun sánsiwaali ligaburi ladügǘn lun lúaradun luma ligaburi hafurendeirun gürigia uguñe weyu. Gíbetimati bidéu ayusurúti ani ínchahouatiña aturiahatiña lun hayanuhan luagu le hafurendeirubei.
Anihein san somu aturiahani tídangiñeti Bíbülia huma le ídanbei memegeirun nan máisturu?
Anha. Lau sun ménrenguntima lan houn saragu gürigia hafurendeirun lau lídehan aban máisturu, añahein gürigia ha himei hamuti haturiahanu Bíbülia hábuguarügü furumiñe. Anihein ámuñegueinarügü ídemuei lidan fánreinti “Ídemuei lun taturiahóun Bíbülia” le gayaraabei lahuudun hun. Anihán fiu lídangiñe:
Bidéu burí tuáguti Bíbülia. Lidan burí bidéu chátiti le, afuranguagüdawati arufudahani tídangiñeti Bíbülia le súdiniti.
Álügüdahani le tóunabubei Bíbülia. Lidan burí ariñahani le, dariwati saragu óunabagülei le tíchugubei Bíbülia.