Yusu huméi bidéu burí le lun hagumeserun aturiahani tídangiñeti Bíbülia

Anihein gádürü bidéu wama le ínchahabaliña gürigia lun haturiahanu Bíbülia. Ka uagu ladügǘwa kada aban lídangiñe ani ida luba wayusuruni lidan apurichihani?

• 

  Ka uagu lunti lubéi haturiahanu Bíbülia? (dayarüti). Adügǘwati lun habusenrun gürigia hafurendeirun tídangiñe Bíbülia, meberesenga hani relihión. Ínchaha lumutiña gürigia áluahei tóunabagüle Bíbülia lun burí álügüdahani súdiniti le lánina ibagari ani yúsutu aban hénpulu le arufudubalin gayara lan lafiñerúniwa luagu óunabagülei ligía. Lidan lagumuchagüle ariñaga lumuti houn gürigia ida luba lan hamuriahan aban aturiahani.

• 

  Ka uagu lunti lubéi haturiahanu Bíbülia? (murusun lídangiñe). Genegeguati biángubei bidéu le, lóuguarügü liña lílabei le ani gayaraati wayusuruni hama gürigia ha lóuguabei hadaani.

• 

  Ida liña wíchugun külase tídangiñeti Bíbülia? Adügǘwati lun habusenrun gürigia hasubudiruni ida liña lan aturiahani tídangiñeti Bíbülia le wíchugubei maguburahanga luagu ani óunabati fiu álügüdahani le gabügürüguati ladügǘn luagu, kéiburi ida liña lan lamuriahóun aban.

• 

  Buiti achülürüni lidoun haturiahanu Lererun Bungiu. Arufudúati bidéu le houn aturiahatiña Bíbülia. Íbini ayanuhóua lan luagu bidéu le luagu furumiñeti wéiyaasu lidan páhina 2 tidan líburu Winwan humá lau ugundani, gayaraati giñe larihíniwa danme le haturiahañoun lan gürigia garüdia Winwan humá lau ugundani. Ayanuhati bidéu le luagu le lunbei lafurendeiruni gürigia tidan líburu ani afuranguagüda tumuti lun aturiahati ida liña lan wíchugun külase tídangiñeti Bíbülia.

Íbini ariñawagúaali lan ka lan un ladügǘwa kada aban lídangiñe bidéu le, gayaraati larufudún o lounahóun furumiñeguarügü lídangiñe danme le warihini buídubei lan lun wadügüni. Áfaagua wamá lun wasubudiruni ka lan uagu layanuha bidéu burí le ani yusu waméi buidu lidan apurichihani.