TÍTULU LE LUÁGUBEI TIDÁÜ | KA MEHA UAGU LASUFURIRA HESUSU HILÁ LIGÍA?
Inarüni san susere lan?
Lidan irumu 33 lafarúa Hesusu le Nasarétüna. Ariñawagúati lau iyeeni ebedaagua lan houn gumadimatiña, buleseiwati lau magudemehabu, dáguawa ligía luagu wagabu, le ñein lubéi lasufurira saragu lubaragiñe lounwen. Gama lumoun, águyuguagüda lumuti Bungiu lídangiñe óunweni ani bián-wein weyu lárigiñe, aba lamudeirun sielun.
Dariwati lubuidun abahüdaguni le tidan gádürü líburu lánina Uganu Buiti le abürüdǘbei luagu Hesusu lidan Iseri Daradu o Abürüdǘni Güriegu Kristiánu. Gama lumoun, inarüni san susere lan sun lira? Wéiriti lisudinin álügüdahani le ani mégeiwati lóunabagüle, lugundun anhein aban lubéi úraga, málati hafiñen kristiánugu luma emenigini le hawagubei lánina hawinwandun lun súnwandan lidan paraísu (1 Korintuna 15:14). Ánheinti inarüni lubéi susere lan, gayaraabei wawinwandun aban lubuidun ibagari ámuñegü. Ligíati, inarüni san abahüdaguni le lídanbei Uganu Buiti le Habürüdübei Disipulugu luagu Hesusu o iyeeni?
LE LARUFUDUBEI DAN LE SÜGÜHALIBEI
Mítaranti Uganu Buiti le Habürüdübei Disipulugu luagu Hesusu kei labürüdǘniwa úraga, lugundun bürüwati lau ichouruni ani ítara kei lasuseredun. Lidan burí Uganu Buiti le, iridúati liri saragu fulasu le gayaraati labisidahóun uguñe weyu luma hiri gürigia ha uágubaña habahüdagua gürigia ha abürühabaña luagu dan le sügühalibei, arufudati le winwan hamá meha (Lúkasi 3:1, 2, 23).
Íbini amu abürühatiña ha awinwandubaña lidan furumiñeti luma libiaman sígulu abürühatiña luagu Hesusu.a Ítara kei labürüdǘn lidan Uganu Buiti le Habürüdübei Disipulugu, úarati ligaburi lafarúniwa Hesusu luma ligaburi háfaruniña rómana gürigia lidan dan ligía. Ayanuhati giñe luagu hachara lani disipulugu, furangu ligía labahüdawagún sun le asuseredubei (Matéu 26:56; Lúkasi 22:24-26; Huan 18:10, 11). Arufudati sun katei le, ru hamá abürühatiña uganu buiti ariñahani inarüniti ani chóuruti luagu Hesusu.
ÁGUYUGUATI SAN HESUSU LÍDANGIÑE ÓUNWENI?
Íbini afiñe hamá saragu gürigia winwan lan meha Hesusu hilá ligía, añahein machourun hamuti anhein águyugua lubéi lídangiñe óunweni. Íbini meha giñe lani apostolugu mafiñerun hamuti yebe furumiñe (Lúkasi 24:11). Gama lumoun, aba lagidarun machouruni hawéi lárigiñebei harihini Hesusu lidan ámuñegueinarügü ókaasion, dandu hagía kei amu disipulugu, lárigiñebei láguyugun. Darí lun lachülürün aban weyu lun harihini hóugiñe seingü-san gürigia lidan aban (1 Korintuna 15:6).
Meberesenga meha ánhaña adaürǘwa o afarúa hilagubei, apurichihatiña meha lani Hesusu disipulugu, lau ganigi, houn sun gürigia luagu águyuguaali lan Hesusu, íbini houn ha áfarubalin (Adügaü 4:1-3, 10, 19, 20; 5:27-32). Híchuguñein hamuga san disipulugu habagari lidoun denchaü lun hamuga machourun hamani águyuguaali lan Hesusu? Úa. Dan le warihini weiri lan lubafu afiñeni luagu Hesukrístu lidan habagari kristiánugu, dandu lidan binadu dan kei uguñe weyu, ábatima wachoururuni le lan lúgubu águyugua lan Hesukrístu.
Arufudati sun ariñahani le lídanbei Uganu Buiti le Habürüdübei Disipulugu luagu lounwen luma láguyugun Hesusu le lan lúgubu susere lan. Anhein haturiaha abahüdaguni burí le, harihubei hungua susere lan sun katei le. Ani anhein gunfuranda humá ka lan uagu lasusereda, hachoururatimabei susere lan. Layanuhaba le aban arütíkulu luagu katei le.
a Abürühati Tácito, le nasiruabei kéiburi lidan irumu 55: “Lídangiñe liri Kristu, le afarúbei lúhaburugu gumadan Ponsiu Pilatu lábugiñe lagumadihan Tiberiu, liabin iri [kristiánugu]”. Ayanuhatiña amu abürühatiña ha meha awinwandubaña lidan furumiñeti sígulu luagu Hesusu, kéiburi Suetonio, abürühati rómana, Josefo, abürühati huríu luma Plinio le Nibureingili, le meha agumadihabei Bitinia (lidan lagumeseha libiaman sígulu).