Le gíchigadibei libihiba abinirúni

LUAGU saragu dan, súdiniti sákürifisiu lidan áhuduraguni lun Heowá. Rútiña meha ísüraelina sákürifisiu hau animaalugu, ani kristiánugu subudiwatiña luagu híchugun “uéiriguni lun lau [h]ayuma”. Gama lumoun, anihein giñe amu luwuyeri sákürifisiu le hínsiñebei lun Bungiu (Ebü. 13:15, 16). Ha íchugubalin sákürifisiu ligía gúndaatiña ani resibitiña abinirúni, kei larufuduni hénpulu burí le lunbei warihini.

Aban meha ísüraelina to úaraguatu Ana to busenboun gasaani tan aban wügüri irahü, ani siñati. Aba füramase tan lun Bungiu lidan aban furíei anhoun lan gasaani, tíchugubei lan lun, lun leseriwidun lun “lidan sun libagari” (1 Sam. 1:10, 11). Lau lásügürün dan, aba tadageinadun Ana ani aba gasaani tan aban wügüri irahü le unbei tagúara Samueli. Dan le tachularagüdünbalin, aba tanügüni tidoun tawernákulu lun leseriwidun lun Heowá ítara kei füramase tani. Biní lumutu Heowá Ana luagu tadügüni sákürifisiu ligía. Ábaya gasaanigu tan seingü, ani aba profeta lan Samueli ani ligía meha giñe aban hádangiñe ha abürüdübarun Bíbülia (1 Sam. 2:21).

Ítara kei Ana luma Samueli, sun kristiánugu gachansintiwa giñe lun weseriwidun lun Wabungiute. Füramaseti Hesusu wibihiba lan saragu abinirúni luagu sákürifisiu le wadügübei lun weseriwidun lun Heowá (Mar. 10:28-30).

Subudiwatu meha Dórukasi, aban kristiána lánina furumiñeti sígulu, ladüga “súnwandan tau adüga buiti, íderagua tuguya gudemetiña”, lidan amu dimurei, adügatu meha sákürifisiu hawagu amu. Híruti aban lan “tasandirun Dórukasi, aba tounwen” ani aba hírudun íbirigu ha lídanbaña tani damuriguaü. Dan le híchugunbei fe anihein lan Féduru yarafa, aba hayumuragun lun lun lidin lau lóufudagun. Samina humá luagun ugundani le hasandirubei dan le lachülürünbei Féduru ani aba láguyuguagüdünu Dórukasi! Anihán furumiñeti wéiyaasu tayanuhan Bíbülia luagu aban águyuguni le ladügübei aban apostolu (Adü. 9:36-41). Mabulieidun lumuti Heowá tani Dórukasi sákürifisiu (Ebü. 6:10). Abürühóuati luagu tibagari tidan Bíbülia, ani gayaraati wáyeihani lubuidun tani hénpulu uguñe weyu.

Ruti giñe apostolu Pábulu aban hénpulu buiti woun ladüga yúsuti lídangiñe lidaani lun líderagun amu. Abürühati houn kristiánugu korintuna: “Newesirubei le númabei lau ugundani huagu, ani íbini nuguya guánarügü newesiraguba nungua luagu hufulesein” (2 Ko. 12:15). Furendei lumuti apostolu Pábulu lungua luagu gunda wamá dan le wadügün sákürifisiu hawagu amu ani ibihatiwa ábanya katei súdinitimati: biní lumutiwa Heowá ani gúndaati giñe wau (Adü. 20:24, 35).

Chóuruti hínsiñe lan lun Heowá lun wayusuruni wadaani luma were luagu lufulesein Larúeihan luma hawagu wíbirigu. Gama lumoun, anihein san amu katei le gayaraati wadügüni? Anha anihein. Ligibuagun wadügün katei buiti hawagu amu, gayaraati wíchugun uéiriguni lun Heowá lau wíchugun budagia. Seriwiti budagia le wíchugubei lau wagundan lun lawanserun apurichihani lidan sun ubóu. Kei hénpulu, yúsuati lun letenirún houn misionerugu luma houn amu eseriwidutiña lidan dan dayarüti espechaliti. Mégeiwati giñe budagia lun taransehóun luma lun tásügürawagüdün agumeiraguagüdüni luma burí bidéu lidoun amu burí iñeñein, lun híderawagun ha asufurirubaña ladüga somu liñawan dan luma lun tábunawagun Luban Adamuridaguni. Gayaraati wachoururuni wibihiba lan abinirúni ánhawa gíchigadi lídangiñe wámati. Ani wíchuguba giñe uéiriguni lun Heowá lau warisin (Ari. 3:9; 22:9).

Ligaburi Híchugun Fiú Gürigia Budagia Lun Lawanserun Apurichihani Lidan Sun Ubóu

Ítara kei meha lidan lidaani apostolu Pábulu, uguñe weyu, díreitiña giñe saragu kristiánugu seinsu lun híchuguni tidoun gafu to lídanboun damuriguaü to uáguboun lariñaga Budagia lun Wadagimanu lánina Apurichihani (1 Korintuna 16:2). Sagü hati lóunahani kada damuriguaü seinsu ligía tidoun sukursáli hani gefentiña luagu Heowá to arihiboun lau hageira. Anhein busén hubéi, gayaraati hóunahani hani budagia sügülügü tidoun óundaruni hani gefentiña luagu Heowá to arihiboun lau hageira. Lun hasubudiruni kátima lan iri tayusurubei óundaruni tuguya, gayaraati hálügüdahan tidan sukursáli. Hadarirubei halíaba lan hálügüdaha lidan www.jw.org/cab. Anihán fiú luwuyeri budagia le gayaraabei lounahóun sügülügü (según lilurudun fulasu).

BUDAGIA LE ICHUGÚBEI MAGURABUNGA NI KATA

Gayaraati hásügüragüdün lídangiñe seinsu le húmabei bánkurugu lidoun tiseinsun hóundarun gefentiña luagu Heowá, gayaraati hadügüni tau tárüheta lánina dúeiti o lánina seinsu areidúañuti. Yusu tumuti giñe fiú sukursáli wani páhina lidan Internet jw.org o amu páhina lidan Internet lun lichugún budagia.
Gayaraati giñe lichugún seinsu, iñari, bagü, arigeilaü o amu katei le gebegiti. Anhein ítara liña lubéi, abürüha humá aban gárada lun hafuranguagüdüni híchuguñein lan katei burí ligía kei budagia magurabahanga ni kata.

BUDAGIA LE GAYARAABEI LAGIRIBUDAGÜDÜNIWA HUN

Gayaraati híchugun seinsu keisi budagia ani gayaraabei lagiribudagüdüniwa hun anhein hemegeira.
Bürǘ humá aban gárada to ídantu hafuranguagüdei aguraba humá lagiribudagüdüniwa seinsu hun anhein hemegeira.

BUDAGIA LE MÉGEIBEI ARANSEHANI

Hubaruaguounméme hadariruba ariñahani libügürü amu burí ligaburi lichugún budagia lun lawanserun wadagimanu lánina lapurichihóun Larúeihan Bungiu. Anhein busén hubéi hayusurun aban lídangiñe igaburi le lun híchugun budagia, lau fulesei wa humá tidoun sukursáli to arihiboun lau hawadigimari gefentiña luagu Heowá ha lídanbaña hageira lun hachoururuni anhein gayara lubéi layusurún igaburi le lidan hageira. Kei ámuñegueinarügüti lubéi lilurudun kada fulasu, buídubei giñe hálügüdahan luma somu gürigia le subuditi luáguti lúrudu lun lun hanúadiruni igaburi le buídutimabei lun híchugun budagia.

Seinsu le hafayeihabei luagu ichouruni luma le hibihubei gürigia dan le mawadigimaridunhaña: Anhein hafayeihaña lubéi seinsu lun lafayeirún houn amu anhaün ounwe o lun lafayeirún hun danme le mawadigimaridunhadün, gayaraabei desidírü humá lafayeirún seinsu ligía tun hóundarun gefentiña luagu Heowá.

Seinsu le húmabei bánkurugu: Gayaraati híchugun üma tun hóundarun gefentiña luagu Heowá lun tibihini seinsu le húmabei bánkurugu ánhadün ounwe. Gayaraati hadügüni según tilurudun banku lidan hageira.

Hufanran tídangiñe aban kónpeni luma seinsu le agiribudubei hun lídangiñe le hafuredeirubei tun: Gayaraati hadügün aban dugumedu to ídanboun hariñaga lun tibihini óundaruni hani gefentiña luagu Heowá seinsu ligía danme le hounwen.

Huban o hufulasun: Anhein anuhein lubéi aban muna o aban fulasu huma le gayaraati lalugurúniwa, gayaraati híchuguni keisi budagia tun hóundarun gefentiña luagu Heowá. Anhein lidan lubéi fulasu ligía haganawa, gayaraati desidírü humá herederun awinwanda ñein darí hounwen.

Dugumedu to ídanboun hariñagei kaba lan un leredera humegen lárigiñe hounwen: Gayaraati desidírü humá lun lichugúniwa somu hufulasun, huban o hiseinsun tun óundaruni hani gefentiña luagu Heowá keisi budagia danme le hounwen. Gayaraati hadügünu dugumedu ligibugiñe aban awogóu le resibihali ubafu lúmagiñe urúei lun ladügüni wadagimanu ligía. Gayaraati giñe hadügün aban daradu luma somu gürigia lun lachoururuni lagunfulirúba lan lau le hamuriahabei libügürü le lunbei ladügǘn lau alagan le hígirubei. Gayaraabei lanügün daradu le buiti hun lidan luáguti lafayeirún liseinsuna gumadi.

Ítara kei lariñaguni liri fánreinti le “budagia le mégeibei aransehani”, lidan luwuyeri budagia le mégeiwati saragu aransehani lúmagiñe gürigia le lunbei líchuguni budagia. Adügǘwatu garüdia Donaciones planificadas para favorecer el servicio del Reino en todo el mundo lidan inglési luma chumagü lun híderawagun ha lúnbaña híchugun budagia lidan igaburi le, lun lawanserun wadagimanu lánina apurichihani lidan sun ubóu. Ayanuhatu garüdia to luagu ámuñegueinarügü igaburi le ídanbei gayara lan lichugún budagia. Kei ámuñegueinarügü lan lilurudun kada ageiraü, másiñati ñeinbei lan lídangiñe ariñahani le, le lunbei mahuudun lan hun. Seremei luwuyeri lichugún budagia le, gíbeeña gürigia gayaraati hídehan lidan wadagimanu le wadügübei íderaguaña gürigia afurendeira luagu Bungiu luma íderaguaña ha mégeibaña amu luwuyeri ídemuei lidan sun ubóu, ani ibihaaña giñe gürigia hagía saragu buiti lidan lafayeihóun liseinsuna gumadi. Anhein anuhein lubéi garüdia to hageira, amuriaha humóun luma sekretariu le lídanbei damuriguaü le ñein hubéi.

Anhein busén hubéi lanwoun ariñahani, anúadira huméi fánreinti “Busentina níchugun budagia lun wadagimanu lánina apurichihani” le gayaraabei hadariruni ǘnabu lun furumiñeguarügü páhina lani jw.org, o wa humá tidoun áfisi to ídangiñeboun larihúa lau hawadigimari gefentiña luagu Heowá.