3 Íderagua tumutiwa awandei turobuli

Anihein turobuli le siñati ladireirúniwa luéi ni laransehóun guentó. Kéiburi anhein féridihadün lubéi somu hiduhe le hínsiñebei hun o anihein lan aban sandi le máraninati, másiñati úabei lan amu katei le gayaraabei hadügüni luéidigia háluahan kaba lan hadüga lun gayara lan hawanduni higarigu. Gayaraati san tíderagunün Bíbülia lidan katei le?

SANDI LE MÁRANINATI

Ariñagatu Rosa: “Anihein aban sandi le adagarubei nuagu ladüga anihein lan meha hawagu niduheñu, libe-agei dan adügüti meha sandi ligía lun nasandirun saragu gáriti. Eibu lásügürün dan ábatima laribadun nasandiragun nungua”. Aba lídangiñe katei le adiheridagüdübarun siñá lan meha tíchugun saragu arigei lun le taturiahabei luma le taliihabei tídangiñe Bíbülia. Gama lumoun, íderagua lumutu dimurei le lariñagubei Hesusu lidan Matéu 19:26, le ariñagubei: “Anhein Bungiu, gayara lumuti sun katei adüga”. Rutu Rosa fe anihein lan ámuñegueinarügü igaburi lun gayara lan taturiahan. Kei siñá lubéi meha taliihan ladüga gáriti le tasandirubei, aba tagumeserun aganbahei taliihoun Bíbülia tuma burí amu agumeiraguagüdüni.a Ariñagatu: “Lun hamuga ua lan ariñahani le aganbahóuarügüti, siñabei hamuga nóunigiruni numadagu luma Bungiu”.

Dan le tahirudagunbei Rosa ladüga siñaali lan meha tadügün saragu, íderagua lumutu le lariñagubei 2 Korintuna 8:12: “Anhein íchiga aban gürigia sun le liyaraati según le lúmabei, lau sun lugundan, gúndaati Bungiu lau, ani resibi lumuti le líchugubei gürigia ligia; mamuriahan lumuti Bungiu le úati hama gürigia”. Haritaguagüda lumutu lira gunda lan Bungiu lau le tadügübei, ladüga adüga tani sun le tiyaraabei adüga.

LOUNWEN SOMU IDUHEI

Diana to iridúboun lidan burí arütíkulu le ásügürübei, haritaguatu: “Aba tounwen nisaani láurügü 18 irumu ani ígira lumutina lira lau aban gáriti hanarimeti, sun yebe nariñagun siñabei lan nasigirun awinwanda ani mítaran hali katei nun kei meha”. Ruti Sálumu 94:19 saragu gurasu tun Diana, ñein lubéi leremuhan abürühati sálumu lun Bungiu: “Labadinagua idiheri le agibedagubei nisaminanrugu, rútibu dǘgüdaguaü nun luma ugundani”. Ariñagatu giñe Diana: “Furíeitina lun Heowá lun líderagunina adarira somu katei le gayaraabei nadügüni lun lagalumadun gáriti le nasandirubei”.

Aba tuadigimaridun Diana íderaguaña amu gürigia ani barüti wadagimanu ligía ugundani tun. Lau lásügürün dan aba taríagun tungua kei efeindigülei le hayusurubei irahüñü ñǘbürigiña lun hefeindihan: ladüga gayara lan meha lefeindihóun lau íbini ahalahóuali lan. Furendeitu gayara lan meha tíderagun amu gürigia, lau sun sandigua tan tungua kei efeindigülei le áhalahaali ligía. Ariñagatu: “Sódini aban níchugun fe dan le lan nayanuhan luagu somu adundehani tídangiñe Bíbülia houn ha únbaña níchiga narufudaha, líchuguña lan meha Heowá gurasu nun”. Adügatu aban lísüta lau hiri lubúeingu Bungiu ha lánina binadu dan ha ásügürübaña lídangiñe saragu lénrengunga. Ka tafurendeirubei Diana? “Sun meha gürigia hagía furíeitiña meha saragu”. Furendeitu giñe “anhein maliihan lan gürigia Bíbülia, madarirúnbei ni aban óunabagülei”.

Gama lumoun, arufudaaru Bíbülia ámuya katei tun Diana: lunti lan tasaminarun luagu le lunbei lasuseredun ámuñegü mama luagu le sügühalibei. Ruti emenigini le lídanbei Adügaü 24:15 gurasu tun, ariñagati: “Lásaaragüdübaña lan [Bungiu] hilaaña, dandu ha buídubaña kei ha wuribabaña”. Afiñetu funa san Diana lásaaragüdüboun lan Heowá tisaani? Óunabatu: “Chouru numuti narihiyaboun lan nisaani. Ru laali Núguchi le siélubei kaba lan weyu wadunragua. Gayaraati naríagun nungua tuma lidan wani fuluri-agei ani narihuboun lau saragu ínsiñeni kei narihinu lidan weyu le ídanbei nasirua tan”.

a Anihein saragu ariñahani le aganbahóuarügüti lidan páhina lidan Internet jw.org.

Gayaraati tíchugun Bíbülia gurasu woun íbini lidan dan le hénrengutimabei

IDA LIÑA GAYARA LAN LÍDERAGUNIWA BUNGIU?

Ménrenguti óunabagülei le tíchugubei Bíbülia: “Yarafati Aburemei houn ha agúahabaña luagu, houn ha agúahatiña luagu lau hanarün. Gúnfuli lumuti hayumahan ha inebehabubaña lun; dan hamuriahan luma lun líderaguniña, aganba lumutiña, sefuláña” (Sálumu 145:18, 19). Ma lubuidun dimurei burí le! Gama lumoun, ida liña lóunabuniwa Bungiu dan le wamuriahan luma lun líderaguniwa?

LAU LÍCHUGUN EREI WOUN

Gayaraati ladügün turobuli lun lábürüha warüna o labuchadun wawagu íbini lidan weseriwidun lun Bungiu (Ariñawagúni 24:10). Gama lumoun, ruti Heowá “erei lun le buchaalibei uagu, ru ligía lanwoun lere le uánimabei” (Isaíasi 40:29). Ariñagati apostolu Pábulu, le awandubei saragu lénrengunga, “sun katei gayara numuti” lau lídehan “le íchugubei erei nun” (Filipuna 4:13, TNM). Ruti Bungiu erei lun Pábulu lau lídehan lani sífiri sandu ani gayaraati giñe ladügüni ligiaméme hun, anhein hamuriahan luma (Lúkasi 11:13).

LAU LÍCHUGUN LICHÚ AAU WOUN

Ka gayaraabei wadügüni anhein megei wabéi ídemuei lun wadügün o lun gunfuranda wamá aban adundehani tídangiñe Bíbülia? Abürühati disipulu Santiagu: “Anhein megei lubéi aban hídangiñe lichú aau, amuriahalá luma Bungiu, ábame líchuguni lun, ladüga mánginti ani ruti lau areini houn súngubei” (Santiagu 1:5). Lun úara lan le wadügübei luma le wariñagubei dan le wafurieidun mosu waliihanu Bíbülia adüga wameime le wafurendeirubei (Santiagu 1:23-25). Ánhawa adügei ítara, warihibei buidu lan tadundehan Bíbülia.

LAU LÍCHUGUN DARANGILAÜ WOUN

Anhein weiri lubéi wadiheri, gayaraati líderaguniwa Heowá lun darangilu wamá. Ariñagatu Lererun: “Madiherida humá luagu ni kata, ariñagarügü huméi sun katei lun Bungiu súnwandan dan le hafurieidun; amuriaha humá luma, mabulieidagunga lun híchugun eteingiruni lun. Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan, ladüga lídanñadün aban luma Kristu Hesusu” (Filipuna 4:6, 7). Amuriaha wamá luma Heowá lun líchugun darangilaü woun.

Gama lumoun, ánheinti maranserun waturobulin lau lóufudagun? Masaminara wamá bulíeiguali lan Bungiu wawéi. Anhein asigira lénrengunga, gayaraabei líchugun Heowá erei luma ganigi woun lun wawandun (1 Korintuna 10:13). Ani füramasetu giñe Bíbülia lachülürüba lan dan lun maturóbulin haadiwa lan lun súnwandan.