Huuti san taturiahóun waruguma luma aríaagüdüni lun lasubudirún kaba lan asusereda ámuñegü?

TATURIAHÓUN WARUGUMA

Ariñagatiña aturiahatiña waruguma weiri lan lubafu Hati, waruguma luma burí ubóu lidan habagari gürigia. Ariñagatiña giñe ídeha lan ligaburi tesetirun waruguma dan le nasirua lan aban irahü lun lasubudirúniwa ida luba lan ligaburi luma ida luba lan lidin lun lidan libagari.

Íbini hadan lan binadu babilóniana lagumesera taturiahóun waruguma, añahagua gürigia ayusurei échuni le lun hálugun hasubudiruni kaba lan asusereda ámuñegü. Arufudati aban akutihani le adügǘbei Meriga lidan irumu 2012, afiñe lan aban hádangiñe kada ǘrüwa gürigia aban lan “luwuyeri siensia” taturiahóun waruguma ani ariñagatiña diisi hádangiñe kada san gürigia aban lan “siensia”. Aban san siensia taturiahóun waruguma? Uá. Ida liña wasubudiruni? Ariha waméi.

• Mabafutu waruguma luma burí ubóu hawagu gürigia kei aubei hariñagei aturiahatiña waruguma.

• Liibe-agei dan, gayaraati lasuseredun le hariñagubei lun furumiñeguarügü gürigia.

• Añahagua aturiahatiña waruguma afalarei binadu saminaü luáguti lagararahaña lan le líbiri ubóu geyegu lau ubóu le ídanbei wawinwanda, ani le linarün katei, geyegu lau Weyu lagararaha dandu ubóu le kei le líbiri.

• Ámuñegueinarügüti katei le lariñagubei kada aturiahati waruguma luagu le lunbei lasuseredun lun ligiaméme gürigia.

• Yúsutiña aturiahatiña waruguma 12 dibuhu le unbei hagúara Sodiaku lun hafanreinraguniña gürigia lidan burí sétanu, según hati le ídanbei nasirua hamá. Kei sánsihali lubéi lubara Ubóu sielu lau lásügürün dan, múaran haali hati le híchugubei lun kada dibuhu luma dan le lásügürünbei Weyu yarafa lun hóundaragun waruguma ha anügübalin liri dibuhu burí ligía.

Afiñewati arufuda lani dibuhu le unbei hagúara Sodiaku ida liña lan ligaburi gürigia, ani le linarün katei, ámuñegueinarügüti hagaburi gürigia ha nasiruabaña lidan ligiaméme weyu. Marufudun lumuti weyu le ídanbei nasirua lan gürigia ida liña lan ligaburi. Lubaragiñe hariñagun aturiahatiña waruguma ida liña lan ligaburi gürigia luma ligaburi lóuserun, ábarüga hariñaguni le hasaminarubei luagu gürigia ligía. Ma lasaminarúniwa wuriba hawagu amu lira?

ARÍAAGÜDÜNI

Lúmagiñe binadu dan, álügüdahatiña gürigia hama garíaahatiña. Añahein meha hádangiñe garíaahatiña, áfaaguatiña lun “haliihani” kaba lan asusereda lau hakutihani lisasa aban gürigia o aban animaalu ani áluahatiña meha ariñahani lidan ligaburi leigin aban gayu. Añahein meha amu, akutiha hamuti meha makü le lígirubei lagünchün bachati o gafe lidan kopu dan le lamabeidun. Uguñe weyu, yúsutiña amu burí katei, kéiburi bará to gíriboun tarotu, bali to lautu bídüriu luma burí dadu. Lunti funa san lafiñerúniwa luagu aríaagüdüni? Uá, moun lumuti. Ariha waméi ka lan uagu.

Akutiha waméi múarani le lídanbei haríaagüdün gürigia. Liibe-agei dan, ámuñegueinarügüti luáriuagua meberesenga anhein ligiaméme lubéi luwuyeri aríaagüdüni hayusurubei o amu lan. Kei hénpulu, anhein álügüdaha aban gürigia hama bián ámuñegueinarügü garíaahatiña, lunti hamuga híchuguni ligiaméme óunabagülei lun libügürü le lunbei lasuseredun lun anhein “haliihañoun” lubéi bará to gíriboun tarotu, gama lumoun, liibe-agei dan, masuseredunti ítara.

Machourunwati giñe luagu ligaburi haríaagüdün luma lébuna hadügüni. Añahein ariñagutiña ligaburi lan hóunabun gürigia lun le ariñawagúbei houn “haliihabei” garíaahatiña, ánheinti bará tuma bali to lautu bídüriu lúnrügüñein luenden haríaagüdün hayusuroun. Kei hénpulu, adügatiña burí sásaamu lidan aríaagüdüni saragu álügüdahani lun gürigia ani ténitiña lun lóunabagüle, dandu lun le lariñagubei kei lun ligaburi lariñaguni. Lárigiñe, aba hayusuruni ariñahani le líchugubei gürigia houn, míchugunga fe, lun hadügün kamá hamuga subudi hamaali le asuseredubei lun. Danti le ibihaaña lun lafiñerun gürigia hawagu, aba hasagarun saragu seinsu luéi.

KA TARUFUDAHABEI BÍBÜLIA?

Afiñeni luagu bürüwañu liña lan le lunbei lasuseredun houn gürigia lébunabei taturiahóun waruguma luma aríaagüdüni. Inarüni san bürüwañu liña lan le lunbei lasuseredun woun? Arufudahatu Bíbülia, to Lererun Bungiu, gayara lan wanúadiruni kaba lan wadüga o wafiñera ani ariñagatu giñe arihúa lan, lau lásügürün dan, anhein buidu lubéi le wanúadirubei lidan wabagari (Hosué 24:15).

Anihein amu resun hama ha busenbaña hagundaaragüdüni Bungiu lun hamahadun lun taturiahóun waruguma luma lun aríaagüdüni: siadi laali Bungiu sun burí échuni le. Ariñagati tidan Lererun: “Ualá ni aban hídangiñe adagaragüdüti liráü [...], maríaagüdün huguyame, málugun huguyame hariñaguni katei le lunbei lasuseredun, mabiñarahan huguyame, [...] málügüdahan huguyame hama garíaahatiña, ni hama búyeigu, ni hama hilaaña. Lugundun mínsiñetiña ha adügübaña katei líbeina le lun Bungiu” Heowáa (2 Lúrudu 18:10-12).