Ida luba buídutima lan waturiahanu Bíbülia ani hínsiñe ligíame woun waturiahanu?

Hosué aliihei Lilurudun Bungiu; léiguadun lubarieirun Herikó gama lumoun méiguaduntu tuban Raabü; Hosué iñurei lúhabu sielun dan le lafurieiduña lan

GAGIBUGUATI meha Hosué luma aban katei hénrenguti: mosu meha ladundehaniña ísüraelina lidoun Fulasu Füramasewati. Lun ladügüni, lunti meha lagagibudagun luma saragu lénrengunga. Gama lumoun, chóurugüda lumuti meha Heowá lun buídubei lan lidin lun ani ínchaha lumuti lun ganigi lan, here ligíame. Ariñagati lun lun gaganbadi lan lun Lilurudun luma lun laliihani áriebu wéyuagu lun lagunfulirun lau sun le bürüwañubei lidan. Ariñagati giñe lun anhein lan ladüga, buídubei lan lidin lun ani ladügübei lan katei lau lichú aau (Hos. 1:7, 8).

Gagibuguatiwa giñe luma saragu lénrengunga lidan “weyu hénrenguti” le ídanbei wawinwanda (2 Tim. 3:1). Buídubei giñe lidin woun ánhawa adügei le lariñagubei Heowá lun Hosué. Líderagubadiwa waliihanu Bíbülia sagü weyu lun wafalaruni le tarufudahabei lidan wabagari danme le wagagibudagun luma óuchawaguni.

Gama lumoun, le linarün katei, saragu wádangiñe maturiahan wamutu Bíbülia buidu ani mínsiñegubeiti houn fiu wádangiñe lun waturiahan. Keiti súdini lubéi waturiahanu Bíbülia, lunti wakutihani ariñahani le lídanbei fánreinti “Hóucha huméi hadügüni le”. Ñein, hadariruba adundehani buiti lun buídutima lan haturiahanu Bíbülia ani hínsiñe ligíame hun hadügüni.

Eremuhati aban abürühati sálumu: “Barübana lidan lémeri bugumadin, ladüga lídanñein nugundan” (Sal. 119:35). Gayaraati giñe línsiñedun taturiahoun Lererun Bungiu hun saragu. Hadariruba saragu pérüla lánina lichú aau éibume hasubudirunu buidu.

Íbini madundehanbadün lan aban néchani, ítara kei meha ladügüni Hosué, gama lumoun, hagagibudaguba luma turobuli. Ligíati, ítara kei Hosué, aturiaha huméi le bürüwañubei lun hubuidun guánarügü ani falá humeime le hafurendeirubei tídangiñe Bíbülia lidan hibagari. Ánhadün adügei le, buídubei lidin hun ani hadügübei katei lau lichú aau.

HÓUCHA HUMÉI HADÜGÜNI LE

Furíei humá lubaragiñe haturiahan. Lisaminan Bungiu suntigabafu tídanbei Bíbülia ani ligía guánarügü adügübei lun labürüdǘniwa lun wasagarun buiti lídangiñe. Ligíati, danme le haliihanu Bíbülia, amuriaha humá luma Bungiu lun líderagunün gunfurandei le haliihabei, lun haritaguni luma lun hawinwanduni le hafurendeirubei (Ésüd. 7:10).
Álügüdagua humá hungua. Danme le haliihanu Bíbülia o wani agumeiraguagüdüni, álügüdagua humá hungua: “Ka larufudahabei fánreinti le nun luagu Heowá? Ka lánibei luma uganu létima uágubei tayanuha Bíbülia? Ida luba nayusuruni saminaü le lun níderagun amu?”.
Ráramagua humá asaminara luagu le haturiahabei. Danme le haliihan, ráramagua humá ani samina humá: “Ida liña ladügün ariñahani le lun nasandiragun nungua? Ka uagu ladüga lun nasandiragun nungua ítara? Ka lánibei le luma le winwan naalibei, le nawinwandubei guentó luma le gayaraabei nawinwanduni ámuñegü? Ida luba nafalaruni adundehani tídangiñeti Bíbülia le lidan nibagari?” (Hob. 23:5; Sal. 49:3). Samina humá anhein gayara lubéi hafuranguagüdüni ka lan uagu línchahaña Heowá lumutuniña lun móuserun hamá lau somu igaburi ani ka lan gayaraabei lasuseredun anhein mafalarun hamá ladundehan (2 Lur. 32:28, 29).
Yusu huméi hisaminan dan le haliihan abahüdaguni tídangiñeti Bíbülia. Kei hénpulu, dirá humuti san lidan hisaminan haluguruñein lan líbugañanu Hosé Hosé houn ísümaelina? (Agu. 37:18-28). Ka harihibei, hirimichubei ani ka haganbubei? Samina humá huguya lan gürigia le uágubei haliiha ani álügüdagua humá hungua: “Ka san lasaminarubei? Ka lasandirubei?”. Ladügüba hasaminarun luagu burí katei le lun genege lan hawinwanduñein lan le uágubei haliiha ani buídutimabei haturiahan.
Yusu humoun agumeiraguagüdüni tótima wayusuruboun lun warufudahan to adügǘboun lun wáluahan lanwoun ariñahani. Áfaagua humá hasubudirunu agumeiraguagüdüni to lídanboun hiñeñe, dandu to lídanboun Internet kei to imprimirúaboun. Masaminara humá saragu lun hamuriahan ídemuei hama amu lun hafurendeirun ayusuroun buidu. Kei hénpulu, tíderagubadün líburu Adundehani lun haturiahan gefentiña luagu Heowá lun hadarirun ariñahani luagu ámuñegueinarügü katei. Hadariruba giñe ariñahani huuti tidan garüdia Adundehani lun taturiahóun Lererun Bungiu luagu halía lan leredera ítaga ageiraü o fulasu luma lesetirun, ka lan dan lasusereda ítaga katei, ligaburi meha hawehan gürigia, hamisurahan luma burí amu katei.
Bürǘ huméi le súdinitimabei lídangiñe le haturiahabei. Líderagubadün hadügüni le lun haritaguni le haturiahabei. Ani aban katei buídutimati le gayaraabei hadügüni, hayanuhan luagu le hafurendeirubei hama amu. Samina humá anhein gayara lubéi hayusuruni ariñahani le lidan hapurichihan. Líderagubadün adundehani le lun haritaguni katei le súdinitimabei ani gayaraabei hayusuruni le furendei humaalibei lun híderagun amu.