Gebegiti lun Heowá laganbuniwa ariñaga “ítarala”
GEBEGITI áhudurawaguni le hadügübei lubúeingu Heowá lun. Téniti lun le hadügübei, aganba lumutiña ani ruti fe luagu sun le hadügübei lun halawahani, íbini genege lan mebegi lan (Mal. 3:16). Kei hénpulu, átirihali san wéiyaasu wariñaguni dimurei ítarala? Gayaraati ariñaga wamaali lan saragu wéiyaasu darí lun siñá lan wabahüdüni. Gebegiti san murusun dimurei le lun Heowá? Anha! Lun gunfuranda wamani ka lan uagu gebegi lubéi dimurei le lun, ariha waméi ka lan mini lubéi luma ida liña lan layusurúniwa tidan Bíbülia.
“HÓUNABAME SUN LÍLANA FULASU ARIÑAGA: ‘ÍTARALA!’”
Lidan garifuna, dimurei ítarala mini lan “chóuruti”. Lídangiñe aban dimurei ebüréu lasagarúa ani “afiñerúati luagu” luma “úaraguati” mini lubéi. Anihein meha dan layusurún lidan katei luáguti lúrudu. Kei hénpulu, aba meha hariñagun gürigia “ítarala” lárigiñe háfiñurun lun hachoururagüdüni le lan hariñagubei inarüni lan ani hagíaba lan ariha luagu ánhaña magunfulirun luagu le háfiñurubei (1 Lur. 5:22). Anhein anihein lubéi meha somu füramasei lidan le hariñagubei, lau hariñagun “ítarala” hadan gürigia, adügati meha lúntima mosu lan hagunfuliruni le hariñagubei (Neem. 5:13).
Lidan kapítulu 27 tidan líburu to gíriboun 2 Lúrudu, dariwati aban lubuidun hénpulu luagu layusurún dimurei ítarala. Lárigiñe hebelurun ísüraelina lidoun Fulasu Füramasewati, aba hóundaragun luagu wübü Ebali luma luagu wübü Gerisímü, lun haganbuni laliihóun Lúrudu luma lun hariñagun hagunfulirubei lan. Adüga hamuti katei le lau hariñagun “ítarala” sagü haganbuni kaba lan asusereda ánhaña maganbadi lun gumadi (2 Lur. 27:15-26). Gayaraati san wasaminarun luagu hamalali saragu milu wügüriña, würiña hama irahüñü óunaba lau umalali héreti “ítarala!”? (Hos. 8:30-35). Chóuruti mabulieidun hamani ísüraelina füramasei le meha hadügübei weyu ligía. Ani subudi wamuti gúnfuli hamani, ladüga ariñagatu Bíbülia: “Seriwitiña Ísüraelina lun Wabureme sun wínwanñu lan Hosué, luma lárigiñe lounwen, sun wínwanñu hamá wéiyaaña mutu ha subudihabúbaña lun sun le ladügübei Wabureme hawagu Ísüraelina” (Hos. 24:31).
Yusu lumuti meha giñe Hesusu dimurei le ásügürawagüdübei kei “ítarala” lun lachoururagüdüni le lan ariñawagúbei inarüni lan, gama lumoun, adüga lumuti lidan aban igaburi espechaliti. Lubaragiñe layusuruni Hesusu kei óunabagülei lárigiñe lariñawagún dimurei burí le afiñerúati luagu, yusu lumuti meha lubaragiñe lariñagun somu dimurei lun lachoururagüdüni le lan lunbei lariñaguni inarüni lan. Lidan kesi le, sügügüdawati burí dimurei le kei “ninarün hau”. Anihein meha dan lariñaguni Hesusu dimurei ítarala aban lárigi aban, “ítarala ítarala”, le ásügürawagüdübei kei “ninarün hau” (Mat. 5:18; Huan 1:51). Ítara liña lachoururagüdüni le lan lúgubu, inarüni lan dimurei le lariñagubei. Gayaraati meha ladügüni katei le ladüga lúnrügüñein lichugúa ubafu lun ladügün lun lagunfulirun sun le füramase lubéi Bungiu (2 Ko. 1:20; Aruf. 3:14, TNM).
“ABA HÓUNABUN SUN LÍLANA FULASU ARIÑAGA: ‘ÍTARALA!’ ABA HALAWAHANI ABUREMEI”
Ariñagatiña meha giñe ísüraelina “ítarala” dan le halawahani Heowá luma dan le hafurieidun lun (Neem. 8:6; Sal. 41:13). Dan meha lariñawagún dimurei le, lárigiñe lagumuchun aban furíei, ha meha aganbubalin arufuda hamuti luagu úara hamá luma le ariñawagúbei. Lau meha gayara lan húaradun súngubei lidan igaburi le dan le ladügǘn furíei, adügati meha lúntima hagundaarun lau háhuduragun lun Heowá lidan burí igaburi le. Ligía meha asuseredubei dan le lanügübarun urúei Dawidi Lubagüsina daradu Herusaléun. Lidan fedu le adügǘbei lárigiñe katei le, aba leremuhóun aban uremu le ladügübei Dawidi ani aban meha giñe lubuidun furíei lun Bungiu uremu ligía (1 Kro. 16:8-36). Hingí lumutu meha hanigi ísüraelina dimurei ligía darí lun hariñagun “sun lílana fulasu [...]: ‘Ítarala!’ aba halawahani Aburemei”. Chóuruti adüga lan óunabagülei le híchugubei ísüraelina súngubei lidan aban lun gúndaatima hamá.
Ítarameme, ariñagatiña meha kristiánugu ha lánina furumiñeti sígulu “ítarala” dan le halawahani Heowá. Ani añahein hádangiñe ha abürühabarun Bíbülia, liibe-agei dan yusu hamuti dimurei burí le tidan hagaradan (Rom. 1:25; 16:27; 1 Fe. 4:11). Íbini tidan líburu to gíriboun Arufudúni, fuátiña ánheligu íchiga uéiriguni lun Heowá sielu lau burí dimurei le: “Ítarala! Alelúya!” (Aruf. 19:1, 4). Ariñagatiña meha giñe furumiñetiña kristiánugu “ítarala” dan burí le lagumuchun furíei le adügǘbei lidan adamuridaguni (1 Ko. 14:16, TNM). Gama lumoun, aban meha dimurei le moun lumuti hariñaguni masaminarunga.
KA UAGU WEIRI LUBÉI LISUDININ WARIÑAGUN “ÍTARALA”?
Lárigiñe le akutiha wamaalibei, gunfuranda wamaali buidu ka lan uagu súdini lubéi lun wariñagun “ítarala” dan le lagumuchun furíei. Dan le wayusuruni dimurei le lárigiñe lagumuchun furíei le wadügübei, warufuduñein adüga wamuti lan tau sun taruman wanigi. Dan le wariñagun “ítarala” lau umalali héreti o lidan wasaminan lárigiñe waganbun aban furíei le adügǘbei hadan sun gürigia, warufuduña úara wamá luma le ariñawagúbei. Ariha wamá ámuya resun luagu ka lan uagu súdini lubéi lun wariñagun “ítarala”.
Lugundun ítara, warufuduñein weteniruña lan lun furíei le adügǘbei lugundun gadan lumuti katei le wáhuduragun. Huduguatiwa lun Heowá mámarügü lau le wóunabubei lárigiñe le ariñawagúbei lidan furíei, adüga wamuti giñe lau ligaburi wóuserun dan le ladügǘña lan aban furíei. Kei busén wamá wariñagun “ítarala” tídangiñe sun taruman wanigi, gayaraati líderaguniwa katei le lun buidu lan wagaburi dan le ladügǘña lan aban furíei luma lun wíchugun arigei lun le ariñawagúbei.
Lugundun ítara liña warufuduni lídanñadiwa lan aban hama wíbirigu. Dan le ladügǘña lan furíei, aba hetenirun sun lílana damuriguaü lun haganbuni úara le ariñawagúbei (Adü. 1:14; 12:5). Dan le wariñagun úara “ítarala”, aba lederebugudun úarani le wádanbei. Lau lan yebe umalali héreti o lidan lan wasaminan wariñaga “ítarala”, wíchuguña aban resun dǘgüdati lun lóunabuni Heowá le wamuriahabei súngubei wagía úara.
Dan le wariñagun “ítarala”, walawahañein Heowá.
Lugundun ítara walawahañein Heowá. Ruti Heowá fe luagu sun le wadügübei lun walawahani, íbini genege lan woun mebegi lan le wadügübei (Luk. 21:2, 3). Ariha lumuti Bungiu lébuna wadügüni katei ani gayaraati larihini le tídanbei wanigi. Íbini anhein lunti lubéi waganbahani adamuridaguni luéigiñe gágamuru, gayaraati wachoururuni luagu leteniruña lan woun dan le wariñagun “ítarala”. Danti le wariñagun “ítarala”, wóundaraguña hama ha lídanbaña adamuridaguni lun walawahani Heowá.
Kei le aubei warihei, dan le wariñagun “ítarala” gayaraati genege lan aban lan katei masudininti, gama lumoun, mítaranti. Afuranguagüdatu líburu Perspicacia hu lan dimurei le lun lariñaguni gürigia “afiñe lan ani gunda lan lau le ariñawagúbei lidan furíei ani hemenigi lan luagu tau sun lanigi”. Ligíati, ságüme wariñagun “ítarala”, wagundaaragüdüñein Heowá (Sal. 19:14).