“Lúmagiñe guentó, adüga huméi le” Ladügǘba Aritaguagülei 5 lidan gádürü-hati
1. Ka uagu weiri lubéi lisudinin Aritaguagülei?
1 “Lúmagiñe guentó, adüga huméi le, haritaguagüleme nuagun.” (Luk. 22:19.) Lau dimurei burí le, ruti Hesusu gumadi houn lani disipulugu lun haritaguni sákürifisiu le ladügübei dan le lóunwenbei hawagu sun gürigia ubouagu. Ladüga sun buiti le ibiha wamaalibei lídangiñe lebegi asalbaruni, ligía warihinbalin Aritaguagülei kei ókaasion le súdinitimabei houn kristiánugu ani lau irumu le, ladügǘba 5 lidan gádürü-hati. Eibu layarafadun weyu ligía, ida luba warufuduni lun Heowá luagu teinki wamani? (Kol. 3:15.)
2. Ida liña líderaguniwa waturiahan luma wararamagun asaminara lun warufuduni luagu súdini lan Aritaguagülei woun?
2 Aranse wamá. Libe-agei dan, dan le layarafadun aban ókaasion súdiniti, aba waranserun. Lidan luáguti Aritaguagülei gayarati waranserunu wanigi lau waturiahani hama waduheñu sun burí katei le meha asuseredubei lubaragiñe lounwen Hesusu ani samina wagíame buidu luagun (Ésüd. 7:10). Dandu tidan wani kalendariu kei tidan garüdia Examinando daritiwa aban lísüta lau burí bérusu le ayanuhabei luagu sügǘ burí le. Tidan La Atalaya to lánina 1 lidan bián-hati irumu 2011 (páhina 23 luma 24) dariwatu aban lísüta wéiritimatu to óunahabaliwa lidoun fiú kapítulu tidan líburu El hombre más grande.
3. Ida liña líchugun apurichihani chansi woun lun warufuduni luagu súdini lan Aritaguagülei woun?
3 Wapurichiha. Waganwoundagüdüni wapurichihan ligía ábanya manera lun warufuduni súdini lan Aritaguagülei woun (Luk. 6:45). Lúmagiñe samudi 17 lidan ǘrüwa-hati ladügǘba aban wadagimanu lidan sun ubóu lun hamisurahóun sun gürigia lidoun Aritaguagülei. Gayarabei san hadügün somu aransehani lun haganwoundagüdüni hani ministeriu, o heseriwidun lan kei prekursoru ídehati? Ka uagu mayanuhan hubalin hama tílana huban lidan Guñoun lánina Áhuduraguni lidan Familia?
4. Ka buiti wasagarubei dan le woudin lidan Aritaguagülei?
4 Gíbeti buiti wasagarun dan le woudin lidan Aritaguagülei sagü irumu. Dan le wasaminarun luagu ru lumuti lan meha Heowá Liráü le ábanrügüti lebegime wasalbarun ruti dǘgüdaguaü woun ani adügati lun laganwoundun ínsiñeni le wasandirubei luagu (Huan 3:16; 1 Huan 4:9, 10). Adügati le lun mabusenrun wamá wawinwandun woun guánarügü (2 Ko. 5:14, 15). Adügati giñe lun busén wamá walawahani Heowá o wayanuhan luagu houn amu (Sal. 102:19-21). Wéiriti weteingiruni Heowá luagu chansi le lunbei líchuguni woun 5 lidan gádürü-hati lun ‘waritaguni lounwen Hesusu’, ani aguraba wamuti weyu ligía lau saragu ugundani (1 Ko. 11:26).