Aranse wamá lau ugundani lubá Aritaguagülei
1. Ka chansi espechaliti líchugubei lidaani Aritaguagülei woun?
1 Líchuguba Aritaguagülei le lunbei ladügǘniwa luagu-biama 26 lidan ǘrüwa-hati chansi espechaliti woun lun wagundaarun lau wasaminarun luagu aransehani le adüga láalibei Bungiu lun wasalbarun (Isa. 61:10). Gama lumoun, ánhawa aganwoundagüdei wagundan lúmagiñe guentó, líderagubadiwa aransera lubá ókaasion le. Ariha waméi ka lan uagu.
2. Ka ínchahabaliwa adüga aransehani lubá Aritaguagülei?
2 Aransehani lubá Aritaguagülei. Aban adamuridaguni sensiyuti Ladinerun Aburemei gama lumoun wéiriti lisudinin. Ani kei mabuserun wabéi wabulieidun ni kata le súdiniti, lunti aransereina wamani sun katei lúmagiñe guentó (Ari. 21:5). Súdiniti lanuadirún oura luma fulasu le buídutimabei, luma lachoururúniwa haruma lan ani aranseñu ligíame lidan dan. Lunti táluahoun diwéin funatu tuma fein maganatu lébini. Mosu giñe laranserun íchuguti yanu buidu, ani mosu furangu lan dandu houn ídehatiña kei houn ha lúnbaña hásügüragüdünu fein tuma diwéin ka lan hawadigimaribei. Chóuruti adüga wamaali lan libe-agei katei le. Gama lumoun, haritagua waméi eteingiruni lan le wasandirubei luagu lebegi asalbaruni ínchahabaliwa adüga aransehani buiti lubá adamuridaguni sagüráüti le (1 Fe. 1:8, 9).
3. Ida luba waranserunu wanigi lubá laritawagúniwa Ladinerun Aburemei?
3 Aranse wamóun wanigi. Súdiniti giñe waranserunu wanigi. Ítararügübei gunfuranda wamani kátima lan lisudininbei ókaasion le (Ésüd. 7:10). Lun gayara lan wadügüni katei le, lunti wígirun dan lun waliihani bérusu burí le anúadirubei lun laliihóun lidan lidaani Aritaguagülei, ani ráramagua wagíame asaminara luagun lagumuhóun burí weyu le lawinwandubei Hesusu ubouagu. Ánhawa araramagua asaminara luagu hénpulu lánina sákürifisiu le líchugubei Hesusu línchahabadiwa áyeihei (Gal. 2:20).
4. Lídangiñe sun abinirúni le lanügübei lebegi asalbaruni, kátima íchugubei ugundani hun?
4 Seriwiti lani Kristu sákürifisiu lun larufudúniwa Heowá lan garichabei lun larúeihan, sefu lumutiwa luéi figóu luma óunweni ani ruti chansi woun lun wadügün aban lubuidun umadaguaü luma Bungiu luma lun wibihin ibagari magumuchaditi (Kol. 1:21, 22, 1 Huan 2:2). Íderagua lumuti giñe wararamagun asaminara luagun sákürifisiu le lun wéiritima lan wabusenrun wagunfulirun lau füramasei le wadügübei lun Heowá dan le wederegeragunbei woungua lun luma wasigiruni lani Kristu hénpulu lau úaraguni (Mat. 16:24). Chóuruti wéiribei lan tagundaarun wanigi lau waranserun lubá Aritaguagülei ani chülǘ wagíame lidoun.