Haransehaña san lubá Aritaguagülei?

Espechalibei meha lagumuhóun Luéyuri Esefuruni le lunbei lefeduhani Hesusu. Kei meha madiseeli lan lounwen, busenti meha lefeduhani Luéyuri Esefuruni hama lani apostolugu lun líchugun gumadi houn lun Ladinerunhaali lanme Aburemei hefeduha lúmagiñe dan ligía lun lubaruaguóun. Ligía lóunahanbalin Féduru luma Huan aranseha aban rumu (Lk 22:7-13; ariha wamóun iyawaü to luáguboun tidáü). Haritaguagüda lumutiwa le mosu lan waransehan lubá Aritaguagülei le lunbei lanügün fulasu weyu 27 lidan ǘrüwa-hati. Chóuruti anuadirúaali lan lidan damuriguaü kaba lan íchigei yanu, adügǘwa ligía aransehani tibügürü fein tuma diwéin o katei líbeina lira. Agia wagía, ka gayaraabei ladügüni kada aban wádangiñe lun aranseñu lan lubá Aritaguagülei?

Aranse wamóun wanigi. Samina wamá hulili luagun aliihani tídangiñeti Bíbülia le anuadirúbei lubá Aritaguagülei. Wadariruba aban programa tidan garüdia Taturiahóun Lererun Bungiu sagü weyu. Anuhein giñe aban programa dayarütimatu tidan garüdia Adundehani lun taturiahóun Lererun Bungiu páhina 54 darí 57 luma tidan ubanaü Le lunbei ladügǘniwa lidan adamuridaguni to lánina gádürü-hati, irumu 2020. Anhein busén hubéi hakutihani lisudinin lebegi esefuruni úara hama hiduheñu, hadariruba lanwoun ariñahani tidan Índice de las publicaciones Watch Tower luma tidan garüdia Adundehani lun haturiahan gefentiña luagu Heowá.

Agunbiraha wamaña amu. Adüga waméi sun wayaraati lun wídehan lidan tafanreinhóun agunbirahagülei lubá Aritaguagülei. Ka gürigia gayaraabei wagunbirahaniña? Gürigia ha wabisidahabaña, ha meha aturiahabarun Bíbülia wama, waduheñu hama amu gürigia ha wasubudiragun. Hadügübei wéiyaaña lidan afiñeni sun hayaraati lun hagunbirahaniña íbirigu ha dilihañabaña. Mabulieida waméi ánhawa lan agunbiraha somu gürigia le awinwanduti dise, gayara lan wáluahani lidan páhina jw.org halíaba lan ladügǘwa Aritaguagülei le yarafatimabei lun ani kaba lan oura. Bagǘ humá luagu fánreinti WAWAGU, ábameti hebelurun lidoun fánreinti “Aritaguagülei”.

Ka amu aransehani gayaraabei wadügüni lubá Aritaguagülei?