Apurichiha wamá manufudeuga lidan burí bísinisi
1. Ka uagu moun lumuti lubéi taweiridun wanigi lau wanufudedun wapurichihan lidan burí bísinisi?
1 Hanufudetün san hapurichihan lidan burí bísinisi? Anhein ítara liña lubéi, madiherida humá; mámarügüñein hun lasusereda. Íbini apostolu Pábulu, aban apurichihati le manufudeti, mosu meha ganigi lan lun lagunfulirun lau lani ministeriu (1 Tesa. 2:2). Hubaruaguóunmeme hadariruba ǘrüwa álügüdahani le wadügübei wóuniwagua sun oura luagu apurichihani lidan bísinisi luma fiú adundehani huuti luagu ka lan gayarabei wadügüni.
2. Ka uagu moun lumuti lubéi wasaminarun hasafaraguba lan nadagimeintiña ánhawa ayarafada lun wayanuhan hama?
2 Hasaminaruba funa san nadagimeintiña nadarasahañanu lan? Tidan burí besafu budigü o amu bísinisi, hani nadagimeintiña buligasion hígiruni le hadügübei lun hetenirun houn ha achülürütiña ñeinhin. Ani libe-agei dan, buídubei heresibirunün lugundun ariha hamutün keisi aban gürigia le gayarabei lidin agañeiha ñein ámuñegü. Anhein buidu hasansiragun ani ayanuha hugía houn lau inebesei, gayarati buídutimabei lan hóuserunün.
3. Ka gayarabei hadügüni lun masandiragun hamá agañeihatiña houngua wuriba?
3 Mosu funa san napurichihan hagibugiñe saragu agañeihatiña? Lunti wanúadahan aban oura dan le ua hamá saragu agañeihatiña, kéiburi dan le ladaaruña lan bísinisi. Aguraba humá lábuguarügü lan gürigia le arihibei lau bísinisi o ha nadagimeinbaña ñein ani mibelá hiyanun.
4. Ka gayarabei hariñaguni dan le hapurichihan lidan burí bísinisi?
4 Ka gayarabei hariñaguni? Anhein gibe habéi nadagimeintiña lidan bísinisi ligía, ayanuha humá luma gürigia le arihibei lau. Gayarati hariñagun lun: “Hénrenguti wadariruniña gürigia ha nadagimeinbaña lidan bísinisi hábiñe, ligíati wáluahanbaliña lidan hawadigimari. Kei le subudi lubéi nun luagu beresegu humá, míbebei wayanuhan”. Lun masaminarun hamá aban lan alugurahati hugía, háfuga buítimabei mamuriahan humá budagia, ánheingubeirügü álügüdaha somu gürigia ida liña lan lamainirúniwa wadagimanu le. Según ka lan luwuyeribei bísinisi ligía, gayarati hálügüdüni ábuti anhein gayara lubéi hayanuhan murusun hama ha híbiri nadagimeintiña. Ariñaga huméi ligiaméme burí dimurei. Anhein weiri lubéi luberesegun somu nadagimeinti, rúrügü humá aban tratadu lun. Anhein siñá lubéi hayanuhan hama amu gürigia, álügüdaha humá anhein gayara lubéi hígirun agumeiraguagüdüni lidan fulasu le ñein lubéi houdin emeraagua o lidan amu fulasu.
5. Ka uagu mosu lubéi ganigi wamá lun wapurichihan lidan burí bísinisi?
5 Dandu Hesusu kei Pábulu apurichihatiña meha lau ganigi ñein lubéi hawadigimarida gürigia, ani hugía gayarati giñe hadügüni (Mat. 4:18-21; 9:9; Adü. 17:17, NM). Amuriaha humá luma Heowá lun líchugun darangilaü luma ganigi hun (Adü. 4:29). Buiti apurichihani lidan burí bísinisi lugundun súnwandan añahein lan gürigia ñein. Ka uagu móuchagun hubalin?