Iseri aransehani lun lapurichihóun lidan guririguaü
1. Ida liña meha hapurichihan kristiánugu lidan furumiñeti sígulu?
1 Lidan furumiñeti sígulu, apurichihatiña meha kristiánugu muna tuagun muna, gama lumoun, apurichihatiña meha giñe lidan fulasu le ídounbei hachülüra saragu gürigia (Adü. 20:20). Aban hénpulu, ñǘdüntiña meha tidan ténpulu, ladüga subudi hamani hadariruba lan saragu gürigia ñein (Adü. 5:42). Sagü meha weyu lapurichihan apostolu Pábulu ñein lubéi haluguraha gürigia ǘmadarugu Atenasi (Adü. 17:17). Uguñe weyu, awanhamémegua ayusurei apurichihani muna tuagun muna kei manera le súdinitimabei lun wasubudiragüdüni uganu buiti houn gürigia. Gama lumoun, apurichihatiwa giñe le ñein lubéi tamuñeira karü, lidan burí bísinisi, párükerugu luma lidan burí üma le ñéingiñe lubéi hásagüra saragu gürigia, lidan amu dimurei, apurichihatiwa ñein lumuti wadarira gürigia. Íbini amisurahóuadiwa lan súngubei lun wapurichihan lidan guririguaü ñein lubéi gayara lan, saragu wádangiñe gayarabei wídehan lidan bián lubuidun iseri ligaburi lapurichihóun lidan guririguaü. Akutiha waméi bián manera ligía.
2. Ka burí aransehani agumeserubei adügǘwa lidan unsu-hati irumu 2011?
2 Aransehani espechaliti lánina apurichihani lidan uburugu burí wéinamuti. Kei aubei lafuranguagüdawa lidan páhina 16 luma 17 tidan líburu Anuario 2013, lidan unsu-hati irumu 2011 gumesewati aban aransehani lidan uburugu Newayoru (Meriga), le lunbei leseriwidun kei hénpulu lánina apurichihani lidan guririguaü. Lidan burí fulasu súdiniti uburugu le ñéingiñe lubéi hásügüra saragu gürigia, aba ladagaragüdǘniwa burí dábula luma burí tarufudagüle agumeiraguagüdüni lidan ámuñegueinarügü iñeñein, tuma gárada wéinamutu tau burí iyawaü buíduburitu luagu. Sagü weyu, ariha hamutu saragu milu gürigia agumeiraguagüdüni burí to, íbini ha awinwandubaña tidan burí rumu to tídanboun muna lautu saragu fuló to ñeinhin lubéi migirúniwa hamá furumiñeguarügü gürigia lun hebelurun, hama gürigia ha hénrengubei hadarirúniwa hábiñe. Buíduburiti resultóu le ibihúbei. Lídanrügü aban hati afanreinhóuatu 3,797 garüdia tuma 7,986 líburu. Gíbetiña giñe gürigia amuriahatiña lichugún külase tídangiñe Bíbülia houn. Ani kei lun lubéi lagumeserúniwa aturiahani hama gürigia ladügǘwa aransehani le, ounahóuati hani gürigia ha busenbaña hafurendeirun dátosu lidoun damuriguaü le lídanbei fulasu le ñein lubéi heredera lun lidin somu íbiri bisidei.
3. Ida luba lasigirún iseri aransehani lánina apurichihani lidan guririguaü lidan ámuñegueinarügü fulasu?
3 Kei buidu lubéi resultóu le ibihúbei, aba giñe desidírua lan lasigirúniwa ligiaméme aransehani lánina apurichihani le lidan saragu uburugu le ídanbei hawinwanda saragu gürigia lidan sun ubóu. Kada sukursaliba akutihei kaba lan hamuga uburugu ídanti gayara lan lahuudun aransehani le. Libe-agei dan, anúadira hamuti uburugu le ñein lumuti somu fulasu le ídanbei gibe hamá gürigia éibuga, háfuga ladüga anihein lan fulasu ñein lun tárügüdüniwa busu o awión o háfuga ladüga anuhein lan saragu áfisi o rumu to lautu saragu fuló ñein. Ábameti tóunahan sukursali adundehani lun burí damuriguaü le lunbei lídehan lidan aransehani le. Íbini libe-agei lan dan prekursorugu espechalitiña hama ha apurichihabaña ǘrüwa-wein-diisi oura anuadirúbaña lun hídehan lidan aransehani le, anihein dan gayarabei lan giñe hadügüni prekursorugu ídehatiña.
4. Ida liña hapurichihan íbirigu ha ídehabaña lidan aransehani le?
4 Ida liña ladügǘniwa apurichihani. Libe-agei dan, agurabatiña prekursorugu ha ídehabaña lidan aransehani espechaliti le lun layarafadun somu gürigia luagun dábula o luagun tarufudagüle agumeiraguagüdüni, ábati hariñagun lun gayara lan lárügüdünu agumeiraguagüdüni to hínsiñeboun lun. Yusu hamutu giñe Bíbülia lun hóunabuni álügüdahani le ladügübei. Anhein busén lubéi lerederun tau aban agumeiraguagüdüni, madimurehantiña luagu budagia lun. Gama lumoun, anhein álügüdaha ida liña lan lamainirún wadagimanu le wadügübei, aba hariñagun lun iridúa lan tidan agumeiraguagüdüni halíounba lan gayara lan lóunahani lani budagia. Dan le gayara lan, álügüda hamuti: “Hínsiñeti hamuga san hun labisidahanün somu gürigia?” o “Busentün hamuga nabürüdüni hiri lun heresibirun külase tídangiñe Bíbülia mafayeihanga?”.
5. Ka lubuidun dimurei hariñagubei aban feru maríeitiña luagu aransehani espechaliti lánina apurichihani lidan guririguaü?
5 Barüti lidehóuniwa lidan aransehani le saragu ugundani. Abürühatiña aban feru maríeitiña: “Dan le rara waña lan lubadu dábula, arihei hásügürün saragu milu gürigia, rútiwa fe ladügǘña lan saragu áfaaguni lun lachülürǘniwa hamoun gürigia ha lídangiñetiña sun fulasu. Wasaminarun luagu gebegi hamá kada aban hádangiñe gürigia ha lun Heowá adügati lúntima wachoururuni apurichihani lan lunbei lanügüni furumiñeti lúgaaru lidan wabagari. Dan le hásügürün gürigia ligibugiñe tarufudagüle agumeiraguagüdüni, aba wasaminarun luagu lakutihañoun lan Heowá hanigi lun lasubudiruni anhein gadüna habéi haganbuni luganute. Marihinñaha wamagili hídehan ánheligu ítara kei guentó”.
6. a) Ka aransehani lánina apurichihani lidan guririguaü adügǘwaalibei lidan saragu damuriguaü, ani ida liña amu lan luéi aransehani espechaliti? b) Ka luwuyeri ídehani mégeiwabei lidan ámuñegueinarügü damuriguaü le asigirubalin aransehani lánina lapurichihóun lidan guririguaü?
6 Aransehani le ladügübei damuriguaü lun lapurichihóun lidan guririguaü. Lidan saragu damuriguaü adügaaña giñe wéiyaaña lidan afiñeni aransehani lun lapurichihóun lidan guririguaü. Aba híchugun lílana damuriguaü ligía aban dábula o aban tarufudagüle agumeiraguagüdüni lidan aban lídangiñe fulasu le ídanbei hapurichiha ani le ídangiñebei hásügüra saragu gürigia. Ani adügati katei le lun amu lan luéi aransehani espechaliti lánina apurichihani lidan guririguaü, lugundun ámuñegueinarügüti damuriguaü le ñein habéi íbirigu ha adügübalin wadagimanu le ani apurichihatiña lidan ligiaméme fulasu lidan uburugu le tanúadirun sukursali (Ariha huméi rekuáduru “Mégeiwati lubuidun aransehani laganagua burí damuriguaü”).
7. Ánhaña desidírü wéiyaaña lidan afiñeni luagu buídubei lan hadügün aransehani lun lasigirún aban aransehani lánina apurichihani lidan guririguaü, ida luba haransehani?
7 Mosu hakutihani wéiyaaña lidan afiñeni anhein anihein lubéi somu fulasu le ídanbei hapurichiha lílana damuriguaü le ñein habéi ani le ídangiñebei hásügüra saragu gürigia, akutiha hameime anhein buídubei lubéi hadügün aransehani lun lasigirún aban aransehani lánina apurichihani lidan guririguaü. Háfuga gayarabei hadagaragüdün burí dábula o aban tarufudagüle agumeiraguagüdüni lidan burí fulasu le ñein lubéi tárügüdüwa busu o amu ugunei, fulasu le ñein lumuti lalugurahóua ámuñegueinarügü marasun, párükerugu, üma le ídangiñebei hásügüra saragu gürigia, mólurugu, tidan burí luban furendei íñuti, aeropuerturugu, luma fulasu burí le ñein lubéi ladügǘwa fedu irumu-auti. Libe-agei dan buídutimabei lun ladagaragüdǘniwa tarufudagüle agumeiraguagüdüni ligía lidan ligiaméme oura, fulasu, luma weyu. Arihúaali buídutima lan ladagarawagüdǘniwa dábula turageirugu burí molu sügǘ lau ladagarawagüdǘniwa tigibugiñe budigü wéinamutu le ñeinhin lubéi belurügü hamá gürigia agañeiha aba houdin. Anihein fulasu, kéiburi laru üma le ñéingiñe lubéi héibuga saragu gürigia, le ídanbei buídutimabei lan layusurún aban liraüraü tarufudagüle agumeiraguagüdüni sügǘ lau layusurún aban dábula. Aniheinhali fulasu tidan Internet le adügǘbei lúntima gayara lan tadügǘniwa gárada wéinamutu to gawagutu dimurei burí tuma iyawaü buíduburitu lun tayusurún lun luwuyeri apurichihani le. Awisahatu gárada burí wéinamutu to tuagu Garüdia Atalaya tuma ¡Despertad! luma tuagu líburu Kátima san, ani gayarati harariragüdünu wéiyaaña lidan afiñeni lídangiñe Internet. Hadügübei íbirigu ha ídehatiña lidan luwuyeri apurichihani le lememe lunbei hadügüni íbirigu ha ídehabaña lidan aransehani espechaliti lánina lapurichihóun lidan uburugu wéinamuti, lau hafalaruni adundehani le líchugubei íbiri le arihibei lau apurichihani. Danme le lariñagun somu gürigia houn halía lan lawinwanda ani mama lun damuriguaü le ñein habéi latokara lapurichihan lidan fulasu ligía, lau lóufudagun mosu habuichagüdünu dugumedu to gíriboun Sírvase visitar (S-43) ábameti hederegerunu lun sekretariu.
8. Íbini anhein madügǘn lubéi aban aransehani lun lapurichihóun lidan guririguaü lidan damuriguaü le ñein hubéi, ka chansi gayarabei hadariruni lun hapurichihan lidan guririguaü?
8 Le gayarabei hadügüni lun hapurichihan lidan guririguaü. Ánheinti ua lubéi fulasu le ídangiñeti hásügüra saragu gürigia lidan fulasu le ñein lubéi hapurichiha lílana damuriguaü le ídanbei gayara lan hadagaragüdün aban dábula o aban tarufudagüle agumeiraguagüdüni? Íbini ítara, háfuga gayara lan hapurichihan lidan guririguaü. Anihein san fulasu le ñein lumuti saragu bísinisi, aban tiraüraü molu o aban budigü to gabuinchaditu hau saragu agañeihatiña lidan fulasu le ídanbei hapurichiha lílana damuriguaü le ñein hubéi? Héchutiña san gürigia aguriridagua lidan burí párüke, fulasu burí le ñein lumuti ámuñegueinarügü marasun o lidan amu fulasu? Adügǘwati san somu adamuridaguni o fedu le ñein lumuti hóundaragua saragu gürigia? Anhein ítara liña lubéi, háfuga gachansinbadün lun hapurichihan lidan guririguaü.
9. Ka uagu lunti lubéi wáfaagun lun wapurichihan houn gürigia le ñein lumuti wadariraña?
9 “Hasalbarun sun gürigia [labusenrunbei Heowá], lun giñe hayabin lun hasubudiruni inarüni.” (1 Tim. 2:4.) Ligía wóuchuña lubéi wanügüni uganu luáguti Larúeihan Bungiu houn sun gürigia ha wayara lubaragiñe lachülürün lagumuchagüle ubóu (Mat. 24:14). Libe-agei dan, hénrenguti wadariruniña gürigia hábiñe, gama lumoun másiñati gayarabei lan wadimurehan hama lidan aban fulasu le ñeinhin lubéi hachülüra saragu gürigia. Le linarün katei, gayarati ítararügübei lan gayara lan haganbuni uganu buiti. Apurichiha wamá lubeiti houn gürigia ñein lumuti wadariraña, ani gúnfuli wamá buidu lau wani ministeriu (2 Tim. 4:5).
[Iyawaü to lídanboun páhina 5]
Mégeiwati lubuidun aransehani laganagua burí damuriguaü
Ariñawagúaali luagu añahein lan lílana ámuñegueinarügü damuriguaü ha apurichihatiña lidan burí ligiaméme üma o fulasu le ñein lubéi tamuñeira karü luma tigibugiñe tuguyaméme burí bísinisi o fulasu burí le ñein lubéi tárügüdüwa ugunei. Arihúaali giñe añahein lan lílana ámuñegueinarügü damuriguaü ígirutiña garüdia lidan ligiaméme burí fulasu le ídanbei hagurabaha gürigia ani apurichiha hagía houn laburiña ligiaméme bísinisi. Ani íbini lidan lan ámuñegueinarügü dan hadügei, adügaali katei le lun hasandirun gürigia luagu migirúniwa hamá ni lun hawaragun. Ligíati, dan le wapurichihan lidan guririguaü buídutimati wadügüni lidan aban lídangiñe fulasu le ídanbei lapurichiha damuriguaü le ñein wabéi.
Anhein busén habéi íbirigu hapurichihan lidan aban fulasu le ñeinhin lubéi hachülüra saragu gürigia le ídanbei lapurichiha amu damuriguaü, mosu hadimurehan furumiñe luma íbiri le arihubei lau apurichihani lidan damuriguaü le ñein habéi. Ligíabati amuriaha üma luma íbiri le arihubei lau apurichihani lidan le aban damuriguaü. Dan le apurichiha hamá lílana damuriguaü le lídanti ámuñegueinarügü iñeñein lidan ligiaméme fulasu, mosu estodi lan hadimurehan íbirigu ha arihibaña lau apurichihani lidan ámuñegueinarügü damuriguaü ligía hámagua luéi habuchadagüdün íbirigu hawagu gürigia. Ladügüba lubuidun aransehani laganagua burí damuriguaü lun ladügǘn “sun katei lidan lubudubu” (1 Ko. 14:40).
[Iyawaü to lídanboun páhina 6]
[Iyawaü to lídanboun páhina 6]