Buídutimahali apurichihani lidan guririguaü
1. Ka amisurahani adügǘwaalibei houn lílana damuriguaü le ídanbei anihein lan fulasu le ídangiñebei hásügüra saragu gürigia?
1 Amisurahóuaaña lílana sun damuriguaü le ídanbei anihein lan fulasu le ídangiñebei hásügüra saragu gürigia adüga aransehani lun lapurichihóun lidan guririguaü lau burí dábula o tarufudaagüle agumeiraguagüdüni. Anhaün desidírü hayusurun aban tarufudaagüle agumeiraguagüdüni, lunti ñeinbei lan íbini aban íbiri rara o ñun tóubagiñe. Anhaün ayusura dábula, lunti ñéinbaña lan bián íbirigu. Lunti láfaagun kada aban hádangiñe lun lóuseruniña gürigia buidu luma lau gamadóuni. Danme le layarafadun somu gürigia luagun tarufudaagüle agumeiraguagüdüni, gayaraati lagumeserun aban hádangiñe íbirigu ayanuha luma ítara: “Álügüdaguañahaadün san hungua ka lan tariñagubei Bíbülia luagu tema le?”. Lídanmeme oura ligía, gayaraati giñe ñein lan aban o bián íbirigu yarafa lun tarufudaagüle agumeiraguagüdüni apurichiha houn sun ásügürütiña ñéingiñe.
2. Abahüdagua humá aban sügǘ le arufuduti ru lan lapurichihóun lidan guririguaü buiti resultóu.
2 Gíbeeña gürigia agumeserutiña aturiahoun Bíbülia seremei ligaburi apurichihani le. Ariha wamá aban hénpulu: Aba desidírü tan aban aturiahatu tidan luban furendei íñuti tabürüdün aban arütíkulu hawagu gefentiña luagu Heowá, gama lumoun, madaritu ni aban Luban Wadamuridagun. Aban dimaasu lárigiñe, aba tarihin aban dábula tau agumeiraguagüdüni tidan luban furendei íñuti. Aba tagumeserun aturiahoun Bíbülia, guentoti badiseiharu ani tídehaña giñe lidan ligaburi apurichihani le.
3. Ka hasaminarubei íbirigu ha ídehaañabaña lidan ligaburi apurichihani le?
3 Ariñagatu aban íbiri to ídehaaruboun lidan ligaburi apurichihani le: “Añahein ayarafadutiña lun hamuriahanu Garüdia Atalaya tuma ¡Despertad! to áfuriduboun lidan hati. Añahein amu maganbunñahagiña hawagu gefentiña luagu Heowá. Ariha numuti ídeha lan iseri ligaburi apurichihani le lun gíbetima hamá gürigia aganbuti uganu buiti”. Ariñagatu amu íbiri: “Ámuti ligaburi apurichihani le luéi le líbiri ani ruti saragu ugundani, lugundun gürigia ñǘbuinbaña bumoun, íbini lúnrügü lan harihin”.
4. Ka uagu buídutima lubéi lichugún tarufudaagüle agumeiraguagüdüni lidan ligiaméme fulasu, weyu luma oura?
4 Liibe-agei dan, buídutimati lichugún tarufudaagüle agumeiraguagüdüni lidan ligiaméme fulasu, weyu luma oura. Ítarati, kei ábame lan héchudun gürigia harihei, ménrenguntimahalime houn hayarafadun álügüdaha o amuriaha agumeiraguagüdüni. Adügǘwaali san aransehani lidan damuriguaü le ñein hubéi lun lapurichihóun lidan guririguaü? Houcha huméi lubuidun ligaburi apurichihani le le aubei lasubudiragüdüwa “uganu luáguti larúeihan Bungiu” lidan sun fulasu (Luk. 9:60).